បរទេស ៖ ចក្រភពអង់គ្លេសបានប្រកាសផ្តល់ប្រាក់១០លានផោន ឬ ស្មើនឹងជិត ១៣លានដុល្លារ សម្រាប់ជួយសង្គ្រោះ ដល់ប្រជាជនមីយ៉ាន់ម៉ា ដែលកើតមានការរញ្ជួយដីកម្លាំង៧.៧ រិចទ័រ ស្លាប់មនុស្សយ៉ាងតិច ១,៦០០នាក់។

កាលពីថ្ងៃសៅរ៍ ការិយាល័យបរទេស របស់ចក្រភពអង់គ្លេស បានចេញសេចក្តីថ្លែងការណ៍មួយ បញ្ជាក់ឲ្យដឹងថា «ការផ្តល់មូលនិធិ របស់ចក្រភពអង់គ្លេសនេះនឹងបង្កើនការគាំទ្រ នៅក្នុងតំបន់ដែលរងគ្រោះ ខ្លាំងបំផុត ពីការរញ្ជួយដី និង ឆ្ពោះទៅរកការផ្គត់ផ្គង់ស្បៀងអាហារ ទឹក ថ្នាំពេទ្យ និង ទីជម្រក»។

រដ្ឋមន្ត្រីក្រសួងអភិវឌ្ឍន៍អង់គ្លេស លោកស្រី Jennifer Chapman បាននិយាយថា «ដៃគូក្នុងស្រុកដែលផ្តល់មូលនិធិ ដោយចក្រភពអង់គ្លេស កំពុងប្រមូលផ្តុំគ្នា ដើម្បីការឆ្លើយតប ផ្នែកមនុស្សធម៌ រួចរាល់ហើយ»។ លោកស្រី បានបន្ថែមថា «ខ្ញុំសូមសម្តែងការអាណិតអាសូរ យ៉ាងជ្រាលជ្រៅ ដល់ប្រជាជនមីយ៉ាន់ម៉ា បន្ទាប់ពីព្រឹត្តិការណ៍ ដ៏សោកនាដកម្មនេះ៕

ប្រភពពី AFP ប្រែសម្រួល៖ សារ៉ាត