រដ្ឋបាលរាជធានីភ្នំពេញ ចុងសប្តាហ៍នេះបានរៀបចំ​បន្ថែម​របាំគោះត្រឡោក ល្ខោនយីកេ និងល្បែងលេងកំសាន្តយ៉ាង​ច្រើន​សម្បូរបែប

(ភ្នំពេញ)៖ នៅរាត្រីថ្ងៃសៅរ៍ទី២៩មីនា វេលាម៉ោង៧ ផ្លូវថ្មើរជើង (Walk Street) ភ្នំពេញ មានការសម្តែង​របាំគោះត្រឡោក (របាំប្រពៃណី) ហើយសម្រាប់​ថ្ងៃអាទិត្យ​ទី៣០ មីនា នៅវេលាម៉ោង ៧ ដូចគ្នានេះដែរ រដ្ឋបាលរាជ​ធានី​ភ្នំពេញ រៀបចំឱ្យមានទស្សនីយភាពល្ខោនយីកេ លេង​កំសាន្តផងដែរ ដើម្បីឱ្យបងប្អូនប្រជាពលរដ្ឋ និងភ្ញៀវទេសចរ​បរទេស បានទស្សនាយល់ដឹងកាន់តែច្បាស់ពី របាំប្រពៃណី​របស់ដូនតាខ្មែរយើង។ នេះបើតាមការបញ្ជាក់ឱ្យដឹងពី លោក​ស្រី ដោ សម្ផស្ស នាយិការងរដ្ឋបាល និងជាអ្នកនាំ​ពាក្យសាលារាជធានីភ្នំពេញ​។

គួររំលឹកថា៖ កាលពីសប្តាហ៍ទី៣ ក្រោមការរៀបចំរបស់​ស្ថានទូតសាធារណរដ្ឋឥណ្ឌា ផ្លូវថ្មើរជើង (Walk Street) ភ្នំពេញ បានបង្កើតឱ្យមានទិវាបុណ្យអាហារ ក្រោមកិច្ចសហ​ប្រតិបត្តិការទន្លេមេគង្គ-គង្គា (Mekong Ganga Cooperation Food Festival 2025) ដែលមានស្តង់​លក់អាហាររបស់ប្រទេសជាប់ទន្លេមេគង្គ ចំនួន៥ប្រទេស ដែលមានដូចជាប្រទេសកម្ពុជា ឥណ្ឌា ថៃ មីយ៉ាន់ម៉ា ឡាវ វៀតណាម ចំនួន ១៨ ស្តង់ ដែលបានធ្វើឱ្យផ្លូវថ្មើរជើង (Walk Street) ភ្នំពេញ មានកំណើនមនុស្សទៅដើរលេង​កំសាន្តនិងទស្សនារាប់ម៉ឺនខុសប្លែកពីសប្តាហ៍មុនៗ។

តាមការចង្អុលបង្ហាញពីឯកឧត្ដម ឃួង ស្រេង អភិបាល​នៃគណៈអភិបាលរាជធានីភ្នំពេញ ផ្លូវថ្មើរជើង (Walk Street) តែងបានរៀបចំឱ្យមានការសម្តែង​តន្ត្រីបុរាណ, មហោរី និងរបាំប្រពៃណី, រាំវង់, សៀក​រហ័សកម្ម, ចាបុីសហគមន៍, បណ្ណាល័យចល័ត។ល។ពោលគឺពីមួយសប្តាហ៍ទៅមួយសប្តាហ៍ (Walk Street) តែងមានការផ្លាស់ប្តូររបាំប្រពៃណីជានិច្ច ជាមួយគ្នានេះការ​លក់​ដូរម្ហូបអាហារក៏មានការផ្លាស់ប្តូន៨ងកើនឡើងផងដែរ។

គួរបញ្ជាក់ថា៖ ផ្លូវថ្មើរជើង (Walk Street) ត្រូវបានរដ្ឋបាល​រាជធានី​ភ្នំពេញដាក់ឱ្យដំណើរការសាកល្បង២ថ្ងៃ ក្នុង ១សប្ដាហ៍​គឺថ្ងៃសៅរ៍ និងថ្ងៃអាទិត្យចាប់ពីម៉ោង ៦ល្ងាច​ដល់​ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពី​វិថីបក្សីចាំក្រុង (ផ្លូវលេខ៩៤) រហូតដល់មុខព្រះបរម​រាជវាំង​៕

ដោយ ៖ ហេង សម្បត្តិ+ថេត វិចិត្រន

ហេង សម្បត្តិ
ហេង សម្បត្តិ
ជាការីថត ជាអ្នកយកព័ត៌មាន ក៏ជាអ្នកជំនាញកាត់តវីដេអូ ប្រចាំស្ថានីយវិទ្យុ និងទូរទស្សន៍អប្សរាផងដែរ។ តាមរយៈបទពិសោធន៍ជាច្រើនឆ្នាំលើវិស័យព័ត៌មាន នឹងនាំមកជូនទស្សនិកជននូវព័ត៌មានសម្បូរបែប ប្រកបដោយវិជ្ជាជីវៈ។
ads banner
ads banner
ads banner