បរទេស៖ សហរដ្ឋអាមេរិក និងចិនបានព្រមព្រៀងគ្នា កាត់បន្ថយការតំឡើងពន្ធ ទៅវិញទៅមក សម្រាប់រយៈពេល៩០ថ្ងៃ មកនៅត្រឹម ១១៥ភាគរយដូចគ្នា ក្នុងនោះ ពន្ធដែលចិនដាក់លើអាមេរិក ធ្លាក់ចុះ១០% ពីពន្ធដំបូង១២៥% ខណៈដែលពន្ធរបស់អាមេរិក លើប្រទេសចិន ធ្លាក់ចុះ៣០% ពីកម្រិតពីមុន ដែលមាន១៤៥% នេះបើតាមការចុះផ្សាយ របស់ទីភ្នាក់ងារព័ត៌មាន cnbc នៅថ្ងៃចន្ទនេះ។

ការឯកភាពគ្នានេះ ត្រូវបានសម្រេច បន្ទាប់ពីមន្ត្រីតំណាងពាណិជ្ជកម្ម របស់សហរដ្ឋអាមេរិក និងចិន បានជួបពិភាក្សាគ្នា នៅក្នុងប្រទេសស្វីស កាលពីចុងសប្តាហ៍។

រដ្ឋមន្ត្រីក្រសួងហិរញ្ញវត្ថអាមេរិក លោក Scott Bessent បាននិយាយ នៅក្នុងសន្និសីទសារព័ត៌មានមួយថា «ភាគីទាំងពីរបានព្រមព្រៀងទម្លាក់ពន្ធ មកត្រឹម ១១៥ភាគរយ» លោកបន្តថា «ការទម្លាក់ពន្ធលើទំនិញនាំចូលទៅវិញទៅមកនេះ បានបន្ថែមភាពសុខដុមរមនា ដល់អ្វីដែលជាដំណើរការវិជ្ជមាន»។

កាសែត CNA បានដកស្រង់សម្តីរបស់ អនុរដ្ឋមន្ត្រីក្រសួងពាណិជ្ជកម្មចិន លោក Li Chenggang ដែលបាននិយាយថា នេះគឺជាដំណឹងល្អ សម្រាប់ពិភពលោក។ ទីផ្សារហិរញ្ញវត្ថុ បានស្ថិតនៅលើគែមនៃសញ្ញារលាយ នៅក្នុងសង្គ្រាមពាណិជ្ជកម្មដ៏ជូរចត់ ក្នុងនោះ រំខានដល់ខ្សែសង្វាក់ផ្គត់ផ្គង់ ការបញ្ឈប់ការងារភ្លាមៗ និងដំឡើងតម្លៃលក់ដុំ រួចទៅហើយ។

យ៉ាងណាមិញ ទាំងភាគីចិន និងអាមេរិក បាននិយាយថា ពួកគេនឹងបន្តការពិភាក្សា ផ្តោតលើគោលនយោបាយសេដ្ឋកិច្ច និងពាណិជ្ជកម្ម បន្ថែមទៀត៕

ប្រភពពី cnbc, cna ប្រែសម្រួល៖ សារ៉ាត