រដ្ឋបាលខេត្តពោធិ៍សាត់ត្រៀមអបអរបុណ្យចូលឆ្នាំថ្មី ប្រពៃណីជាតិឱ្យបានមហោឡារឹក
ពោធិសាត់៖ក៏ដូចជាបណ្ដាខេត្តផ្សេងៗដែរ ខេត្តពោធិ៍សាត់ដែលជាខេត្តស្ថិតនៅពាយ័ព្យប្រទេសចម្ងាយជាង៣០០គីឡូម៉ែត្រពីរាជធានីភ្នំពេញបានត្រៀមរៀបចំពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្ដស័ក ព.ស២៥៦៨ ដែលនឹងប្រព្រឹត្តទៅនៅថ្ងៃទី១៤ ១៥ និង១៦ ខែមេសា ឆ្នាំ២០២៥ខាងមុខឱ្យបានមហោឡារឹក ។
កាលពីចុងសប្ដាហ៍កន្លងទៅលោក គិត សុផា អភិបាលរងខេត្ត តំណាងឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំកិច្ចប្រជុំត្រៀមរៀបចំពិធីបុណ្យចូលឆ្នាំថ្មី ប្រពៃណីជាតិខ្មែរនៅសាលប្រជុំសាលាខេត្ត។
តាមសេចក្ដីសម្រេចរបស់រដ្ឋបាលខេត្តពោធិ៍សាត់ ចុះថ្ងៃទី២៦ ខែមីនា ឆ្នាំ២០២៥ ត្រូវបានបង្កើតគណៈកម្មការខេត្ត រៀបចំពិធីបុណ្យចូលឆ្នាំថ្មី ប្រពៃណីជាតិខ្មែរ ដែលមានឯកឧត្តម ខូយ រីដា អភិបាលខេត្ត ជាប្រធាន និងអនុគណៈកម្មការចំនួន៥ទៀត សម្រាប់ជាជំនួយការដល់គណៈកម្មការខាងលើ ក្នុងនោះមានអនុគណៈកម្មការខ្លឹមសារនិងពិធីការ, អនុគណៈកម្មការសិល្បៈល្បែងប្រជាប្រិយនិងពិព័រណ៍, អនុគណៈកម្មការរៀបចំសោភណភាព និងអនាម័យបរិស្ថាន, អនុគណៈកម្មការចំណូលចំណាយ និងអនុគណៈកម្មការសន្តិសុខ សណ្ដាប់សាធារណៈ ដែលមានអភិបាលរងជាសហប្រធាន ប្រធានមន្ទីអង្គភាព និងអភិបាលក្រុងស្រុក ជាអនុប្រធាននិងសមាជិក។
តាមកម្មវិធីគ្រោងទុករដ្ឋបាលខេត្តនឹងរៀបចំសង្ក្រាន្តឆ្នាំថ្មី ដោយមានការប្រគំតន្ត្រី ការលេងល្បែងប្រជាប្រិយ ការសម្ដែងរបាំបុរាណសម័យរបស់យុវជនយុវតី ការបាញ់កាំជ្រួច ការដាក់តាំងពិព័រណ៍ភូមិមួយផលិតផលមួយ ការរៀបចំសោភណភាព អនាម័យក្រុង ការការពារសន្តិសុខ សណ្ដាប់ធ្នាប់សង្គម សម្រួលចរាចរណ៍ ត្រៀមរថយន្ដសង្គ្រោះនិងរថយន្ដពន្លត់អគ្គិភ័យជាដើម។
លោក គិត សុផា បានរំលឹកដល់អនុគណៈកម្មការទាំង៥ សហការគ្នា អនុវត្តដោយការទទួលខុសត្រូវខ្ពស់ ក្នុងការរៀបចំពិធីបុណ្យចូលឆ្នាំថ្មី ប្រពៃណីជាតិខ្មែរក្រោមម្លប់នៃសន្តិភាព៕
ដោយ៖ចេង ពុំ
