លោក ឡេង តុង បង្ហាញមោទនភាព បន្ទាប់ពីបំបែកបានកំណត់ត្រាឆ្នាំចាស់ ក្នុងទិវារត់ពាក់កណ្តាលម៉ារ៉ាតុងអន្តរជាតិលើកទី១០
(ខេត្តព្រះសីហនុ )៖ លោក ឡេង តុង អ្នកស្រលាញ់វិស័យកីឡារត់មួយរូបនៅកម្ពុជា ហើយក៏ជាអ្នកចូលរួមយ៉ាងសកម្មក្នុងកម្មវិធីរត់ដើម្បីសប្បុរសធម៌ នៅក្នុងទិវារត់ពាក់កណ្តាលម៉ារ៉ាតុងអន្តរជាតិលើកទី១០ ខេត្តព្រះសីហនុ លើវិញ្ញាសារត់២១គីឡូម៉ែត្រ បានបំបែកកំណត់ត្រាចាស់របស់ខ្លួន កាលពីរត់លើកទី១ ឆ្នាំ២០២៤ ក្នុងថេរៈវេលា២ម៉ោង .១៥នាទី. ខណៈឆ្នាំ២០២៥ ការរត់២១គីឡូម៉ែត្ររបស់លោកមកនៅសល់ត្រឹម១ម៉ោង.៣៩នាទីប៉ុណ្ណោះ ដែលនេះជាការបំបែក ឯកទគ្គកម្ម សាងនូវកំណត់ត្រាថ្មី។
អ្នករត់មកពីភ្នំពេញរូបនេះ បានបង្ហាញមោទនភាពចំពោះការខិតខំប្រឹងប្រែងរបស់លោក និងក្រុមរបស់លោកផ្ទាល់ ។
លោកថា ការបំបែកកំណត់ត្រានេះ វាជាសក្ខីភាពមួយបង្ហាញអំពីការរីកចម្រើននៃសមត្ថភាពរបស់លោក ក្នុងវិស័យកីឡាដែលលោកស្រលាញ់ ។ ទន្ទឹមជាមួយគ្នានោះ លោកដែលជាអ្នករត់សកម្មមួយរូបនៅកម្ពុជា បានកោតសសើរដល់ស្មារតីចូលរួមរបស់ពលរដ្ឋកម្ពុជា គឺបានចូលរួមរត់យ៉ាងច្រើនពីមួយឆ្នាំមួយឆ្នាំ ដែលការចូលរួមនេះ វាជាស្មារតីស្រលាញ់ចំពោះសុខភាព និងកាត់បន្ថយនូវជំងឺមិនឆ្លងមួយចំនួនផងដែរ។
ក្នុងនាមលោកជាអ្នករត់តំណាងពលរដ្ឋកម្ពុជា លោក សូមលើកសសើរ គណៈកម្មាធិការជាតិអូឡាំពិកកម្ពុជា ដែលបានរៀបចំព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិលើកទី១០នៅខេត្តព្រះសីហនុបានយ៉ាងល្អទាំងការបិទផ្លូវនិងការការពារសុវត្ថិភាពអ្នករត់គ្រប់រូប។
ជាមួយគ្នានោះ លោក បានអំពាវនាវឱ្យប្រជាពលរដ្ឋនិងយុវជនងាក់មកចូលរួមក្នុងកម្មវិធីរត់នេះឱ្យបានច្រើន ព្រោះវាមិនត្រឹមតែជួយដល់សុខភាពប៉ុណ្ណោះនោះទេ ។ វាថែមទាំងជួយផ្សព្វផ្សាយអំពីវិស័យរត់របស់កម្ពុជាទៅកាន់ភ្ញៀវអន្តរជាតិឱ្យចាប់អារម្មណ៍មករត់នៅនៅកម្ពុជានាថ្ងៃអនាគតកាន់តែច្រើនផងដែរ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
