(ភ្នំពេញ)៖ ឯកឧត្តមបណ្ឌិត ថោង ខុន ទេសរដ្ឋមន្ត្រី ទទួល​បន្ទុកជំរុញអភិវឌ្ឍចលនាកីឡា និងជាប្រធាន គណៈ​កម្មាធិការជាតិអូឡាំពិកកម្ពុជា បានផ្តល់អនុសាសន៍ ១០ចំណុច ដល់សហព័ន្ធកីឡាជាតិ ជាគន្លឹះអាទិភាព​ក្នុងចក្ខុវិស័យអភិវឌ្ឍន៍កីឡា ។

អនុសាសន៍ទាំង១០ចំណុចនេះ ត្រូវបានឯកឧត្តម បណ្ឌិត ថោង ខុន ផ្តល់ជូននាពេលថ្លែងបិទមហាសន្និបាត​បូក​សរុបការងារ ឆ្នាំ២០២៤ និងទិសដៅការងារ ឆ្នាំ២០២៥ របស់គណៈកម្មាធិការជាតិអូឡាំពិកកម្ពុជា នារសៀលថ្ងៃ ២៧ ខែ មីនា ឆ្នាំ២០២៥ នៅអាគារគណៈកម្មាធិការ​ជាតិអូឡាំពិកកម្ពុជា។

អនុសាសន៍ទាំង១០រួមមាន ៖ ១.សូមទទួលយកនូវភាព​អស្ចារ្យ និងមរតក SEA Games-ASEAN Para Games ឆ្នាំ២០២៣ ធ្វើជាគុណតម្លៃនៃនិមិត្តរូបដ៏មាន​ប្រសិទ្ធភាព ជាមេរៀនបទពិសោធន៍ដ៏ត្រឹមត្រូវក្នុងការ​ជំរុញទឹកចិត្តប្រតិបត្តិករកីឡាគ្រប់ៗរូប និងជាឧបករណ៍​ចាំបាច់ត្រូវបន្តការផ្សព្វផ្សាយស្នាដៃដ៏អស្ចារ្យនេះទៅលើឆាកជាតិ និងអន្តរជាតិ។

២.ពង្រឹងគុណភាព សមត្ថភាព គណៈកម្មាធិការជាតិអូឡាំ​ពិក​កម្ពុជា និងសហព័ន្ធកីឡាជាតិ តាមយន្តការគ្រប់គ្រង​ដឹកនាំប្រកបដោយប្រសិទ្ធភាព តម្លាភាព និងសក្តិសិទ្ធិ​ភាព ដែលជាវិធានការអាទិភាពត្រូវធ្វើកំណែ​ទម្រង់​ឱ្យ​ចេញជាលទ្ធផលជាក់ស្តែងក្នុងឆ្នាំ២០២៥ ដោយគោរព​តាមអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។

៣.បង្កើនការអភិវឌ្ឍធនធានមនុស្សក្នុងវិស័យកីឡាជំនាញកម្រិតខ្ពស់ ក្នុងគោលដៅកសាងសមត្ថភាពប្រកបដោយ​គុណវុឌ្ឍិជំនាញវិជ្ជាជីវកីឡាដល់ថ្នាក់ដឹកនាំ មន្ត្រី របស់​សហព័ន្ធកីឡាជាតិ និងផ្តល់ការ បណ្តុះបណ្តាលជំនាញ​កីឡា និងបច្ចេកទេសកីឡាកម្រិត​ខ្ពស់ដល់គ្រូបង្វឹក និង​កីឡាករ កីឡាការិនី ក្រុមជម្រើសជាតិ។

៤. អភិវឌ្ឍគុណវុឌ្ឍិកីឡាកម្រិតខ្ពស់របស់​អត្តពលិក​ក្នុងការ​ចូលរួមប្រកួតកីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ ដោយចាត់ទុកជា Games យុទ្ធសាស្រ្តរបស់កម្ពុជា ដោយត្រូវរក្សាឧត្តមភាព​កីឡាជាតិបន្តទៀត បន្ទាប់ពីជោគជ័យឆ្នាំ២០២៣ ដែលកម្ពុជាធ្វើម្ចាស់ផ្ទះ។

៥. មហាគ្រួសារចលនាអូឡាំពិកនិងកីឡាជាតិត្រូវ​បុរេសកម្ម​ក្នុងការស្វ័យសិក្សា ក៏ដូចជាសហការជាមួយ​ចលនាអូឡាំពិក និងស្ថាប័នកីឡាអន្តរជាតិក្នុងការទាញ​គុណប្រយោជន៍ជាអតិបរមាពីការប្រើប្រាស់ បច្ចេកវិទ្យា “AI” ដើម្បីក្នុងការជំរុញអភិវឌ្ឍចលនាអូឡាំពិក និងកីឡាជាតិ។

៦.ចាប់ផ្តើមរៀបចំឯកសារបទដ្ឋានគតិយុត្តិ និងផែន​ការមេឆ្ពោះទៅព្រឹត្តិការណ៍ប្រកួតកីឡាយុវជនអាស៊ី និងកីឡាយុជនអាស៊ីប៉ារ៉ាហ្គេម ឆ្នាំ២០២៩ ឱ្យបានរួចរាល់នៅឆ្នាំ២០២៥។

៧. សូមខិតខំបន្តការងារអភិវឌ្ឍមូលធនមនុស្ស​ក្នុងវិស័យ​កីឡារបស់គណៈកម្មាធិការជាតិអូឡាំពិកកម្ពុជា ក្រោម​គម្រោង​គម្រោងសាមគ្គីអូឡាំពិក “Olympic Solidarity” និងគម្រោងអភិវឌ្ឍជាមួយដៃគូអន្តរជាតិ រួមទាំងវគ្គបច្ចេក​ទេសគ្រូបង្វឹកជំនាញកម្រិតខ្ពស់, វគ្គវេជ្ជសាស្រ្ត និងវិទ្យា​សាស្រ្ត កីឡា, វគ្គរដ្ឋបាលកីឡា, វគ្គគ្រប់គ្រងកីឡាកម្រិត​ខ្ពស់ និងកម្រិតឧត្តមសិក្សាផ្នែកគ្រប់គ្រងកីឡា។

៨.បន្តខិតខំរៀបចំព្រឹត្តិការណ៍កីឡាមហាជនដូចជា ទិវារត់​ប្រណាំង និងព្រឹត្តិការណ៍កីឡានានា​ឱ្យកាន់​តែ​ផុសផុល ប្រកប​ដោយគុណភាព និងប្រសិទ្ធភាព។

៩.សូមបន្តរក្សាសាមគ្គីភាពផ្ទៃក្នុងប្រកបដោយវិបុលភាព បរិយាបន្ន និងបន្តរក្សាវប្បធម៌សន្ទនា រួមគិត រួមធ្វើ រួម​ទទួលខុសត្រូវ រួមកែលម្អចំណុចខ្វះខាតប្រកបដោយ​សុច​រិតភាព ដើម្បីបង្កើតបរិយាកាស សុខដុមរមនាការងារ​ក្នុងមហាគ្រួសារចលនាអូឡាំពិកនិងកីឡាជាតិតែមួយ។

១០.មហាគ្រួសារចលនាអូឡាំពិកនិងកីឡាជាតិត្រូវបន្តពង្រឹង​​កិច្ច​សហការប្រតិបត្តិការអន្តរជាតិ ពិសេស ជាមួយ​ស្ថាប័នកីឡាអន្តរជាតិជាដៃគូ ដើម្បីធានានូវអនុលោមភាព ស្របតាមការគោលការណ៍ និងគោលនយោបាយចលនា​អូឡាំពិក និងកីឡាអន្តរជាតិ។

ឯកឧត្តម ថោង ខុន បានបន្ថែមទៀតថា មហាសន្និបាត​ប្រចាំ​ឆ្នាំនេះ ពិតជាមានតម្លៃ និងទទួលបានផ្លែផ្កា​ជាវិជ្ជ​មាន ដើម្បីជាចក្ខុវិស័យតម្រង់ទិសដល់យើងទាំងអស់គ្នា ឱ្យបន្តការខិតខំប្រឹងប្រែងអនុវត្តការងារកីឡា និងអភិវឌ្ឍ​វិស័យ​កីឡាជាតិឱ្យកាន់តែរឹងមាំ និង រីកចម្រើនរុងរឿង ដើម្បីបន្ត​ពង្រឹង​សក្តានុពល និងឧត្តមភាពកីឡាជាតិលើ​ឆាក​អន្តរជាតិ។

ក្នុងនាមមហាគ្រួសារចលនាអូឡាំពិកនិងកីឡាជាតិ ឯកឧត្តម ថ្លែងអំណរគុណយ៉ាងជ្រាលជ្រៅជាទីបំផុត ចំពោះ សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ព្រមទាំង សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជាណាចក្រកម្ពុជា ដែលបានយកចិត្តទុកដាក់ខ្ពស់​ឧបត្ថម្ភគាំទ្រជំរុញលើកទឹកចិត្តគ្រប់ពេលវេលាដល់ចលនាអូឡាំពិក និងវិស័យកីឡាជាតិ ៕

រូបភាព ៖ ជីម ភារ៉ា អត្ថបទ៖ ជាវ ចន្ធូ