(ភ្នំពេញ)៖លទ្ធផលនែការដំណើរការកសាងផ្លូវក្រវាត់ព្រំដែន​យៈពេលប្រមាណ៥ខែកន្លងមកនេះ គឺសម្រេចបានប្រមាណ ៣៩,៩២ភាគរយ នៃផែនការ ក្នុងនោះ ខេត្តមណ្ឌលគិរី បាន​ប្រវែង ៤៤,៩០ គីឡូម៉ែត្រ ស្មើនឹង ៤២,៤៥ភាគរយ និង​ខេត្តរតនគិរី បានប្រវែង ៣០,៣០ គីឡូម៉ែត្រ ស្មើនឹង ៣៤,២៦ភាគរយ។

បើយោងតាមសេចក្តីប្រកាសរបស់ក្រុមការងារចំពោះកិច្ចគ្រប់គ្រង​មូលនិធិកសាង ហេដ្ឋារចនាសម្ព័ន្ធតាមព្រំដែន ដោយ​ផ្តោត​លើ ការកសាងផ្លូវក្រវាត់ព្រំដែនឬហៅថា (ក.គ.ម) បានឱ្យដឹងនៅថ្ងៃទី១ ខែមេសា ឆ្នាំ ២០២៥ថាក្នុងខេត្តទាំង ២នេះ​ដែរគេបានឈូសព្រៃទទឹង ៥ ម៉ែត្រ បានប្រវែង ១១០ គីឡូម៉ែត្រ សម្រាប់រកផ្លូវខ្សែដំបូង, ឈូសផ្លូវទទឹង ២០ម៉ែត្រ បានប្រវែង ១០៣,៨៥ ម៉ែត្រ សម្រាប់រកអ័ក្សផ្លូវ, លុប​ជ្រ​លង-អូរ បន្ទាបចំណោតភ្នំ និងធ្វើប្រឡាយបាន ប្រវែង ១០០,៥០ គីឡូម៉ែត្រ, កសាងតួផ្លូវ និងចិតជញ្ជាំងភ្នំ បានប្រ​វែង ៩៩,១០ គីឡូមែត្រ និងក្រាលល្បាយ កម្ទេចថ្ម​សម្រេច​ជាស្ថាពរប្រវែង ៧៥,២០ គីឡូម៉ែត្រ។

ប្រភពដដែលនេះបានឱ្យដឹងបន្ថែមថាក្រុមការងារចំពោះកិច្ច ក.គ.ម បានចាត់បញ្ជូនកម្លាំងវិស្វកម្មកសាងផ្លូវ ចំនួន ៨ កង​ឯក​ភាព ដោយប្រើប្រាស់ រថយន្ត-គ្រឿងចក្រ និងម៉ាស៊ីន​គ្រប់​ប្រភេទ ចំនួន ២៨៦គ្រឿង ក្នុងនោះនៅខេត្តមណ្ឌលគិរី មាន ៥ កងឯកភាព ប្រើប្រាស់រថយន្ត-គ្រឿងចក្រ និង​ម៉ាស៊ីន​គ្រប់ប្រភេទ ចំនួន ២០០ គ្រឿង និងខេត្តរតនគិរី មាន ៣កងឯកភាព ប្រើប្រាស់រថយន្ត-គ្រឿងចក្រ និង​ម៉ាស៊ីន​គ្រប់ប្រភេទ ចំនួន ៨៦គ្រឿង។

សេចក្តីប្រកាសដដែលនេះបានឱ្យដឹងដែរថាចំពោះការងាររាវរកគ្រាប់មីន-យុទ្ធភណ្ឌមិនទាន់ផ្ទុះតាមមុខសញ្ញានៃការដ្ឋាន​ស្ថាបនា​ផ្លូវក្រវាត់ព្រំដែន ត្រូវបាន សម្រេចជាស្ថាពរលើផ្ទៃដី​ទំហំ ២.៧៥២.៥០០ ម៉ែត្រការ៉េ ស្មើនឹង ៤៤ភាគរយ នៃផ្ទៃ​ដីសរុប ដែលគ្រោងរាវរកទំហំ ៦.២៥០.០០០ ម៉ែត្រការ៉េ ដោយបានរកឃើញគ្រាប់គ្រប់ប្រភេទ ចំនួន ៧៩ គ្រាប់ ក្នុង​នោះ​រួមមាន គ្រាប់ប៊ុមប៊ី (គ្រាប់បែកចង្កោម) ចំនួន ៣៥ គ្រាប់ ៕

ដោយ ៖ ម៉ាដេប៉ូ