នាំយកអំណោយរដ្ឋមន្ត្រីសង្គមកិច្ចទៅផ្តល់ជូនមណ្ឌលនានា ,ជនមានពិការភាព និងពលរដ្ឋក្រីក្រ ក្នុងសហគមន៍ ខេត្តបាត់ដំបង
បាត់ដំបង៖ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និង យុវនីតិសម្បទា បានចាត់តំណាងឱ្យនាំយកអំណោយមួយចំនួនទៅផ្តល់ជូនដល់មណ្ឌលនានា ជនមានពិការភាព និងពលរដ្ឋក្រីក្រ ដែលស្ថិតនៅក្នុងសហគមន៍ខេត្តបា
ត់ដំបង។នេះជាអំណោយរបស់ឯកឧត្តម គឹម សន្តិភាព រដ្ឋលេខាធិការក្រសួងយុត្តិធម៌ តាមរយៈឯកឧត្តម ជាសុមេធី ។
ពិធីប្រគល់អំណោយបានប្រព្រឹត្តទៅនៅក្នុងបរិវេណមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបាត់ដំបងកាលពីដើមសប្ដាហ៍នេះក្រោមអធិបតីភាពឯកឧត្តម ចាបតូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជា តំណាងឯកឧត្តមរដ្ឋមន្ត្រី។
លោក ភួង សិទ្ធិ ប្រធានមន្ទីរសង្គមកិច្ច អតីតយុទ្ធជន និង យុវនីតិសម្បទាខេត្តបាត់ដំបង បានឱ្យដឹងថា អំណោយរបស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច គឺជា “មីកញ្ចប់ពិសេស” ហើយត្រូវបាន ផ្ដល់ជូនទៅមណ្ឌលសំចតសង្គមកិច្ច, មជ្ឈមណ្ឌលពិភពនៃក្ដីសង្ឃឹម, មជ្ឈមណ្ឌលបុរីកុមាកំព្រាបាត់ដំបង១, មជ្ឈមណ្ឌលបុរីកុមារកំព្រាបាត់ដំបង២,មជ្ឈមណ្ឌលស្ដារលទ្ធភាពពលកម្មកាយសម្បទា, មជ្ឈមណ្ឌលស្ដារលទ្ធភាពពលកម្មអ្នកជំងឺរបួសខួរឆ្អឹងខ្នង,អង្គការភូមិកុមារ
,គ្រួសារធម៌ ៣០គ្រួសារ នៅឃុំអន្លង់វិល ស្រុកសង្កែ,គ្រួសារក្រីក្រនៅស្រុកមោងឫស្សី,គ្រួសារក្រីក្រ នៅស្រុកសំឡូត, ក្រុមការងារសង្កាត់ស្លាកែត និង ជនពិការប្រកបមុខរបរម៉ាស្សា និងចាប់សរសៃ។
ឯកឧត្តម ចាប តូ បានគូសបញ្ជាក់ថា ថ្នាក់ដឹកនាំក្រសួងសង្គមកិច្ច និងក្រសួងកិច្ចការនារី ជានិច្ចជាកាលបានយកចិត្តទុកដាក់ និងខិតខំរិះរកគ្រប់មធ្យោបាយដើម្បីជួយដល់ជនមានពិការភាព៕
អត្ថបទ-រូបភាព៖ អ៊ុក សំអាន បប.
