(ភ្នំពេញ)៖មន្រ្តីអ្នកនាំពាក្យក្រសួងកសិកម្មបានចេញមក ស្រាយ បំភ្លឺជុំវិញបញ្ហាចេញផ្សាយដោយវិទ្យុមួយនៅ កម្ពុជា ទាក់ទិនទៅនឹងគ្រាប់ស្វាយចន្ទីដែលបានដកស្រង់ពាក្យសម្ដីរបស់ ប្រធានសមាគមស្វាយចន្ទីកម្ពុជា។

ក្នុងសេចក្តីបំភ្លឺនេះ ឯកឧត្តម ឃឹម ហ្វីណង់ មន្រ្តីអ្នកនាំពាក្យ​ក្រសួងកសិកម្មបានបញ្ជាក់នាល្ងាចថ្ងៃទី១ ខែ មេសា ឆ្នាំ ២០២៥ថា កម្ពុជាមិនមានបញ្ហាក្នុងការផ្គត់ផ្គង់គ្រាប់​ស្វាយ​ចន្ទី​កែច្នៃទំហំ ៣០០០តោនក្នុងមួយឆ្នាំនោះទេ។ ក្នុងឆ្នាំ​២០​២៤ យើងផលិតបានគ្រាប់ស្វាយចន្ទី​ស្រស់ជិត ៩០ម៉ឺន​តោន និងបាននាំចេញគ្រាប់ស្វាយចន្ទីកែច្នៃរួចជាង ៣ម៉ឺនតោន។ កម្ពុជានៅសល់សមត្ថភាពកែច្នៃគ្រាប់ស្វាយចន្ទីយ៉ាងហោចណាស់ ៥ម៉ឺនតោនទៀត ដែលនៅមិនទាន់ប្រើប្រាស់ឱ្យអស់​លទ្ធភាពនៅឡើយ គ្មានហេតុផលអ្វីដែលត្រូវព្រួយបារម្ភពី​ការមិនអាចផ្គត់ផ្គង់បរិមាណត្រឹមតែ ៣០០០តោនក្នុងមួយ​ឆ្នាំ ដូចដែលប្រធានសមាគមន៍ចន្ទីកម្ពុជាលោក អួនស៊ី​ឡុត លើកឡើងទេ។

មន្រ្តីអ្នកនាំពាក្យរូបនេះបានធ្វើការពន្យល់ថា”សមត្ថភាពកែច្នៃគ្រាប់ស្វាយចន្ទីអាចនឹងត្រូវបានពង្រីកបានគ្រប់ពេល ប្រសិនបើមានកិច្ចសន្យាធានាទិញច្បាស់លាស់ ក្នុងតម្លៃខ្ពស់ពីទីផ្សារ និងមានផ្តល់ប្រាក់កក់មុន៥០ភាគរយ ដូចដែលបានអះអាងពិតមែន។ ព័ត៌មានបែបនេះគួរតែត្រូវ​បានចែករំលែកដល់អ្នកកែច្នៃទូទៅឱ្យបានទូលំទូលាយ មិនមែនលាក់បាំងមិនផ្សព្វផ្សាយ ហើយបែរជាលើកឡើង​ពីការ​ខ្វះ​ខាតការផ្គត់ផ្គង់ទៅវិញ។

ឆ្លើយតបជុំវិញបញ្ហានេះដែរ មន្រ្តីអ្មកនាំពាក្យក្រសួងកសិកម្ម​បានលើកឡើងថា”មិនមានទិន្នន័យផ្លូវការណាមួយបង្ហាញថា ទិន្នផលគ្រាប់ស្វាយចន្ទីក្នុងឆ្នាំនេះមាន​ការថយ​ចុះដោយ​សារកត្តាអាកាសធាតុឡើយ។ ផ្ទុយទៅវិញ ការវាយតម្លៃ​បឋម​ប​ង្ហាញថា បរិមាណផលសរុបក្នុងឆ្នាំ២០២៥ អាចនឹង​ស្ថិតនៅកម្រិតដដែល ឬមានការកើនឡើងបើធៀបនឹង​ឆ្នាំ២០២៤”។

ឯកឧត្តម ឃឹម ហ្វីណង់បានបញ្ជាក់ថាចំពោះបរិមាណ​នាំចេញជាក់ស្តែងទៅកាន់ទីផ្សារថ្មីនេះនៅមានកម្រិតតិចតួចបំផុត។ ទិន្នន័យផ្លូវការពីក្រសួងកសិកម្មបង្ហាញថា បរិមាណនាំចេញពិតប្រាកដរបស់ក្រុមហ៊ុននេះមានត្រឹមតែ ២២៦៨គីឡូក្រាម ឬជាង ២តោនប៉ុណ្ណោះ មិនមែន ២០០០តោន ដូចដែលបានផ្សព្វផ្សាយនោះទេ។ការប្រជែងគ្នាទិញគ្រាប់ស្វាយចន្ទីកម្ពុជាពីឈ្មួញអន្តរជាតិមិនបណ្តាលឱ្យទិន្នផលនៃគ្រាប់ស្វាយចន្ទីធ្លាក់ចុះឡើយ។ ការលើកឡើងបែបនេះគឺជាកំហុសទាំងស្រុង និងស្តែងឱ្យឃើញពីការខ្វះខាតការយល់ដឹងឱ្យបានស៊ីជម្រៅពីកត្តាបច្ចេកទេសនិងទីផ្សារនៃដំណាំស្វាយចន្ទី។

ជាមួយការលើកឡើងបែបនេះមន្រ្តីអ្នកនាំពាក្យក្រសួងកសិកម្មក៏បាន អំពាវនាវដល់ប្រព័ន្ធផ្សព្វផ្សាយទាំងអស់ ត្រូវផ្ទៀងផ្ទាត់ព័ត៌មានពីប្រភពផ្លូវការ មុននឹងផលិត ព័ត៌មា​នសម្រាប់ផ្សព្វផ្សាយ ជាជាងពឹងផ្អែកតែ​នៅលើពាក្យសម្ដី​របស់បុគ្គលតែម្នាក់ ដែលលើកឡើងដោយគ្មានភស្តុ​តាង​ច្បាស់លាស់។ ការផ្សព្វផ្សាយដោយគ្មានការត្រួត​ពិនិត្យ​បែបនេះ អាចបង្កឱ្យមានការភ័ន្តច្រឡំ និងប៉ះពាល់​ដល់​ផលប្រយោជន៍បងប្អូនប្រជា កសិករ វិស័យកសិកម្ម និងសេដ្ឋកិច្ចជាតិកម្ពុជា៕

ដោយ ៖ ម៉ាដេប៉ូ