អន្តរក្រសួង ឯកភាពគ្នាសំដៅផ្តល់សេវាគាប់ចិត្តជូនប្រជាជនកម្ពុជា រួមចំណែកសម្រេចគោលដៅយុទ្ធសាស្រ្តអាទិភាពរបស់រាជរដ្ឋាភិបាល
(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ ក្រសួងសេដ្ឋកិច្ច និងហិរញ្ញវត្ថុ ក្រសួងមហាផ្ទៃ ក្រសួងយុតិ្តធម៌ និងរដ្ឋបាលថ្នាក់ក្រោមជាតិ បានឯកភាពគ្នាលើការជម្រះចេញនូវនីតិវិធីស្មុគស្មាញ និងនីតិវិធីមិនចាំបាច់មួយចំនួន សំដៅផ្តល់សេវាគាប់ចិត្តជូនប្រជាជនកម្ពុជា ។
បន្ទាប់ពីឈានទៅជិតបញ្ចប់ការចុះបញ្ជីដីធ្លីនាពេលឆាប់ៗខាងមុខ ក្រៅពីការបន្តដោះស្រាយវិវាទដីធ្លី ការរក្សាអាយុជីវិតបឹងទន្លេសាប តំបន់រមណីយដ្ឋានអង្គរ និងបញ្ហាចម្រូងចម្រាសក្នុ្ងងបុរី ក្រសួងរៀបចំដែនដី នគរូបនីយកម្ម និងសំណង់ បាននិងកំពុងគិតគូរ និងជំរុញសេវាគាប់ចិត្ត ដែលជាផ្នែកមួយនៃការបង្កើតបរិយាកាសមិនមានវិវាទដែលក្រសួងបានដាក់ចេញ ដោយនៅក្នុងនោះក្រសួងបាន និងកំពុងប្រែក្លាយប្រភេទសេវាសាធារណៈ ឱ្យទៅជាសេវាអនឡាញក្នុងគោលបំណងផ្តល់សេវាគាប់ចិត្តសម្រាប់ ប្រជាជនកម្ពុជាគ្រប់រូប និងពង្រីកបន្ថែមនូវមូលដ្ឋានសេដ្ឋកិច្ច ដើម្បីទ្រទ្រង់ចំណូលចរន្តថវិកាជាតិ និងរួមចំណែកយ៉ាងសំខាន់ ក្នុងការសម្រេចគោលដៅយុទ្ធសាស្រ្តអាទិភាពរបស់ក្រសួងផង និងរាជរដ្ឋាភិបាលផង។
ការឯកភាពគ្នានេះបានធ្វើឡើងនៅកិច្ចប្រជុំអន្តរក្រសួង ពិភាក្សាលើការងារសេវាសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី០១ ខែមេសា ឆ្នាំ២០២៥ ក្រោមអធិបតីភាព ឯកឧត្តមឧបនាយករដ្ឋមន្រ្តី សាយ សំអាល់ រដ្ឋមមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្នាក់ដឹកនាំ អគ្គនាយកដ្ឋាននិងអង្គភាពចំណុះក្រសួង ដនស ក្រសួងសេដ្ឋកិច្ច និងហិរញ្ញវត្ថុ ក្រសួងមហាផ្ទៃ និងក្រសួងយុតិ្តធម៌ និងមន្ទីររៀបចំដែនដី នគរូបនីយកម្ម និងសំណង់ សុរិយោដី រាជធានី-ខេត្ត នាទីស្តីការក្រសួង ។
ជាមួយគ្នានេះ ចំណូលពីសេវាសាធារណៈរបស់ក្រសួង បាននិងកំពុងរួមចំណែកយ៉ាងពេញទំហឹងលើការលើកទឹកចិត្ត និងលើកកម្ពស់ជីវភាពមន្រ្តីអនុវត្តការងារ ដោយធានាបាននូវគុណភាព និងនិរន្តភាពនៃសេវាសាធារណៈ ដែលធ្វើឱ្យស្ថាប័នកាន់តែរឹងមាំ ហើយក៏បាននឹងកំពុងឆ្លើយតបទៅនឹងយុទ្ធសាស្រ្តសមរភូមិទី២របស់ក្រសួង គឺការពូនជ្រំរដ្ឋបាលសាធារណៈទំនើប ឆ្លាតវៃ និងវាងវៃ ។
គួរបញ្ជាក់ថា គោលបំណងនៃកិច្ចប្រជុំនៅថ្ងៃនេះ គឺដើម្បី៖
- ពិនិត្យ និងកែសម្រួលកម្រៃសេវា ស្របតាមស្ថានភាពសេដ្ឋកិច្ចនិងសង្គម
- សម្របសម្រួលនិងជម្រុញក្នុងការពន្លឿននីតិវិធី លើការរៀបចំប្រកាសអន្តរក្រសួងចំនួន៦
- សម្របសម្រួល និងជំនួយបច្ចេកទេស ក្នុងការស្នើសុំបន្ថែមមុខសេវាថ្មី
- ពិនិត្យលើការបែងចែកលើកម្រៃសេវា
យោងតាមប្រកាសអន្តរក្រសួងទាំង៤ សេវាសាធារណៈរបស់ក្រសួង ដ.ន.ស. សរុបមានចំនួនជាង ៤០០ប្រភេទ និងចែកជា ១,១១៦ មុខសេវា ក្នុងនោះ៖
បែងចែកចេញជា៖ (១)សេវាសុរិយោដី, (២) សេវាសំណង់, (៣) សេវាផ្តល់អាជ្ញាបណ្ណ, (៤) សេវាថតចម្លងឯកសារប្លង់, និង (៥) សេវាពិគ្រោះយោបល់ ។
បច្ចុប្បន្ន សេវាផ្តល់ដោយថ្នាក់មន្ទីរដ.ន.ស.ស. រាជធានីខេត្ត មានចំនួន ៦០៨មុខសេវា ក្នុងនោះ សេវាចំនួន ២១មុខសេវា ស្មើនឹង ៣% នៃសេវាសរុប បានដាក់ឱ្យប្រើប្រាស់សេវាអនឡាញ រួមមាន ៖
- សេវាសុរិយោដីមាន ដាក់/ដកហ៊ីប៉ូតែក បញ្ចាំ លក់ផ្តាច់ និងអំណោចផ្តាច់ ទូទាំងប្រទេស (១៤មុខសេវា)
- សេវាសុរិយោដី មានបង្រួមក្បាលដី បំបែកក្បាលដីដោយមិនផ្ទេរ បំបែកលក់ផ្តាច់ បំបែកអំណោយផ្តាច់ បំបែកចំណែកឯកជននៃអគារសហកម្មសិទ្ធិ និងបំបែកកម្មសិទ្ធិទ្រព្យអវិភាគ អនុវត្តសាកល្បងនៅរាជធានីភ្នំពេញ (៧មុខសេវា)។
សូមជម្រាបជូនថា ជាលទ្ធផល ក្រោយការដាក់ឱ្យអនុវត្តនូវសេវា ដាក់/ដកហ៊ីប៉ូតែក បញ្ចាំ លក់ផ្តាច់ និងអំណោចផ្តាច់ ១៤មុខ សេវា នៅទូទាំងប្រទេស កាលពីថ្ងៃទី៧ ខែមករា ឆ្នាំ២០២៥ កន្លងទៅនេះ ការស្នើសុំស្នើសេវាអនឡាញ នៅមន្ទីរ មានចំនួន ២៧, ៨៦៥សំណើ និងបានចំណូលជាង ៣.៧លានដុល្លារអាមេរិក ៕
ដោយ / គ្រី សម្បត្តិ
