បរទេស ៖ រដ្ឋាភិបាលចិនបានប្រកាស ផ្តល់ជំនួយមនុស្សធម៌ ជិត១៤លានដុល្លារ និងថែមទាំងបានបញ្ជូនក្រុមអ្នកជួយសង្គ្រោះ៨២នាក់ ទៅកាន់ប្រទេសមីយ៉ាន់ម៉ា ដែលបានរងគ្រោះពីការរញ្ជួយដីកម្លាំង ៧.៧ រិចទ័រ សម្លាប់មនុស្សជាង១,៦០០នាក់។

វីដេអូពីប្រព័ន្ធផ្សព្វផ្សាយរដ្ឋរបស់ចិន កាលពីថ្ងៃសៅរ៍ បានបង្ហាញ ពីក្រុមអ្នកជួយសង្គ្រោះ និង ជំនួយមនុស្សធម៌ចាំបាច់ ដែលចាកចេញ ទៅកាន់ប្រទេសមីយ៉ាន់ម៉ា។ ទីភ្នាក់ងារជំនួយអន្តរជាតិរបស់ចិន បាននិយាយថា រដ្ឋាភិបាលទីក្រុងប៉េកាំង ក៏នឹងផ្តល់ជំនួយ ដល់ប្រទេសមីយ៉ាន់ម៉ា ចំនួន១០០លានយន់ ឬ ១៣,៨ លានដុល្លារអាមេរិក ដែលជាជំនួយមនុស្សធម៌ សង្គ្រោះបន្ទាន់ ហើយការដឹកជញ្ជូននឹងចាប់ផ្តើម នៅថ្ងៃចន្ទ ស្អែកនេះ។

ជំនួយរបស់ចិនទាំងនេះ ត្រូវបានបង្ហាញ ស្របពេលដែលមានកិច្ចខិតខំប្រឹងប្រែង ផ្តល់ជំនួយជាសាកល សម្រាប់ការសង្គ្រោះដល់ប្រជាជនមីយ៉ាន់ម៉ា ក្នុងនោះ រួមមានទាំង អឺរ៉ុប, អាមេរិក, អង់គ្លេស, ឥណ្ឌា ព្រមទាំង បណ្តាប្រទេសផ្សេងៗទៀត និង ស្ថាប័នអន្តរជាតិធំៗ៕

ប្រភពពី AFP ប្រែសម្រួល៖ សារ៉ាត