កំពត៖ភូមិកំពង់សំរោងខាងត្បូង ជាភូមិតូចមួយក្នុងចំណោមភូមិ៣របស់​ឃុំកំពង់សំរោង ស្រុកទឹកឈូ ខេត្តកំពត ប៉ុន្តែ​ភូមិតូចមួយនេះបានបណ្តុះ​ក្រុមកីឡាបាល់ទាត់ចំនួន៩ក្រុមនៅឆ្នាំ២០២៥នេះ។ក្រុមបាល់ទាត់ភូមិនេះ​ទៀតសោត ក៏​ជាម្ចាស់ពានជើង​ឯកមហាជនខេត្តកំពតឆ្នាំ២០២៤ផងដែរ ។គ្រូបង្វឹក និងកីឡាករ បញ្ជាក់ថា នឹងដឹកនាំយុវជន និងក្មេង​ជំនាន់ក្រោយ​លេងកីឡាឱ្យបានកាន់តែល្អ ខណៈសមាជិកក្រុមប្រឹក្សាស្រុកទឹកឈូអះអាងថា​នឹងជួយគាំទ្របន្ថែម​លើការងារ​នេះ។

នៅក្នុងការប្រកួតបាល់ទាល់ជ្រើសរើសជើងឯកប្រចាំភូមិកំពង់សំរោងខាងត្បូង ឃុំកំពង់សំរោង ស្រុកទឹកឈូ កាលពី​រសៀល​ថ្ងៃទី ១១ ខែឧសភា ឆ្នាំ២០២៥នេះ គ្រូបង្វឹក និងកីឡាកររៀមច្បងក្នុងភូមិ បានប្រាប់ឱ្យដឹងថា ដោយសារការ​ស្រឡាញ់​វិស័យកីឡា ស្រឡាញ់សុខភាព ចង់បង្កភាពសប្បាយរីករាយជុំគ្នា  អ្នកភូមិកំពង់សំរោងខាងត្បូងទាំងចាស់ក្មេង បាននាំគ្នាលេងកីឡា ហើយជា​រៀងរាល់ឆ្នាំ តែងតែមានរៀបចំការប្រកួតជ្រើសរើសជើងឯកបាល់ទាត់ប្រចាំភូមិ សម្រាប់​មនុស្សធំ និងកុមារ ខណៈនៅឆ្នាំ២០២៥នេះ មានរហូតដល់៩ក្រុម។

សមាជិកក្រុមប្រឹក្សាស្រុកទឹកឈូ លោក អំ តារា មានមោទនភាពយ៉ាងខ្លាំង ចំពោះប្រជាពលរដ្ឋភូមិកំពង់សំរោងខាងត្បូង ដែលស្រឡាញ់ គាំទ្រ និងនាំគ្នា​លេងកីឡា ហើយបង្កើតជាការប្រកួតជ្រើសរើសជើងឯកប្រចាំភូមិយ៉ាង​សប្បាយរីករាយ និងផុសផុលយ៉ាងដូច្នេះ។ សកម្មភាពនេះជាគំរូល្អ​មួយក្នុង​ការលើកកម្ពស់វិស័យកីឡាកម្ពុជា ដែលបណ្តាភូមិឯទៀត គួរតែយកតម្រាប់តាម។

គួរជម្រាបថា ទោះក្រុមកីឡាបាល់ទាត់ឃុំកំពង់សំរោងមានច្រើន ហើយធ្លាប់​ជាម្ចាស់ពានជើងឯកថ្នាក់ខេត្ត ក៏ពិតមែន ប៉ុន្តែមិនទាន់មានកីឡាករណាម្នាក់ អាចអភិវឌ្ឍន៍ខ្លួន ជាកីឡាករបាល់ទាត់អាជីពនៅឡើយទេ ហើយថ្នាក់ដឹកនាំខេត្ត ក៏ដូចជាស្រុកទឹកឈូ ចង់ឃើញកីឡាករប្រឹងប្រែង ដុសខាត់ទេពកោសល្យ​របស់ខ្លួន ដើម្បីឈានជើងចូលទៅ​លេងឱ្យ​ក្លិបបាល់ទាត់ល្បីរបស់ប្រទេស នាពេលខាងមុខ៕
ដោយ៖ សិលា សារិន