ឯកឧត្តមរដ្ឋលេខាធិការ សូ វិសុទ្ធី អញ្ជើញជាអធិបតីក្នុង ជំនួបធុរកិច្ចរវាងក្រុមហ៊ុនបច្ចេកវិទ្យាកម្ពុជា និងក្រុមហ៊ុនបច្ចេកវិទ្យា ម្ចាស់អាជីវកម្ម និងធនាគារឡាវ នៅក្នុងព្រឹត្តិការណ៍ Lao Digital Week 2025
(ប្រទេសឡាវ)៖ ឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍ និង ទូរគមនាគមន៍ (ក.ប.ទ.) កាលពីថ្ងៃទី៣ ខែមេសា ឆ្នាំ២០២៥ បានអញ្ជើញជាអធិបតីក្នុងកម្មវិធីជំនួបធុរកិច្ចរវាងក្រុមហ៊ុនបច្ចេកវិទ្យាកម្ពុជា ជាមួយក្រុមហ៊ុននានា របស់ឡាវ (Cambodia Tech and Startup Showcase Session) នៅក្នុងព្រឹត្តិការណ៍ Lao Digital Week 2025 ដោយមានការចូលរួមពី ក្រសួងបច្ចេកវិទ្យានិងគមនាគមន៍ឡាវ ក្រុមហ៊ុនបច្ចេកវិទ្យា ម្ចាស់អាជីវកម្ម និងធនាគារ ប្រមាណ ១២០នាក់។
កម្មវិធី Cambodia Tech and Startup Showcase Session នេះ សហការរៀបចំដោយ ក.ប.ទ. ក្រសួងបច្ចេកវិទ្យានិងគមនាគមន៍ឡាវ និងស្ថានទូតកម្ពុជាប្រចាំប្រទេស ដើម្បីផ្តល់ឱកាសដល់ក្រុមហ៊ុនបច្ចេកវិទ្យាកម្ពុជារួមមាន៖ Vireak Buntham (VET Digital), VTENH, CheckInMe, PillTech, DelightTech, Morakot Technology បានធ្វើបទបង្ហាញអំពីផលិតផល ថ្នាល និងសេវាឌីជីថល ទៅកាន់ក្រុមហ៊ុននានារបស់ឡាវ ក្នុងវិស័យពាណិជ្ជកម្មតាមប្រព័ន្ធអេឡិចត្រូនិច ដឹកជញ្ជូន ហិរញ្ញវត្ថុនិងធនាគារ សុខាភិបាល -ល-។ ក្នុងគោលបំណងពង្រីកកិច្ចសហប្រតិបត្តិការ និងការតភ្ជាប់ទំនាក់ទំនងភាពជាដៃគូរធុរកិច្ចឌីជីថលរវាងវិស័យឯកជនប្រទេសទាំង២ ដែលរួមចំណែកដល់កំណើនសេដ្ឋកិច្ចទៅវិញទៅមក លើកកម្ពស់កិច្ចសហការ សំដៅលើកទឹកចិត្តដល់ការចូលរួមរបស់វិស័យឯកជននិងដៃគូក្នុងការធ្វើបរិវត្តកម្មឌីជីថលប្រកបដោយប្រសិទ្ធភាព៕
ដោយ ៖ ង៉ាន់ ទិត្យ
