បរទេស៖ បណ្តាមេដឹកនាំបក្សនយោបាយ នៅតំបន់ Greenland ដែលលោកត្រាំ ចង់ត្រួតត្រា បានសម្រេចយល់ព្រមបង្កើតរដ្ឋាភិបាលសម្ព័ន្ធមួយ មានបួនបក្ស ដើម្បីប្រឈមមុខនឹងសម្ពាធពីអាមេរិក នេះបើយោងតាម លោក Jens Frederik Nielsen ដែលជានាយករដ្ឋមន្ត្រីថ្មី របស់តំបន់សម្បូរដោយរ៉ែ មួយនេះ។

បន្ទាប់ពីគណបក្សប្រជាធិបតេយ្យសេរីសង្គម របស់លោក Nielsen បានទទួលជ័យជម្នះ នៅក្នុងការបោះឆ្នោតថ្ងៃទី១១ ខែមីនា នាយករដ្ឋមន្ត្រីផុតអាណត្តិ លោក Mute Egede នៃគណបក្ស Inuit Ataqatigiit ហៅកាត់ IA ឆ្វេងនិយម នឹងធ្វើជារដ្ឋមន្ត្រីហិរញ្ញវត្ថុវិញ។ សេចក្តីប្រកាសរួមបានចែងថា «យើងត្រូវការស្ថេរភាព និងឯកភាពជាតិ ក្នុងពេលដែលតួអង្គបរទេស កំពុងព្យាយាមជះឥទ្ធិពល ដល់ការអភិវឌ្ឍន៍ប្រទេសជាតិរបស់យើង»។

ការប្រកាសរួបរួមគ្នា របស់តំបន់ស្វយ័តនៃប្រទេសដាណឺម៉ាកមួយនេះ បានធ្វើឡើង ស្របពេលដែល អនុប្រធានាធិបតីសហរដ្ឋអាមេរិក លោក JD Vance បាន ទៅដល់តំបន់ស្វ័យត នៅប្រទេសដាណឺម៉ាក មួយនេះ កាលពីថ្ងៃសុក្រ។ ក្នុងដំណើរនេះ ក៏មានលោក Mike Waltz មន្ត្រីជាន់ខ្ពស់ទទួលបន្ទុកសន្តិសុខជាតិ និង រដ្ឋមន្ត្រីថាមពលអាមេរិក ផងដែរ៕

ប្រភពពី AFP ប្រែសម្រួល៖ សារ៉ាត