ឥណ្ឌាដឹកទាំងសម្ភារៈ, មនុស្ស និងឆ្កែទៅជួយមីយ៉ាន់ម៉ា
បរទេស៖ ក្រសួងការបរទេសឥណ្ឌា បានបង្ហាញពីសម្ភារៈ, ក្រុមអ្នកសង្គ្រោះ និងសត្វឆ្កែរុករក ដែលត្រូវបានបញ្ជូន ដោយយន្តហោះរបស់កងទ័ពអាកាស ចុះចត នៅទីក្រុងយ៉ាំងហ្គោន ប្រទេសមីយ៉ាន់ម៉ា មួយថ្ងៃបន្ទាប់ពីមានការរញ្ជួយដី ៧.៧រ៉ិចទ័រ បណ្តាលឱ្យខូចខាតយ៉ាងទូលំទូលាយ នៅក្នុងប្រទេសនេះ។
ការដឹកជំនួយនេះ បានធ្វើឡើង ក្រោយពេលដែលប្រមុខរបបយោធាមីយ៉ាន់ម៉ា លោក Min Aung Hlaing បានចេញសេចក្តីអំពាវនាវដ៏កម្រមួយ សុំជំនួយអន្តរជាតិ ដោយបង្ហាញពីភាពធ្ងន់ធ្ងរនៃគ្រោះមហន្តរាយ ដែលបានសម្លាប់មនុស្សជាង ១,៦០០នាក់ហើយ។
រដ្ឋមន្ត្រីការបរទេសឥណ្ឌា បាននិយាយថា យន្តហោះដឹកជញ្ជូនយោធា C-130 បានដឹកសម្ភារអនាម័យ ភួយ អាហារ និងសម្ភារចាំបាច់ផ្សេងៗទៀត។ យន្តហោះរបស់កងទ័ពអាកាសឥណ្ឌា ពីរគ្រឿងទៀត ដឹកអ្នកឯកទេសស្វែងរក និងជួយសង្គ្រោះចំនួន៨០នាក់ និងសត្វឆ្កែរុករក មួយក្រុម រួមជាមួយសម្ភារៈសង្គ្រោះ ជាច្រើនទៀត។
នាយករដ្ឋមន្ត្រីឥណ្ឌាបានសរសេរក្នុងសារ បង្ហោះលើបណ្តាញសង្គមថា “ក្នុងនាមជាមិត្តជិតស្និទ្ធ និងជាអ្នកជិតខាង ឥណ្ឌាឈរក្នុងសាមគ្គីភាព ជាមួយប្រជាជនមីយ៉ាន់ម៉ា ក្នុងម៉ោង ដ៏លំបាកនេះ”៕
ប្រភពពី AFP ប្រែសម្រួល៖ សារ៉ាត
