(ភ្នំពេញ)៖ មជ្ឈមណ្ឌលផលិតភាពជាតិ ដើម្បីផ្សព្វផ្សាយការអនុវត្តន៍ឧត្តមភាពធុរកិច្ច ដល់ម្ចាស់សហគ្រាស និងក្រុមហ៊ុននៅកម្ពុជា បានរៀបចំសន្និសិទស្តីពី «ក្របខណ្ឌឧត្តមភាពធុរកិច្ច» ដើម្បីឲ្យអនុវត្តកាន់តែប្រសើរឡើងផ្នែកសេវាកម្ម និងផលិតកម្ម។ វេទិការនេះ បានរៀបចំឡើងដោយមានការសហការពីអង្គការផលិតភាពអាស៊ី (APO) ដែលដឹកនាំដោយ ឯកឧត្តម ភោគ សុវណ្ណរិទ្ធ រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នៅថ្ងៃទី២៨ ខែមីនា ឆ្នាំ២០២៥ នៅទីស្តីការក្រសួង ដោយមានសិក្ខាកាមចូលរួមចំនួន ៧០នាក់ មកពីក្រុមហ៊ុន សហគ្រាស ផ្នែកសេវាកម្ម ផលិតកម្ម សមាគមន៍។

ឯកឧត្តម ភោគ សុវណ្ណរិទ្ធ នៅក្នុងឱកាសនោះ បានថ្លែងថា សន្និសិទនេះ ធ្វើឡើងក្នុងគោលបំណងបណ្តុះបណ្តាលធនធានមនុស្ស ផ្សព្វផ្សាយ និងជំរុញចលនាផលិតភាពនៅក្នុងប្រទេសកម្ពុជាតាមរយៈគម្រោងនានា ។ វេទិការនេះក៏ជាគម្រោងមួយ ដែលបានផ្តល់នូវអ្នកជំនាញបច្ចេកទេស ដោយអង្គការ APO ដើម្បីបណ្តុះបណ្តាលដល់មន្រ្តីមជ្ឈ មណ្ឌលផលិតភាពជាតិ ក្រុមហ៊ុន សហគ្រាស ឲ្យបានដឹងថា អ្វីទៅជាឧត្តមភាពធុរកិច្ច Business Excellence Framwork ដែលបានធ្វើបទបង្ហាញដោយ លោក George wong ជាអ្នកជំនាញការជនជាតិសង្ហបុរី ក្នុងការចែករំលែកនូវបទពិសោធន៍ ។

អ៊ុ សេរីវុទ្ធ ប្រធានមជ្ឈមណ្ឌលផលិតភាពជាតិនៃកម្ពុជា នៅជាមួយគ្នានោះបានថ្លែងផងដែរថា សន្និសិទនេះ បានផ្សព្វ ផ្សាយការអនុវត្តន៍ឧត្តមភាពធុរកិច្ច ទៅដល់ម្ចាស់សហគ្រាស ឲ្យយល់ដឹងពីការអនុវត្តន៍ល្អ ផ្អែកទៅលើឧត្តមភាពធុរកិច្ច ដែលចែកចេញជា ៧ផ្នែក សម្រាប់ធ្វើឱ្យប្រសើរឡើងនូវប្រតិបត្តិការធុរកិច្ច ក្រុមហ៊ុន សហគ្រាសកមន្តសាល សេវាកម្ម អាជីវកម្ម ។

កម្ពុជាដើម្បីជំរុញចលនាផលិតភាព ប្រកបដោយគុណភាព ប្រសិទ្ធភាព បានខិតខំធ្វើកិច្ចការជាច្រើន និងបានចូលជាសមាជិក APO តាំងពីឆ្នាំ២០០៤ ដែលទទួលបានអត្ថប្រយោជន៍ជាច្រើន ដូចជាការផ្តល់ចំណេះដឹងបច្ចេកទេស ការបណ្តុះបណ្តាល និងការអនុវត្តគម្រោងប្រកប ដោយនវានុវត្តន៍ ក្នុងវិស័យផលិតកម្ម សេវាកម្ម និងកសិកម្ម ។ ជាកិច្ចប្រឹងប្រែងក្នុងការងារនេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ បានបង្កើតមជ្ឈមណ្ឌលផលិតភាពជាតិ ជាសេនាធិការ ដើម្បីជំរុញចលនាផលិតភាពជាតិ នៅតាមបណ្តាសហគ្រាសឯកជនជាដៃគូ និងសាកល្បងអនុវត្ត វិធីសាស្រ្តបង្កើនគុណភាព ផលិតភាព ប្រសិទ្ធភាពការងារ តាមរយៈរូបភាព ជាវគ្គបណ្តុះបណ្តាល សិក្ខាសាលា ក៏ដូចជាគម្រោងក្រុមហ៊ុនគម្រូ ដែលបង្កលក្ខណៈឱ្យក្រុមហ៊ុនក្នុងស្រុកអាចរៀនសូត្រពីគ្នាទៅវិញទៅមក និងបញ្ជូនសិក្ខាកាមទៅរៀនសូត្រពីបណ្តាប្រទេសជាសមាជិកចំនួន២០ ដើម្បីអាចឈានទៅបង្កើនសមត្ថភាពប្រកួតប្រជែងថ្នាក់តំបន់ ឬសកលលោក ៕

អត្ថបទ ៖ គង់ សុផុល
រូបភាព ៖ វ៉េង លឹមហួត