សម្ដេចធិបតី៖ បើ ៤០ឆ្នាំមកនេះ កម្ពុជា គ្មានការរីកចម្រើនសោះ ខ្ញុំមិនចាំបាច់ ធ្វើនាយករដ្ឋមន្ដ្រីទៀតទេ
(តាកែវ)៖ សម្តេចធិបតី ហ៊ុន ម៉ាណែត បានថ្លែងបញ្ជាក់ថា គិតពីឆ្នាំ៨០ជាង មកទល់ពេលបច្ចុប្បន្ន នៅមានភូមិស្រុកណាមួយ គ្មានការអភិវឌ្ឍ ។ សម្តេច មិនជឿសោះ និងថា សម្ដេចមិនបាច់ធ្វើនាយករដ្ឋមន្ត្រីទៀតក៏បានដែរ ប្រសិនបើ ៤០ឆ្នាំមកនេះ កម្ពុជា គ្មានការអភិវឌ្ឍរីកចម្រើនអ្វីសោះ ។ ផ្ទុយទៅវិញ នៅគ្រប់ទីកន្លែងក្នុងប្រទេសកម្ពុជា សុទ្ធតែត្រូវបាន រាជរដ្ឋាភិបាល យកចិត្ដទុកដាក់អភិវឌ្ឍន៍ ហើយការអភិវឌ្ឍ មិនមែនរីកចម្រើនតែនៅភ្នំពេញនោះទេ ពោល គឺនៅគ្រប់កន្លែងនៃប្រទេសកម្ពុជាតែម្ដង ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដថ្លែងដូច្នេះ ក្នុងឱកាសអញ្ជើញជាអធិបតី សម្ពោធផ្លូវជាតិ ៣ខ្សែ ដែលមានតម្លៃ ១៨៨លានដុល្លារសហរដ្ឋអាម៉េរិក រួមមាន៖ ផ្លូវជាតិលេខ៣១ ឆ្លងកាត់តាមភូមិសាស្ត្រខេត្តតាកែវ និងខេត្តកំពត ផ្លូវជាតិលេខ៣៣ ឆ្លងកាត់តាមភូមិសាស្ត្រខេត្តកំពត និងខេត្តកែប ផ្លូវជាតិលេខ៤១ ឆ្លងកាត់តាមភូមិសាស្ត្រខេត្តកណ្តាល កំពង់ស្ពឺ តាកែវ ខេត្តកំពត នាព្រឹកថ្ងៃទី២៩ ខែមេសា ឆ្នាំ២០២៥ នៅស្រុកត្រាំកក់ ខេត្តតាកែវ ក្នុងនោះក៏មានការចូលរួមដោយឯកឧត្តម Wang Wenbin ឯកអគ្គរដ្ឋទូតចិនប្រចាំកម្ពុជាផងដែរ ។
សម្តេចធិបតី បានគូសបញ្ជាក់ថា៖ រយៈពេល ៤០ឆ្នាំមកនេះ ការវិភិវឌ្ឍអ្នកណាថា ខេត្តតាកែវនេះ ក្រទៅៗ ខ្ញុំហ៊ានភ្នាល់ រើសគ្រប់ខេត្តទៅ ឱ្យទៅកន្លែងណាក៏ដោយ ទៅចង្អុលបង្ហាញឱ្យខ្ញុំ ភូមិណាក៏ដោយនៅខេត្តតាកែវឥឡូវនេះ ស្រុកណាក៏ដោយ នៅខេត្តតាកែវ ឱ្យមកចង្អុលឱ្យខ្ញុំមើល បើប្រៀបធៀបពីជំនាន់៨០ មកឥឡូវ គ្មានការរីកចម្រើន ខ្ញុំគិតថា យើងមិនបាច់ធ្វើនាយករដ្ឋ មន្ត្រីទៀតក៏បានដែរ ។
ជាមួយគ្នានេះ សម្តេចធិបតី ហ៊ុន ម៉ាណែត បានថ្ឡែងទៀតថា ពិតណាស់ តម្រូវការនៅតែមាន ប៉ុន្តែប្រសិនបើគិតថា កម្ពុជា រីកចម្រើនតែនៅភ្នំពេញ កន្លែងផ្សេងទៀតគ្មានការអភិវឌ្ឍសោះតែម្តង ឬភូមិណាមួយ គ្មានការអភិវឌ្ឍសោះនោះ ក៏សម្តេចមិនជឿដែរ ៕
ដោយ ៖ ស៊ូ វណ្ណលុក
រូពភាព ៖ វេង លីមហួត និង សួង ពិសិដ្ឋ
