គម្រោងថែទាំខួបកំណត់ផ្លូវជាតិលេខ ៥ ប្រើប្រាស់ថវិកា រាជរដ្ឋាភិបាលកម្ពុជា នៅក្នុងសង្កាត់កំពង់ឆ្នាំង ក្រុងកំពង់ឆ្នាំង កំពុងដំណើរសាងសង់
(កំពង់ឆ្នាំង)៖ លោក ឆាយ លាភា ប្រធានមន្ទីរសាធារណការ និង ដឹកជញ្ជូន ខេត្តកំពង់ឆ្នាំងបានបញ្ជាក់អោយដឹងថា ៖ គម្រោងថែទាំខួបកំណត់ផ្លូវជាតិលេខ៥ ថវិការាជរដ្ឋាភិបាលកម្ពុជា តាមរយះក្រសួងសាធារណការ និងដឹកជញ្ជូនអនុវត្តដោយមន្ទីរសាធារណការ និង ដឹកជញ្ជូនខេត្តកំពង់ឆ្នាំងកំពុងដំណើរសាងសង់ ហើយ គម្រោងថែទាំខួបកំណត់ផ្លូវជាតិលេខ៥ដោយក្រាលកៅស៊ូ AC ប្រវែង១ ១២០ មទទឹង ១៣ ម៉ែត្រ ចាក់បេតុងចិញ្ចើមសងខាង(ម្ខាង ០,៥ ម៉ែត្រ), រៀបឃឿនបេតុង,រៀបការ៉ូឡា, គូសគំនូសសញ្ញាចរាចរណ៍, ដាំផ្លាកសញ្ញាចរាចរណ៍ និងដាំដុំចំណាំងផ្លាត នៅចន្លោះគ.ម៨៧+៦៦០ ដល់គ.ម៨៨+៧៨០ ស្ថិតនៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
លោកបានបញ្ជាក់អោយដឹងបែបនេះនៅរសៀលថ្ងៃពុធទី២៧ ខែមីនា ឆ្នាំ២០២៥ នៅពេលដែលលោកនិងសហការីចុះពិនិត្យការកសាងផ្លូវនៅភូមិស្រែព្រីង សង្កាត់កំពង់ឆ្នាំង។
លោក ឆាយ លាភា បានបញ្ជាក់ឱ្យដឹងទៀតថា ៖ ក្រោមការដឹកនាំរបស់ ឯកឧត្តម រដ្ឋមន្រ្តីក្រសួងសាធារណការនិងដឹកជញ្ជូន និង ក្រោមការដឹកនាំផ្ទាល់របស់ ឯកឧត្តម ស៊ុន សុវណ្ណារិទ្ធិ ជាអភិបាលខេត្ត បានធ្វើឱ្យខេត្តមួយនេះកាន់តែមានការអភិវឌ្ឍ លើគ្រប់វិស័យ និង ជាខេត្តមួយដែលធ្វើឱ្យមានការចាប់អារម្មណ៍ពីសំណាក់ប្រជាពលរដ្ឋ
ពីការអភិវឌ្ឍ ឆាប់រហ័សក្នុងរយៈពេលខ្លី ជាពិសេសហេដ្ឋារចនាសម្ព័ន្ធក្នុងមូលដ្ឋានខេត្តកំពង់ឆ្នាំង។
លោក ឆាយ លាភា ក៏បានអំពាវនាវ ដល់ប្រជាពលរដ្ឋនៅសងខាងផ្លូវ និង អ្នកធ្វើដំណើរ សូមចេះយោគយល់គ្នាដើម្បីសុវត្ថិភាពចរាចរណ៍យើងទាំងអស់គ្នា និង ថែទាំសម្រាប់កូនចៅជំនាន់ក្រោយប្រើប្រាស់បន្ត៕
សុខ គឹមសៀន
