បរទេស៖ មេដឹកនាំរុស្ស៊ី លោក Putin មានបំណងចង់បបួលមេដឹកនាំអាមេរិក លោក Trump និងលោកមហាសេដ្ឋីបច្ចេកវិទ្យា Elon Musk វិនិយោគរកស៊ីចូលគ្នា នៅតំបន់ស្វ័យត Greenland នៃប្រទេស ដាណឺម៉ាក នៅក្រោយពេលដែលសង្គ្រាម នៅអ៊ុយក្រែន ត្រូវបានចរចាបញ្ចប់ រួចរាល់។

យោងតាមការចុះផ្សាយ របស់ទីភ្នាក់ងារព័ត៌មាន BBC កាលពីថ្ងៃសុក្រ បានចុះផ្សាយថា បំណងរបស់មេដឹកនាំរុស្ស៊ីបែបនេះ ត្រូវបានបង្ហាញ ក្រោយពេលដែលប្រទេសទាំងពីរ បានព្យាយាមស្តារទំនាក់ទំនងឡើងវិញ ខណៈដែលមន្ត្រីជាន់ខ្ពស់ប្រទេសទាំងពីរ ជួបគ្នាបន្តបន្ទាប់ ក្រោមហេតុផលថា ស្វែងសន្តិភាពនៅអ៊ុយក្រែន។

ថ្លែងនៅក្នុងវេទិកាមួយ ស្តីពីតំបន់ទឹកកកសមុទ្រ អាក់ទិក ថ្មីៗនេះ លោក Putin បានថ្លែងថា ការចង់ច្បាមយករបស់អាមេរិក លើតំបន់ Greenland ដែលស្ថិតនៅចន្លោះមហាសមុទ្រអាក់ទិក និងមហាសមុទ្រអាត្លង់ទិក
គឺមិនពាក់ព័ន្ធនឹងរុស្ស៊ីទេ ហើយថែមទាំងអះអាងថា ផែនការរបស់ Trump នេះ គឺជារឿងពិតប្រាកដ ជាផែនការមានឫសគល់ជាប្រវត្តិសាស្ត្រយ៉ាងស៊ីជម្រៅ។

ក្រោយមក លោក Kirill Dmitriev អ្នកនាំពាក្យរបស់លោក Putin បានប្រាប់បន្ថែមថា រុស្ស៊ីចង់សហការវិនិយោគ ជាមួយអាមេរិក ក្នុងតំបន់ អាក់ទិក ដែលសម្បូរដោយធនធានរ៉ែ ដោយលោកអះអាងថា បំណងនេះ ត្រូវបានជូនដំណឹងទៅមន្ត្រីអាមេរិករួចហើយ អំឡុងពេលជួបគ្នា ថ្មីៗនេះ។ ប៉ុន្តែ លោកបានអះអាងថា គម្រោងរកស៊ីចូលគ្នានេះ អាចធ្វើឡើង ក្រោយសង្គ្រាម ចប់រួចរាល់។

ទន្ទឹមនឹងនេះ លោក Dmitriev ក៏បានកោតសរសើរ លោក Elon Musk ដែលជាទីប្រឹក្សាជំនិតរបស់លោក Trump លើកិច្ចសហប្រតិបត្តិការអាជីវកម្មរួមគ្នា ផងដែរ ដោយលោកប្រាប់ថា «យើងជឿជាក់ថា Elon Musk គឺជាអ្នកដែលមានចក្ខុវិស័យ ដ៏អស្ចារ្យ ជាអ្នកដឹកនាំដ៏អស្ចារ្យ និងជាបុគ្គលជោគជ័យ»។ លោកបានបន្ថែមទៀតថា រុស្សីមានអ្វីៗជាច្រើន ដែលត្រូវផ្តល់ជូនសម្រាប់បេសកកម្ម ទៅកាន់ភពព្រះអង្គារ ដោយសារតែរុស្ស៊ីមានបច្ចេកវិទ្យានុយក្លេអ៊ែរ ដែលអាចសហការបាន៕

ប្រភពពី BBC ប្រែសម្រួល៖ សារ៉ាត