បរទេស៖ រុស្ស៊ីបានបាញ់បង្ហោះយន្តហោះគ្មានមនុស្សបើក ជាង១០០គ្រឿង ចូលទៅក្នុងប្រទេសអ៊ុយក្រែន បន្ទាប់ពី​បញ្ចប់ការសន្ទនាតាមទូរស័ព្ទ រវាងប្រធានាធិបតីអាមេរិក លោក Donald Trump និងលោក Vladimir Putin មេដឹកនាំរុស្ស៊ី នេះបើតាមកងទ័ពអាកាសអ៊ុយក្រែន ចុះផ្សាយដោយទីភ្នាក់ងារព័ត៌មាន ABC News នៅថ្ងៃអង្គារនេះ។

ខណៈដែលពិភពលោកកំពុងរង់ចាំមើល អ្វីដែលលោក Trump បាននិយាយថា ភាគីទាំងពីរ នឹងចរចារកសន្តិភាពភ្លាមៗ ក្រោយការសន្ទនាតាមទូរស័ព្ទ
កងទ័ពអាកាសរបស់អ៊ុយក្រែន បានសរសេរ នៅលើ Telegram ថា កងកម្លាំងរបស់ខ្លួនបានបាញ់ទម្លាក់យន្តហោះគ្មានមនុស្សបើករុស្ស៊ីចំនួន ៣៥គ្រឿង ក្នុងចំណោមយន្តហោះគ្មានមនុស្សបើកចំនួន ១០៨ គ្រឿង ដែលបាញ់ចូលប្រទេសពេញមួយយប់ ហើយ ៥៨ គ្រឿងទៀតបានជាប់គាំង ពេលកំពុងហោះហើរ។ កងកម្លាំងអាកាសបានរាយការណ៍ពីការខូចខាតនៅលើដីនៅក្នុងតំបន់ចំនួនបួន របស់អ៊ុយក្រែន។

យ៉ាងណាមិញ ក្រសួងការពារជាតិរុស្ស៊ី បាននិយាយដែរថា កងកម្លាំងរបស់ខ្លួន ក៏បានបាញ់ទម្លាក់យន្តហោះគ្មានមនុស្សបើករបស់អ៊ុយក្រែន ចំនួន ៨ គ្រឿង ពេញមួយយប់ ដូចគ្នា។

ការវាយប្រហារគ្នានេះ បានកើតឡើង បើទោះបីជាមានការធានាចុងក្រោយ របស់លោក Trump ថា កិច្ចព្រមព្រៀងសន្តិភាពរវាងភាគីទាំងពីរអាចធ្វើទៅបាន បន្ទាប់ពីការហៅទូរស័ព្ទ ជាមួយលោកពូទីន ដែលមានរយៈពេលពីរម៉ោង។ លោក Trump បានប្រាប់អ្នកយកព័ត៌មាន នៅក្នុងការិយាល័យ Oval បន្ទាប់ពីទូរស័ព្ទថា «ខ្ញុំគិតថាអ្វីមួយនឹងកើតឡើង លទ្ធផលដ៏ធំ»៕

ប្រភពពី ABC News ប្រែសម្រួល៖ សារ៉ាត