សៀមរាប៖លោកជំទាវបណ្ឌិត កុយ ពិសី កាលពីពេលថ្មីកន្លងទៅនេះ​បាន​អញ្ជើញ​ចូលរួម​សម្ពោធឆ្លងសមិទ្ធផលថ្មីៗនៅ​វត្តលោមព្រលឹង នៅភូមិសន្ទៃ ឃុំដានរុន ស្រុកសូទ្រនិគម ខេត្តសៀមរាប ក្រោមការសាទរពីអាជ្ញាធរដែនដី ព្រះសង្ឃ ប្រជាពលរដ្ឋយ៉ាងច្រើនកុះករ។

សមិទ្ធផលដែលសម្ពោធឆ្លងរួមមាន មហាកុដិមួយខ្នងទំហំ ១៣ម៉ែត្រគុណ ២៥​ម៉ែត្រ,សាលាពុទ្ធិកបឋមសិក្សាមួយខ្នង ទំហំ ១០ម៉ែត្រ គុណ ២៤ម៉ែត្រ មាន​បីបន្ទប់,សាលប្រជុំយុវវ័យមួយខ្នង ទំហំ៨ម៉ែត្រគុណ ៣២ម៉ែត្រ,ផ្លូវលំទទឹង ៤ម៉ែត្រ បណ្តោយ ៣០០ម៉ែត្រសរុបចំណាយចំនួន ២១៩ ២៧៣ ដុល្លារអាមេរិក ដែលបានបរិច្ចាគដោយលោកជំទាវបណ្ឌិត កុយ ពិសី ព្រមទាំងពុទ្ធបរិស័ទ និង​សប្បុរសជនក្នុងនិងក្រៅស្រុក។

វត្តអារាមគឺជាមូលដ្ឋានសំខាន់សម្រាប់អប់រំគុណធម៌ សីលធម៌ និង​ជួយកសាង​សង្គម​ឱ្យសុខសាន្ត។ មហាកុដិ និងសាលា​ពុទ្ធិកសិក្សា គឺជាចំណែកមួយក្នុង​ការលើកស្ទួយព្រះពុទ្ធសាសនា និងថែរក្សា អត្តសញ្ញាណជាតិ។នេះជាការបញ្ជាក់​របស់លោកជំទាវបណ្ឌិត កុយ ពិសី ថ្លែងក្នុងពិធីសម្ពោធឆ្លងសមិទ្ធិខាងលើ។

ក្នុងឱកាសនេះដែរលោកជំទាវក៏បានប្រគេនបច្ច័យ ថវិកា និងអំណោយមួយ​ចំនួនធំសម្រាប់កសាងវត្តបន្ត និងអ្នកចូលរួមទាំងអស់មានប្រជាពលរដ្ឋ លោកគ្រូ អ្នកគ្រូ សិស្សានុសិស្ស ព្រមទាំងក្រុមសិល្បៈល្ខោនបាសាក់ផងដែរ៕
ដោយ៖​ ប៊ុន​ រដ្ឋា