តំបន់ឆ្នុកទ្រូ ស្រុកបរិបូរណ៍ត្រូវបាន រៀបចំទទួលស្គាល់ជាសហគមន៍អេកូទេសចរណ៍ឆ្នុកទ្រូ ក្រោមក្របខណ្ឌបណ្ដាញអេកូទេសចរណ៍បឹងទន្លេសាប
(កំពង់ឆ្នំាង)៖ ផ្អែកតាមយុទ្ធសាស្ត្រ បច្ចកោណ របស់រាជរដ្ឋាភិបាល ក្រសួងទេសចរណ៍ បានជំរុញដំណើរការសកម្មភាពទេសចរណ៍ធម្មជាតិនៅទូទាំងប្រទេស ពិសេសនៅតាមបណ្តាភូមិសាស្ត្រ ដែលមានសក្តានុពលផ្នែកទេសចរណ៍។
យុទ្ធសាស្ត្របង្កើតសហគមន៍ អេកូទេសចរណ៍នេះ ត្រូវបានយកចិត្តទុកដាក់តាំងពីសម្ដេចអគ្គមហាសេនាបតីតេជោ ហ៊ុន សែន អតីតជានាយករដ្ឋមន្ត្រី និងបានបន្តមករាជរដ្ឋាភិបាលថ្មី ដឹកនាំដោយ សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានជំរុញបន្ថែម ក្នុងការពង្រីកនិងកែលម្អ ទៅលើវិស័យទេសចរណ៍ និង ទីរមណីយដ្ឋាននានាដែលមានស្រាប់ ក្នុងភូមិសាស្ត្រដែលមានសក្តានុពលទេសចរណ៍។ ជាក់ស្តែង ក្នុងឃុំឆ្នុកទ្រូ ស្រុកបរិបូរណ៌នេះ គឺមានសក្តានុពលផ្នែកទេសចរណ៍យ៉ាងច្រើន ដូចជាវត្តអារាម ព្រៃលិចទឹក ចំការ និងធនធានធម្មជាតិ ដែលជាផ្នែកមួយ ដ៍ទាក់ទាញលើវិស័យទេសចរណ៍ ទើបក្រសួងទេសចរណ៍ យកចិត្តទុកដាក់ជំរុញបង្កើត ឱ្យមានវិស័យទេសចរណ៍ ក្នុងភូមិសាស្រតំបន់ឆ្នុកទ្រូ ក្នុងពេលនេះ ក្រោមកិច្ចសហការ រវាងក្រសួងទេសចរណ៍ មន្ទីរទេសចរណ៍ អាជ្ញាធរភូមិ-ឃុំ ដោយមានការគាំទ្រពីអង្គការសម្ព័ន្ធភាពដើម្បីអភិរក្សធនធានជលផល(FACT) ។
នេះជាប្រសាសន៍លើកឡើងរបស់ លោកបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៅក្នុងកិច្ចប្រជុំរៀបចំនិងទទួលស្គាល់សហគមន៍ អេកូទេសចរណ៍តំបន់ឆ្នូកទ្រូ ក្នុងឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ក្របខណ្ឌបណ្ដាញអេកូទេសចរណ៍បឹងទន្លេសាប កាលពីថ្ងៃទី៣១ ខែមីនា ឆ្នាំ២០២៥ ។
អនុប្រធានមន្ទីរទេសចរណ៍ខេត្តកំពង់ឆ្នាំង លោក នូ ផល្គុន មានប្រសាសន៍ថា ថ្មីៗនេះ មន្ទីរបានប្រជុំផ្សព្វផ្សាយ ស្ដីពីការបង្កើតសហគមន៍អេកូទេសចរណ៍នៅក្នុងតំបន់ឆ្នុកទ្រូនេះ ជាមួយភូមិ-ឃុំ នឹងត្រៀមផ្សព្វផ្សាយបន្ថែមទៀត ស្តីពីចំនួនសមាសភាពអនុកម្មការចំនួន ៦ មានដូចជា ផ្នែកដឹកជញ្ជូន,ផ្នែកមគ្គុទេស ផ្នែកផលិតកែច្នៃវត្ថុអនុស្សាវរីយ៍ ផ្នែកចុងភៅ ផ្នែកល្បាត ផ្នែកផ្ទះស្នាក់នៅនិងផ្នែកសន្តិសុខ ដើម្បីឱ្យសហគមន៍ដំណើរការទៅបានល្អ។
លោក យុក សេងឡុង នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផល មានប្រសាសន៍ថា៖ អង្គការ របស់លោកបានចុះជួយឃុំឆ្នុកទ្រូតាំងពីឆ្នាំ២០០៩ លោកសង្ឃឹមថា ៖ ការបង្កើតសហគមន៍អេកូទេ សចរណ៍ឆ្នុកទ្រូ ក្របខ័ណ្ឌបណ្ដាញអេកូទេស ចរណ៍បឹងទន្លេសាប នឹងដំណើរការ បានយ៉ាងរលូន និងទទួលជោគជ័យ លើវិស័យមួយនេះ។
ដោយឡែក មេឃុំឆ្នុកទ្រូ លោក សាំង គឹមស៊ន ជំនួសមុខឱ្យប្រជាពលរដ្ឋ ក្នុងឃុំឆ្នុកទ្រូ ទាំងអស់ សូមថ្លែងអំណរគុណយ៉ាងជ្រាលជ្រៅ ដល់រាជរដ្ឋាភិបាល៦ រដ្ឋមន្ត្រីក្រសួងទេសចរណ៍ និងអង្កការជាដៃគូ ដែលបានជំរុញបង្កើតតំបន់ឆ្នូកទ្រូ ឱ្យក្លាយជាតំបន់ទេសចរណ៍ ក្នុងក្របខណ្ឌបណ្ដាញអេកូទេសចរណ៍បឹងទន្លេសាប ដែលជាផ្នែកមួយយ៉ាងសំខាន់ក្នុងការជួយបង្កើនសេដ្ឋកិច្ចប្រជាពលរដ្ឋក្នុងតំបន់នេះផងដែរ៕
សុខ គឹមសៀន
