គ.ជ.ប នឹង ជ្រើសរើសមន្រ្តីជាប់កិច្ចសន្យាជាង៤ពាន់នាក់ សម្រាប់បម្រើការងាររយៈពេលខ្លី
(ភ្នំពេញ)៖ នៅថ្ងៃទី១២ ខែ មេសា ឆ្នាំ ២០២៥ខាងមុខនេះ គណៈកម្មាធិការជាតិ រៀបចំការបោះឆ្នោត (គ.ជ.ប)នឹងធ្វើការប្រឡងជ្រើសរើសយកមន្រ្តីជាប់កិច្ចសន្យាចំនួនជាង៤ពាន់នាក់សម្រាប់បម្រើការងាររយៈពេលខ្លី។
ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានថ្លែងប្រាប់បណ្តាញសារព័ត៌មានក្រោយបញ្ចប់ពីធីអប់រំ ផ្សព្វផ្សាយ និងបញ្ជ្រាបការយល់ដឹងស្ដីពី “សារៈសំខាន់នៃការបោះឆ្នោតនៅកម្ពុជា” ដល់មន្រ្តីបោះឆ្នោត តំណាងសមាគម សាស្រ្តាចារ្យ លោកគ្រូ អ្នកគ្រូ និងនិស្សិតនៅតាមគ្រឹះស្ថានសិក្សានានាក្នុងរាជធានីភ្នំពេញ នាវិទ្យាស្ថានបច្ចេកវិទ្យាកម្ពុជា ឬហៅសាលាតិចណូកាលពីថ្ងៃទី ២៧ ខែ មីនា ឆ្នាំ២០២៥ថាកាលពីពាក់កណ្តាលខែមីនាកន្លងមកនេះគ.ជ.បបានធ្វើការជ្រើសរើសមន្រ្តីកិច្ចសន្យារយៈពេលខ្លីដែលអាចចាប់ផ្តើមធ្វើការរយៈពេលពី២ទៅ៣ខែរួចមកហើយ។ការជ្រើសរើសនេះដែរក៏ជំហ៊ានទី១ដែរ សម្រាប់រៀបចំរចនាសម្ព័ន្ធ និង ពង្រឹងសមត្ថភាពដែលជាគ្រូសម្រាប់តាមស្រុក ។
ដោយឡែកសម្រាប់នៅថ្ងៃទី១២ ខែមេសាខាងមុខនេះគ.ជ.បនឹងរៀបចំប្រឡងមួយទៀតដោយជ្រើសរើសមន្រ្តីជាប់កិច្ចសន្យាបម្រើការងាររយៈពេល១ខែ ចំនួនជាង ៤ពាន់នាក់។នេះក៏ជាការជ្រើសរើសសមាសភាពក្រុមបោះឆ្នោតដែលនឹងត្រូវធ្វើការផ្ទាល់នៅតាមសាលាឃុំសង្កាត់ និងតាមការិយាល័យចុះឈ្មោះបោះឆ្នោត ហើយក៏ជាអ្នកជួបផ្ទាល់ជាមួយប្រជាពលរដ្ឋដែរ។
ឯកឧត្តមបានថ្លែងបញ្ជាក់ថា” គ.ជ.ប មានជំហ៊ានក្នុងការជ្រើសរើសក្នុងការរៀបចំមន្រ្តីប្រកបដោយសមត្ថភាពក្នុងការបម្រើបំពេញការងារ និងពិនិត្យចុះឈ្មោះបោះឆ្នោតប្រចាំឆ្នាំរបស់ខ្លួន។
គួរបញ្ជាក់ថាបើតាម ឯកឧត្តម ប្រាជ្ញ ចន្ទប្រធានគ.ជ.ប បានអំពាវនាវ ដល់ប្រជាពលរដ្ឋខ្មែរដែលមិនទាន់បានចុះឈ្មោះបោះឆ្នោតពីមុនមក ប្រជាពលរដ្ឋដែល មានឈ្មោះក្នុងបញ្ជីបោះឆ្នោតហើយតែបានផ្លាស់លំនៅឋាន ឃុំ សង្កាត់ថ្មី និងយុវជន យុវនារី ពិសេស សិស្ស និស្សិត ដែលឈានដល់អាយុ ១៨ឆ្នាំ ត្រូវទៅជួបក្រុមចុះឈ្មោះបោះឆ្នោតនៅតាមឃុំ សង្កាត់ដែលខ្លួនរស់នៅ ដើម្បីបំពេញ លក្ខខណ្ឌចុះឈ្មោះបោះឆ្នោតថ្មី។
ដោយឡែកសម្រាប់ ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៥ នេះ មានរយៈពេល តែ ២៦ថ្ងៃ ប៉ុណ្ណោះ ពោលគឺចាប់ពីថ្ងៃទី១ ដល់ថ្ងៃទី២៦ ខែឧសភា ឆ្នាំ២០២៥៕
ដោយ ៖ ម៉ាដេប៉ូ
