សៀមរាប បន្តលើកកម្ពស់វិស័យសុខាភិបាល ដើម្បីសម្រេចគោលដៅសុខភាពជាសកល
(សៀមរាប)៖ អាជ្ញាធរខេត្តសៀមរាប បានណែនាំ និងលើកទឹកចិត្តដល់អង្គភាពពាក់ព័ន្ធក្នុងវិស័យសុខាភិបាល ដើម្បីបន្តខិតខំប្រឹងប្រែងក្នុងការអភិវឌ្ឍវិស័យសុខាភិបាលឲ្យកាន់តែប្រសើរ ស្របតាមចក្ខុវិស័យឆ្នាំ២០៣៥ សម្រាប់ សុខភាពជាសកល។
អង្គសន្និបាតសុខាភិបាលខេត្ត ដែលប្រព្រឹត្តទៅក្នុងរយៈពេលមួយថ្ងៃកន្លះ នៅសាលប្រជុំមន្ទីរពេទ្យជ័យវរ្ម័នទី៧ ត្រូវបានបិទនៅថ្ងៃទី ២៨ ខែមីនា ឆ្នាំ២០២៥ ក្រោមអធិបតីភាព លោកជំទាវ ខេង តារាស៊ី សមាជិកក្រុមប្រឹក្សាខេត្ត និងលោក នាក់ ណេរ៉ុន អភិបាលរងខេត្តសៀមរាប។
លោក នាក់ ណេរ៉ុន បានអំពាវនាវឲ្យមន្រ្តីរាជការនិងស្ថាប័នពាក់ព័ន្ធបន្តឧបត្ថម្ភ និងចូលរួមយ៉ាងសកម្មក្នុងការអភិវឌ្ឍវិស័យសុខាភិបាល។ គោលដៅសំខាន់គឺការផ្តល់សេវាសុខាភិបាលដែលមានប្រសិទ្ធភាព សមធម៌ និងទាន់ពេលវេលា ដើម្បីបំពេញតម្រូវការប្រជាពលរដ្ឋនៅមូលដ្ឋាន។
លោកអភិបាលរងខេត្ត បានផ្តល់អនុសាសន៍ចំនួនបីដល់ថ្នាក់ដឹកនាំ និងមន្ត្រីពាក់ព័ន្ធ៖
អនុវត្តផែនការរបស់ក្រសួងសុខាភិបាល ៖ ដំណើរការសកម្មភាពសុខាភិបាលឲ្យមានប្រសិទ្ធភាពខ្ពស់ និងការទទួលខុសត្រូវ។
លើកកម្ពស់សុខភាពសាធារណៈ ៖ ផ្សព្វផ្សាយការចងចាំនូវអនាម័យល្អ និងការរស់នៅមានសុខភាព (ការប្រើប្រាស់អំបិល ខ្លាញ់ និងស្ករថយចុះ, ការចាត់ចែងបរិស្ថានស្អាត, និងការចៀសវាងគ្រឿងស្រវឹង)។
បង្កើនគុណភាពសេវាសុខាភិបាល ៖ ពង្រឹងការព្យាបាល និងការពង្រឹងវិស័យសុខាភិបាលក្នុងមូលដ្ឋាន ដោយអភិវឌ្ឍសមត្ថភាពវិជ្ជាជីវៈ និងការចូលរួមរបស់សង្គម។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានបញ្ជាក់ថា សន្និបាតនេះបានលេចធ្លោលទ្ធផលវិសេសវិសាលប្រៀបធៀបទៅនឹងឆ្នាំមុនៗ។ ពិសេស អ្នកជំងឺមានឱកាសចូលរួមសេវាសុខាភិបាលដែលមានគុណភាពខ្ពស់នៅមន្ទីរពេទ្យបង្អែកខេត្ត និងមន្ទីរពេទ្យជ័យវរ្ម័នទី៧។
បន្ថែមពីនេះ មន្ទីរសុខាភិបាលខេត្តក៏បានពង្រឹងប្រព័ន្ធទំនាក់ទំនង និងការបញ្ជូនអ្នកជំងឺ ដើម្បីធានាបាននូវសេវាសុខាភិបាលទាន់ពេលវេលា។ ដោយឡែក ការពិភាក្សាក្រុមក្នុងសន្និបាតក៏បានបញ្ជាក់ពីផែនការសំខាន់សម្រាប់ឆ្នាំ ២០២៥ ដែលផ្តោតលើការអនុវត្តយុទ្ធសាស្ត្រសុខាភិបាលជឿនលឿន និងកិច្ចសហការរវាងអង្គភាពរដ្ឋនិងឯកជន។
លោក នាក់ ណេរ៉ុន បានបញ្ជាក់ថា វិស័យសុខាភិបាលជាផ្នែកសំខាន់ក្នុងការអភិវឌ្ឍសេដ្ឋកិច្ច និងសង្គម។ ដូច្នេះ ការចូលរួមរបស់អាជ្ញាធរ ទាំងសាធារណៈនិងឯកជន និងប្រជាពលរដ្ឋ គឺជាកូនសោសំខាន់សម្រាប់ការដំណើរការវិស័យនេះឲ្យប្រសើរឡើង។ សៀមរាប បន្តប្រឹងប្រែងដើម្បីសម្រេចគោលដៅសុខភាពជាសកល ដោយធ្វើឲ្យប្រជាពលរដ្ឋទទួលបានសេវាសុខាភិបាលប្រកបដោយគុណភាពនិងសុវត្ថិភាព ៕
ដោយ ៖ ប៊ុន រដ្ឋា
