កៀវ ៖ មេដឹកនាំអ៊ុយក្រែន នៅថ្ងៃចន្ទ បានជំរុញឱ្យរុស្ស៊ីទទួលទោសចំពោះឧក្រិដ្ឋកម្មសង្រ្គាមជាង ១៨៣.០០០ ករណី ដែលត្រូវបានចោទប្រកាន់ដោយអ៊ុយក្រែន ចាប់តាំងពីឈ្លានពានរបស់ទីក្រុងមូស្គូនៅឆ្នាំ ២០២២ ដោយនិយាយថា យុត្តិធម៌គឺចាំបាច់ដើម្បីទប់ស្កាត់អំពើអាក្រក់មិនឱ្យរីករាលដាល។

ប្រធានាធិបតីអ៊ុយក្រែន លោក Volodymyr Zelensky បានប្រាប់កិច្ចប្រជុំកំពូលរបស់ក្រុមមន្ត្រីអឺរ៉ុបនៅទីក្រុង Bucha ភាគពាយព្យនៃរដ្ឋធានីកៀវថា ឧក្រិដ្ឋកម្មជាង ១៨៣.០០០ ករណី ក្នុងនោះរួមមានការប្រហារជីវិត ការចាប់រំលោភ និងការធ្វើទារុណកម្ម ដែលពាក់ព័ន្ធនឹងទង្វើរបស់រុស្ស៊ីប្រឆាំងអ៊ុយក្រែន ត្រូវបានកត់ត្រាជាផ្លូវការ។

លោកប្រធានាធិបតី Zelensky បន្ថែមថា ចំនួនសរុបដែលចងក្រងជាឯកសារដោយទីក្រុងកៀវ ចាប់តាំងពីខែកុម្ភៈ ឆ្នាំ ២០២២មក មិនបានរាប់បញ្ចូលទឹកដីអ៊ុយក្រែនភាគច្រើនដែលរុស្ស៊ីកំពុងកាន់កាប់បច្ចុប្បន្នឡើយ។ ផ្អែកតាមអគ្គរដ្ឋអាជ្ញាស្តីទីរបស់អ៊ុយក្រែន លោក Oleksiy Khomenko កងកម្លាំងរុស្ស៊ីបានប្រព្រឹត្តឧក្រិដ្ឋកម្មជាង ៩.០០០ ករណី នៅក្នុងតំបន់ជុំវិញទីក្រុង Bucha រួមទាំងការសម្លាប់ចំនួន ១.៨០០ ករណីផងដែរ។

រហូតមកទល់ពេលនេះ អាជ្ញាធរអ៊ុយក្រែនបានចោទប្រកាន់បុគ្គលចំនួន ១៧៨ នាក់ និងកាត់ទោសមនុស្ស ២១ នាក់។ បើតាមលោក Khomenko អ៊ុយក្រែនកំពុងបន្តធ្វើការជាមួយតុលាការព្រហ្មទណ្ឌអន្តរជាតិ ICC និង ២៥ ប្រទេសផ្សេងទៀតដែលកំពុងធ្វើការស៊ើបអង្កេតផ្ទាល់ខ្លួនរបស់ពួកគេ ហើយថា អ៊ុយក្រែននឹងមិនឈប់ដើរលើផ្លូវនាំអ្នកទទួលខុសត្រូវមករកយុត្តិធម៌ទេ។

ភ្លាមៗ ភាគីរុស្ស៊ីមិនទាន់ធ្វើការអត្ថាធិប្បាយចំពោះការលើកឡើងរបស់លោកប្រធានាធិបតី Zelensky នេះទេ ប៉ុន្តែពីមុនបានបដិសេធថា ទាហានរុស្ស៊ីមិនបានប្រព្រឹត្តអំពើឃោរឃៅអ្វីឡើយ ហើយបានចោទលោកខាងលិចថា មិនអើពើនឹងឧក្រិដ្ឋកម្មរបស់អ៊ុយក្រែន៕

ប្រភព ៖ រ៉យទ័រ ប្រែសម្រួល ៖ ឈឹម ទីណា