ឯកឧត្តម ឌិត ទីណា បង្ហាញគោលជំហរប្តេជ្ញាបន្តជំរុញចលនាគាំទ្រឱ្យមានភាពសកម្មបន្ថែមទៀតនូវការងារមនុស្សធម៌ជួយបងប្អូនដែលជួបទុក្ខលំបាក ប្រកបដោយប្រសិទ្ធភាព
(ខេត្តបន្ទាយមានជ័យ)៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បង្ហាញគោលជំហរប្តេជ្ញាបន្តជំរុញចលនាគាំទ្រឱ្យមានភាពសកម្មបន្ថែមទៀតនូវការងារមនុស្សធម៌ជួយបងប្អូនដែលជួបទុក្ខលំបាក ប្រកបដោយប្រសិទ្ធភាព។
ឯកឧត្តម ប្រធានក្រុមការងារបានសម្តែងនូវការកោតសរសើរ និងវាយតម្លៃខ្ពស់ចំពោះភាពសកម្ម និងលទ្ធផលការងារ ដែលគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យសម្រេចបាននាពេលកន្លងមក ក្នុងការជួយដល់ប្រជាពលរដ្ឋរងគ្រោះដោយគ្រោះមហន្តរាយផ្សេងៗដូចជា គ្រោះទឹកជំនន់ រាំងស្ងួត ខ្យល់កន្ត្រាក់ ភ្លើងឆេះនិងបញ្ហាប្រឈមផ្សេងៗទៀត។
បើតាមឯកឧត្តម កាកបាទក្រហមកម្ពុជានឹងមិនទុកនរណាម្នាក់ចោលឡើយ និងបានដាក់ពង្រាយដល់គ្រប់ភូមិ-ឃុំទូទាំងខេត្ត ដែលជាសរសៃឈាម ភ្នែភ ស្តែងចេញជាសកម្មភាពជួយប្រជាពលរដ្ឋបានទាន់ពេលវេលា។
ការថ្លែងគូសបញ្ជាក់របស់ ឯកឧត្តមប្រធានក្រុមការងារ ដូចនេះ ក្នុងពិធីប្រារព្ធខួបលើកទី១៦២ អបអរទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០២៥ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» កាលពីថ្ងៃទី០៨ ខែឧសភា ឆ្នាំ២០២៥ ក្រោមការអញ្ជើញចូលរួមពី ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និង ឯកឧត្តម អ៊ុ រាត្រី អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ ។
ឯកឧត្តមប្រធានក្រុមការងារ បានសម្តែងក្តីសោមនស្សរីករាយ និងថ្លែងអំណរគុណដឹងគុណដល់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានតែងតាំង ឯកឧត្តមរដ្ឋមន្ត្រី ឌិត ទីណា ជាប្រធានកិត្តិយសសាខាកាកបាទក្រហមកម្ពុជា ខេត្តបន្ទាយមានជ័យ។
ឯកឧត្តម ឌិត ទីណា ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានថ្លែងអំណរគុណនូវទឹកចិត្តដ៏ល្អប្រពៃដល់សមាជិក សមាជិកាសប្បុរសជនទាំងអស់ដែលបានចូលរួមយ៉ាងច្រើនអនេក និងបានអំពាវនាវឱ្យបន្តជួយគាំទ្រតទៅមុខបន្ថែមទៀតតាមលទ្ធភាព និងទឹកចិត្ត សំដៅជួយដល់ជនរងគ្រោះ និងជនងាយរងគ្រោះប្រកបដោយបរិយាបន្ន និងជូនពរដល់អង្គពិធីទទួលបានជោគជ័យ សុខសុភមង្គលក្រោមម្លប់សុខសន្តិភាព៕
ប្រភព ៖ ក្រសួងកសិកម្ម
