អភិបាលខេត្តកំពតលើកទឹកចិត្តអាជីវករលក់ដូរចល័តតាមម៉ូតូ ឱ្យរៀបចំតាមរចនាបថខ្មែរដើម្បីទាក់ទាញទេសចរ
កំពត៖ជាខេត្តទេសចរណ៍ដែលមានសក្តានុពលចម្រុះ ខណៈដែលអាជីវករមួយចំនួនបានជ្រើសរើសយកការលក់ដូរចល័តតាមម៉ូតូសណ្ដោង ឬតាមមធ្យោបាយចល័តនានា ឯកឧត្តមអភិបាលខេត្តកំពតបានលើកទឹកចិត្តដល់អាជីវករទាំងនេះឱ្យកែច្នៃមធ្យោបាយរបស់ខ្លួន ឱ្យមានលក្ខណៈជារចនាបថខ្មែរដែលបង្ហាញពីវប្បធម៌ ប្រពៃណីផង ហើយក៏មានសោភណភាពទាក់ទាញទេសចរផងដែរ ។
ក្នុងជំនួបជាមួយអាជីវករលក់ដូរចល័តតាមម៉ូតកាលពីចុងសប្ដាហ៍នេះឯកឧត្តម ម៉ៅ ធនិន អភិបាលខេត្តកំពត បានថ្លែងសរសើរបងប្អូនអាជីវករដែលប្រកបរបរលក់ដូរចល័តតាមម៉ូតូចំនួន ១៦រទេះ ដែលបានរៀបចំកែលម្អរទេះរបស់ខ្លួនឱ្យមានរចនាបថខ្មែរ តាមការណែនាំរបស់រដ្ឋបាលខេត្ត ក៏ដូចជារដ្ឋបាលក្រុង។តាមរយៈសកម្មភាពនេះឯកឧត្តមក៏បានអំពាវនាវដល់បងប្អូនអាជីវករដទៃទៀតធ្វើការច្នៃប្រឌិត ដូចគ្នានេះដែរ។
ឯកឧត្តមបានបន្តថា រាជរដ្ឋាភិបាលក្រោមការដឹកនាំដ៏ប៉ិនប្រសប់របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា សម្តេចបានជំរុញឱ្យខេត្តដែលមានសក្តានុពលលើវិស័យទេសចរណ៍ ត្រូវខិតខំកែច្នៃ និងអភិវឌ្ឍន៍ដោយធ្វើយ៉ាងណាឱ្យមានភាពទាក់ទាញភ្ញៀវទេសចរ ក្នុងន័យលើកកម្ពស់ជីវភាពរស់នៅរបស់ពលរដ្ឋក្នុងតំបន់។
ឯកឧត្តមអភិបាលខេត្តបានបញ្ជាក់ថា វិស័យទេសចរណ៍នៅខេត្តកំពតត្រូវបានអភិវឌ្ឍន៍ និងកែលម្អជាបន្តបន្ទាប់។ ទន្ទឹមនឹងការអភិវឌ្ឍលើវិស័យទេសចរណ៍នេះ រដ្ឋបាលខេត្តក៏មិនភ្លេចគិតគូរអំពីការប្រកបរបររកស៊ីរបស់ពលរដ្ឋ ដែលប្រើប្រាស់មធ្យោបាយលក់ដូរចល័តតាមម៉ូតូ ដោយកន្លងមករដ្ឋបាលខេត្តបានរៀបចំ និងកែលម្អទីតាំងជាច្រើនកន្លែងក្នុងក្រុងកំពត ដើម្បីផ្តល់ទីតាំងសម្រាប់ការលក់ដូរជូនទៀតផង៕
ដោយ៖ សិលា សារិន
