(កំពង់ធំ)៖ គោលបំណងនៃកម្មវិធីអប់រំសីលធម៌ គឺដើម្បី​លើក​ស្ទួយ​សីលធម៌ និងចរិយាធម៌របស់សិស្សានុសិស្ស ឱ្យពួកគេយល់ដឹងពីតម្លៃដ៏មានសារៈសំខាន់នៃមាតាបិតា និងលោកគ្រូអ្នកគ្រូ ដែលបានឆ្លងកាត់ការព្យាបាលថែរក្សា និងបង្រៀន ដើម្បីឱ្យមានចំណេះដឹង និងជំនាញក្នុងជីវិត ។

លោក ហ៊ា សារី នាយកសាលាអនុវិទ្យាល័យកំពង់ក្របៅ បានលើកឡើងបែបនេះ ក្នុងកម្មវិធីអប់រំសិស្សានុសិស្សស្តី​អំពីសីលធម៌ និងចរិយាធម៌ ដោយនិមន្តព្រះសង្ឃ២អង្គ និមន្តមកពីវត្តស្លែង ព្រះ ឈឹម ឈ័រ និងព្រះ គណ ចិន្តា បានសម្ដែងអប់រំដល់សិស្សានុសិស្ស អំពីសីលធម៌ ចរិយាធម៌ គុណមាតាបិតា លោកគ្រូអ្នកគ្រូ និងចាស់ព្រឹទ្ធាចារ្យ កាលពីថ្ងៃទី ២៩ ខែមីនា ឆ្នាំ២០២៥ នៅអនុវិទ្យាល័យ​កំពង់ក្របៅ ភូមិស្នែងក្របី សង្កាត់កំពង់ក្របៅ ក្រុងស្ទឹងសែន ខេត្តកំពង់ធំ ។

លោក ហ៊ា សារី លើកឡើងថា សាលាអនុវិទ្យាល័យ​កំពង់​ក្របៅ បានលើកយកប្រធានបទសំខាន់ៗ ដើម្បីអប់រំសិស្សា​នុសិស្ស រួមមាន៖ការស្វែងយល់ពីគុណធម៌ និងចរិយាធម៌ល្អ ។ ការចៀសវាងអំពើអាក្រក់ អាកប្បកិរិយាមិនល្អក្នុងសង្គម ។ ការលះបង់អំពើអបាយមុខ ពិសេសគ្រឿងញៀន ដែល​បំផ្លាញខ្លួនឯង និងសង្គម ។ ការគោរពច្បាប់ចរាចរណ៍ផ្លូវ​គោក។

ព្រះសង្ឃ ឈឹម ឈ័រ បានឲ្យដឹងថា សិស្សានុសិស្សគួរតែខិត​ខំសិក្សារៀនសូត្រ ឱ្យមានសមត្ថភាព ពីព្រោះការអប់រំគឺ​កន្លែង​ចាប់ផ្តើមនៃការអភិវឌ្ឍន៍បុគ្គល និងសង្គម។ ព្រះអង្គបានអប់រំសិស្សឱ្យចេះគោរពឪពុកម្ដាយ លោកគ្រូអ្នកគ្រូ និងធ្វើខ្លួនឱ្យក្លាយជាសិស្សល្អ និងពលរដ្ឋល្អ។

កម្មវិធីនេះមានការចូលរួមពីលោកគ្រូអ្នកគ្រូចំនួន ៨នាក់ (ស្រី ៣នាក់) គណៈកម្មការទ្រទ្រង់សាលា ចាស់ព្រឹទ្ធាចារ្យ និងមាតាបិតា ២០នាក់ (ស្រី ១២នាក់) និងសិស្សានុសិស្ស​សរុប ៩០នាក់ (ស្រី ៤៤នាក់) ៕

ដោយ ៖ ប៊ុនរដ្ឋា