រដ្ឋមន្រ្តីក្រសួងព័ត៌មាន ៖ ព័ត៌មានក្លែងក្លាយពិតជាមានគ្រោះថ្នាក់ធ្ងន់បំផុតចំពោះជាតិ និងសង្គម
(ភ្នំពេញ)៖ក្នុងការបើកយុទ្ធនាការប្រឆាំងព័ត៌មានក្លែងក្លាយដោយ«និយាយថាទេចំពោះព័ត៌មានក្លែងក្លាយ»
នៅថ្ងៃទី១ ខែមេសា ឆ្នាំ២០២៥ នេះរដ្ឋក្រសួងមន្រ្តីក្រសួងព័ត៌មាន បានអំពាវនាវ ដល់គ្រប់ភាគី ចូលរួម ប្រយុទ្ធប្រឆាំងព័ត៌មានក្លែងក្លាយ ដែលជាការមួយកំពុងជួបបញ្ហាប្រឈមទាំងកម្ពុជា ក៏ដូចជាបញ្ហាពិភពលោកនាពេលបច្ចុប្បន្ន។
ក្នុងពិធីប្រកាសជាផ្លូវការនៃការបើកយុទ្ធនាការលើកដំបូងយុទ្ធនាការប្រឆាំងព័ត៌មានក្លែងក្លាយនេះ ត្រូវបានក្រសួងព័ត៌មានឱ្យដឹងថាមានការចូលរួមពីសំណាក់ថ្នាក់ដឹកនាំក្រសួងព័ត៌មាន ថ្នាក់ដឹកនាំមន្ទីរព័ត៌មានរាជធានី ខេត្ត ដែលទទួលបន្ទុកការងារព័ត៌មាន អ្នកសារព័ត៌មានជាតិ អ្នកមានឥទ្ធិពលក្នុងបណ្តាញសង្គម ដោយបានចូលរួមផ្ទាល់ និងតាមរយៈប្រព័ន្ធវីដេអូ ប្រមាណជាង១ពាន់នាក់។
ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានបានថ្លែង ដោយចោទសួរថាតើមូលហេតុអ្វីទើបជំរុញឱ្យមានការបើកយុទ្ធនាការដោយ«និយាយថាទេចំពោះព័ត៌មានក្លែងក្លាយ» ដោយឯកឧត្តមរដ្ឋមន្រ្តីបានពន្យល់ថាបច្ចុប្បន្ននេះប្រជាពលរដ្ឋភាគច្រើនបានទទួលព័ត៌មានពីប្រព័ន្ធផ្សព្វផ្សាយបែបទំនើបក្នុងនេះដូចជាបណ្តាញទំនាក់ទំនងសង្គម Instagram Tik Tok Messenger ជាដើម។ ហេតុនេះហើយទើប បង្កើតឱ្យមានការចោទឡើង ទៅលើជំនឿទុកចិត្តនៃការប្រើប្រាស់ប្រព័ន្ធព័ត៌មាន ។ អញ្ចឹង!ដោយសារតែព័ត៌មានពិត និងព័ត៌មានក្លែងក្លាយនៅលាយឡំគ្នា ហេតុនេះហើយទើបបានបង្កើតឱ្យចោទជាសំណួរដែលថាតើព័ត៌មាននោះពិតឬក៏មិនពិត ក្នុងចំណោមអ្នកប្រើប្រាស់ ។ ទាំងអស់នេះហើយបង្ហាញពីអសុវត្តិភាពក្នុងការប្រើប្រាស់របស់ប្រជាពលរដ្ឋ ធ្វើឱ្យពួកគាត់ មានឧបសគ្គជាមួយដែលថាព័ត៌មានដែលកើតមានឡើងនេះពិតឬក៏អត់។
តាមរយៈនេះគឺជាការចាំបាច់ណាស់ដែលក្រសួងព័ត៌មានត្រូវសហការជាមួយភាគីពាក់ព័ន្ធប្រយុទ្ធប្រឆាំងព័ត៌មានក្លែងក្លាយឡើង។
ឯកឧត្តម រដ្ឋមន្រ្តី បានមានប្រសាសន៍ថា”ក្រសួងទើបបានដាក់ចេញនូវវិធានការនៃសន្តិសុខព័ត៌មាន ជូនដល់ប្រជាពលរដ្ឋខ្មែររបស់យើង។ដោយក្នុងនេះផ្តោតសំខាន់ទៅលើសិទ្ធទទួលបានព័ត៌មាន របស់ប្រជាពលរដ្ឋ។ទី២គុណភាពព័ត៌មានដែលប្រជាពលរដ្ឋប្រើប្រាស់ និងទី៣គឺសុវត្តិភាពព័ត៌មាន”។
ឯកឧត្តម នេត្រ ភក្រ្តា បានថ្លែងបញ្ជាក់ថាព័ត៌មានក្លែងក្លាយបង្កប៉ះពាល់ខ្លាំង បើទោះបីយើងមើលទៅហាក់ដូចជាមិនសូវសំខាន់ ប៉ុន្តែព័ត៌មានក្លែងក្លាយនេះបានកំពុងបំផ្លាញសង្គមរបស់យើង បើសិនជាយើងមិនមានវិធានការទាន់ពេលវេលាក្នុងការទប់ស្កាត់ទេ។
ព័ត៌មានក្លែងក្លាយបានបំផ្លាញជំនឿទុកចិត្តរបស់ប្រជាជនចំពោះអាជ្ញាធរ ចំពោះអ្នកពាក់ព័ន្ធ ក្រសួងស្ថាប័ននានា ។ព័ត៌មានក្លែងក្លាយនឹងធ្វើឱ្យប្រជាពលរដ្ឋសម្រេចចិត្តខុស ដែលទាំងអស់នេះហើយ បានជះផលអាក្រក់ដល់សង្គមរបស់យើង។
ជាមួយគ្នានេះ រដ្ឋមន្រ្តីក្រសួងព័ត៌មានបានថ្លែងបញ្ជាក់បន្ថែមថា ការអប់រំផ្សព្វផ្សាយទៅដល់សាធារណៈជនឱ្យបានយល់អំពីអ្វីទៅដែលជាព័ត៌មានក្លែងក្លាយ ផលប៉ះពាល់នៃព័ត៌មានក្លែងក្លាយ និងផ្តល់វិធានការការពារខ្លួន គឺជាកិច្ចការងារដែលក្រសួងនឹងធ្វើជាបន្តបន្ទាប់ ទៅមុខ។ក្រសួងក៏បានផ្តោតសំខាន់ទៅលើកិច្ចសហការជាមួយអង្គភាពសារព័ត៌មាន និងកិច្ចសហការជាមួយអន្តរជាតិ ក្នុងក្របខណ្ឌកាទូតព័ត៌មាន ដែលក្រសួងព័ត៌មាននឹងធ្វើកិច្ចការនេះបន្តទៅទៀត។
កន្លងមកក្រសួងបានសហការជាមួយបណ្តាប្រទេសអាស៊ាន បណ្តាប្រទេសក្នុងតំបន់ ដើម្បីចងជាបណ្តាញក្នុងការទប់ស្កាត់ ក៏ដូចជាផ្តល់នូវព័ត៌មានពិតត្រឹមត្រូវ ដើម្បីកាប់បន្ថយនូវព័ត៌មានក្លែងក្លាយ សំដៅធ្វើយ៉ាងណាឱ្យប្រជាពលរដ្ឋក្នុងតំបន់បានទទួលព័ត៌មានពិតប្រាកដ៕
ដោយ ៖ ម៉ាដេប៉ូ
