មន្ត្រីពីរក្រសួងអញ្ជើញសាកសួរសុខទុក្ខជនមានពិការភាពភ្នែក ដែលប្រកបមុខរបរផ្នែកម៉ាស្សាដៃទេព នៅខេត្តបាត់ដំបង
បាត់ដំបង៖ បង្ហាញពីការយកចិត្តទុកដាក់ មន្រ្តីជាន់ខ្ពស់ក្រសួងកិច្ចការនារី និងក្រសួងសង្គមកិច្ច អតីតយុទ្ធជននិងយុវនីតិ
សម្បទា បានអញ្ជើញជួបសាកសួរសុខទុក្ខ ដល់ជនមានពិការភាពភ្នែកដែលកំពុងតែប្រកបមុខរបរផ្នែកម៉ាស្សាដៃទេព នៅក្នុងខេត្តបាត់ដំបងក្នុងសប្ដាហ៍នេះនាបរិវេណមន្ទីរសង្គមកិច្ចអតីតយុទ្ធជន និង យុវនីតិសម្បទាខេត្តបាត់ដំបងក្រោមអធិបតីភាពលោកជំទាវ ញ៉ែម មរកត រដ្ឋលេខាធិការ ក្រសួងកិច្ចការនារី និង ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជននិងយុវនីតិសម្បទា ។
លោក ភួង សិទ្ធិ ប្រធានមន្ទីរសង្គមកិច្ច អតីតយុទ្ធជន និង យុវនីតិសម្បទា ខេត្តបាត់ដំបងបានរាយការណ៍ជូនអំពីវឌ្ឍភាពការងាររបស់មន្ទីរដែលបានអនុវត្តក្នុងឆ្នាំ២០២៥រួមមាន ដូចជាការងារអភិវឌ្ឍសុខមាលភាពសម្រាប់ជនរងគ្រោះ និងងាយរងគ្រោះ និងកិច្ចការគ្រួសារ, ការងារសុខុមាលភាពជនពិការ, ការងារស្ដារនីតិសម្បទាអនីតិជននិងការងារអភិវឌ្ឍសុខុមាលភាពមនុស្សចាស់។
ថ្លែងក្នុងឱកាសនោះ ឯកឧត្តម ចាប តូ បានឱ្យដឹងថា កន្លងមកសមាគមតន្រ្តីសំនៀងជនពិការ បានបើកវគ្គបណ្ដុះបណ្ដាលផ្នែកម៉ាស្សាជូនដល់បងប្អូនជនមានពិការភាពជាច្រើននាក់។ក្នុងពេលខាងមុខក្រសួងសង្គមកិច្ច និង ក្រសួងទេសចរណ៍សហការជាមួយសមាគមតន្រ្តីសំនៀងជនពិការ ដើម្បីបើកវគ្គបណ្ដុះបណ្ដាលផ្នែកវិក្រឹត្យការសុខុមាលភាព ផ្នែកម៉ាស្សានិងស្ប៉ា ជូនដល់ជនមានពិការភាពជាលក្ខណៈកម្រិតអាស៊ាន និងដើម្បីជួយបង្កើននូវសមត្ថភាពជំនាញដល់ជនមានពិការភាព ពិសេសធ្វើយ៉ាងណាឱ្យជនមានពិការភាព កាន់តែមានសមត្ថភាពកាន់តែខ្លាំងនិងមានការទទួលស្គាល់ជាលក្ខណៈជាតិ និងអន្តរជាតិ។
ចំណែកលោកជំទាវ ញ៉ែម មរកត រដ្ឋលេខាធិការក្រសួងកិច្ចការនារីបានលើកទឹកចិត្តដល់បងប្អូនមានពិការភាពភ្នែក ដែលកំពុងតែប្រកបមុខរបរផ្នែកម៉ាស្សាចូលរួមរៀនវគ្គបណ្ដុះបណ្ដាលបន្ថែមទៀតដើម្បីពង្រឹងសមត្ថភាព ក្នុងការប្រកបការងារ និងអាជីពមុខរបរទ្រទ្រង់ជីវភាពក្រុមគ្រួសារ។
ក្រោយបញ្ចប់ពិធីសំណេះសំណាលជាមួយបងប្អូនជនមានពិការភាពភ្នែក ថ្នាក់ដឹកនាំ និងក្រុមការងារ បានផ្ដល់នូវអំណោយជាថវិកាមួយចំនួនផងដែរ ៕
អត្ថបទ-រូបភាព៖ អ៊ុក សំអាន បប.
