ឯកឧត្តមបណ្ឌិត នួន ដាញ៉ិល ៖ សាងសង់ផ្លូវថ្មី ដើម្បីជំរុញការអភិវឌ្ឍន៍ជនបទ និងបណ្តាញសេដ្ឋកិច្ច
(សៀមរាប)៖ កម្ពុជាទទួលបានសន្តិភាព និងស្ថិរភាពនយោបាយ ក្រោមការដឹកនាំរបស់ សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជា ធ្វើឲ្យប្រទេសជាតិមានការរីកចម្រើន ជាពិសេស ក្រសួងអភិវឌ្ឍន៍ជនបទ បានបន្តលើកកម្ពស់ការស្ថាបនាផ្លូវ ដោយផ្តោតសំខាន់លើភាពធន់នឹងការប្រែប្រួលអាកាសធាតុ និងអាយុកាលប្រើប្រាស់រយៈពេលវែង។
ឯកឧត្តមបណ្ឌិត នួន ដាញ៉ិល រដ្ឋលេខាធិការ ក្រសួងអភិវឌ្ឍន៍ជនបទ បានបញ្ជាក់ថា ផ្លូវថ្មីមួយខ្សែដែលបានបើកការដ្ឋាននេះ តភ្ជាប់ពីឃុំល្វែងឬសី្ស ស្រុកជីក្រែង ខេត្តសៀមរាប ទៅឃុំពពក ស្រុកស្ទោង ខេត្តកំពង់ធំ គម្រោងនេះ ត្រូវបានស្ថាបនាដោយអង្គភាពវិស្វកម្ម សម្តេចអគ្គមហាធម្មពោធិសាល ជា ស៊ីម នៅក្រោមនាយកដ្ឋានវិស្វកម្ម នៃក្រសួងការពារជាតិ ។
ឯកឧត្តម នួន ដាញ៉ិល បានអំពាវនាវដល់អាជ្ញាធរមូលដ្ឋាន ឲ្យសហការយ៉ាងជិតស្និទ្ធ ដើម្បីបំពេញការងារស្ថាបនាឲ្យបានប្រកបដោយគុណភាព និងប្រសិទ្ធភាព ។ ហើយឯកឧត្តម ក៏បានផ្តល់បច្ចេកទេសសំណង់ ដើម្បីធានាឲ្យផ្លូវមានស្ថេរភាព និងប្រើប្រាស់បានយូរ ៕
ដោយ ៖ ប៊ុន រដ្ឋា
