បរទេស ៖ កម្មករមីយាន់ម៉ា ដែលរួចផុតពីការស្លាប់ បានរៀបរាប់ពីការបាក់រលំអគារ នៅទីក្រុងបាងកក ប្រទេសថៃ ក្នុងហេតុការណ៍រញ្ជួយដី រងឥទ្ធិពលពីប្រទេសមីយ៉ាន់ម៉ា។

ភ្លាមៗ ក្រោយពេលរត់ចេញក្រៅអគារ ដែលបាក់រលំ លោក Kyaw Lin Htet បានរៀបរាប់ថា លោកពិតជាឈឺចាប់ ពេលឃើញមិត្តភក្តិស្លាប់ក្នុងអគារ។ លោកអះអាងថា លោកពិបាករស់ណាស់ ពេលឃើញមិត្តភក្តិស្លាប់ «វាធ្វើឱ្យខ្ញុំឈឺចាប់បំផុត ខ្ញុំស្លាប់វិញ ប្រសើរជាង»។

កម្មករសំណង់ មីយ៉ាន់ម៉ា មួយរូបទៀត ឈ្មោះ Khin Aung បានប្រាប់ AFP អំពីរបៀប ដែលអគារនេះ បានដួលរលំ។ លោកបានរៀបរាប់ថា «នៅពេលដែលខ្ញុំ ប្តូរវេនធ្វើការ បញ្ចប់នៅម៉ោង ១រសៀល ខ្ញុំបានចេញទៅខាងក្រៅ ដើម្បីយកទឹក ប៉ុន្តែ បងប្រុសរបស់ខ្ញុំ ស្ថិតក្នុងអគារ មុនពេលខ្ញុំចេញទៅក្រៅ»។

លោកបាននិយាយទៀតថា «នៅពេលដែលខ្ញុំចេញទៅខាងក្រៅ បានបន្តិច ខ្ញុំបានឃើញធូលីដីគ្រប់កន្លែង ហើយខ្ញុំគ្រាន់តែ រត់គេចពីអគារ…ខ្ញុំខលតាមវីដេអូ ទៅបងប្រុស និងមិត្តភ័ក្ដិ ប៉ុន្តែ មានតែម្នាក់ លើកទូរស័ព្ទ តែមិនឃើញមុខ ហើយខ្ញុំឮគាត់រត់…នៅពេលនោះ អគារទាំងមូលកំពុងញ័រ ប៉ុន្តែ ខណៈពេលដែលខ្ញុំកំពុងនិយាយ ជាមួយគាត់ ខ្ញុំក៏បានដាច់សេវា ហើយអគារក៏បានដួលរលំ តែម្តង»។

នៅទីក្រុងបាងកក តួលេខផ្លូវការចុងក្រោយបង្ហាញថា មនុស្ស១១នាក់បានស្លាប់, ៣២នាក់រងរបួស និង ៨៣នាក់ បាត់ខ្លួន។ រីឯ តួលេខអ្នកស្លាប់ ព្រោះរញ្ជួយដី ៧.៧ រិចទ័រ នៅមីយ៉ាន់ម៉ាវិញ កើនដល់ជាង១,៦០០នាក់ នេះបើតាមទីភ្នាក់ងារព័ត៌មាន BBC៕

ប្រភពពី AFP ប្រែសម្រួល៖ សារ៉ាត