បាត់ដំបង៖នៅសាលប្រជុំសាលាខេត្តកាលពីថ្ងៃទី២១ ខែឧសភា ឆ្នាំ២០២៥ រដ្ឋបាលខេត្តបាត់ដំបងបានប្រជុំផ្សព្វផ្សាយ​ខ្លឹមសារ​អនុក្រឹត្យលេខ៤៧ អនក្រ.បក ចុះថ្ងៃទី០១ ខែមេសា ឆ្នាំ២០២៥ និងប្រកាសលេខ៤២២១ ប្រក របស់ ក្រសួង​មហាផ្ទៃ ចុះថ្ងៃទី១១ ខែមេសា ឆ្នាំ២០២៥ និងនីតិវិធីនៃការចុះបញ្ជីស្នាក់នៅ​ប្រគេនដល់ព្រះសង្ឃ។

កិច្ចប្រជុំបានប្រព្រឹត្តទៅក្រោមអធិបតីភាពឯកឧត្តម សុខ លូ អភិបាលខេត្ត​បាត់ដំបង ដោយមានការនិមន្តចូលរួម​ពីព្រះ​សង្ឃ ចូលរួមពីអភិបាលរងខេត្ត នាយករដ្ឋបាលសាលាខេត្ត ប្រធានមន្ទីរ អង្គភាព ថ្នាក់ដឹកនាំកងកម្លាំងប្រដាប់​អាវុធ អភិបាលក្រុង ស្រុក អធិការក្រុងស្រុក មន្រ្តីរាជការ មេឃុំចៅសង្កាត់ ស្មៀនឃុំ សង្កាត់ និងនាយប៉ុស្តិ៍នគរបាលរដ្ឋបាលឃុំ-សង្កាត់។

កិច្ចប្រជុំបានស្តាប់ការធ្វើបទបង្ហាញរបស់មន្រ្តីនគរបាលជំនាញផ្នែកអត្តសញ្ញាណកម្មនៃស្នងការដ្ឋាននគរបាលខេត្តបាត់ដំបងពីខ្លឹមសារអនុក្រឹត្យ ប្រកាសរបស់​ក្រសួងមហាផ្ទៃ និងនីតិវិធីនៃការចុះបញ្ជីស្នាក់នៅប្រគេនព្រះសង្ឃ ។

ឯកឧត្តម សុខ លូ អភិបាលខេត្តបាត់ដំបងបានគូសរំលេចថា អត្តសញ្ញាណ​បណ្ណសញ្ជាតិខ្មែរ ត្រូវផ្តល់ជូនបុគ្គល​ដែលមាន​សញ្ជាតិខ្មែរគ្រប់រូបចាប់ពីអាយុ ១៥ឆ្នាំឡើងទៅ រួមមាន ព្រះសង្ឃ ជនវិបល្លាសស្មារតី ទណ្ឌិត ខណៈកាលពីមុន​មិន​អនុញ្ញាត ហើយទៅថ្ងៃអនាគត នឹងផ្តល់ឱ្យកុមារចាប់ពីអាយុ៥ឆ្នាំឡើងទៅ។ទន្ទឹមនេះក៏ផ្តល់សុពលភាពអចិន្ត្រៃយ៍ ចំពោះ​បុគ្គល ដែលមានអាយុចាប់​ពី៦០ឆ្នាំឡើង។អត្តសញ្ញាណបណ្ណសញ្ជាតិខ្មែរ ជាទម្រង់សន្លឹកប្លាស្ទិក ដែល​ធ្លាប់ប្រើ និងទម្រង់​អេឡិចត្រូនិក ដែលអាចបង្ហាញតាមស្មាតហ្វូន ដោយមិន​បាច់កាន់សន្លឹកប្លាស្ទិក។

ឯកឧត្តមអភិបាលខេត្តក៏បានណែនាំដល់ក្រុមការងារធ្វើអត្តសញ្ញាណបណ្ណប្រគេនព្រះសង្ឃ ត្រូវចុះផ្តល់នៅ​តាមសាលា​គណ សាលាអនុគណ ឬវត្តអារាមដែល​មានព្រះសង្ឃគង់នៅច្រើន។ជាពិសេស តាមពុទ្ធិកសិក្សាគ្រប់កម្រិត ហើយត្រូវ​ដោះ​ស្រាយនូវរាល់បញ្ហាប្រឈមដូចជា ករណីគ្មានសំបុត្រកំណើត ឬសំបុត្រ​បញ្ជាក់កំណើត ឬចេញឯកសារសម្គាល់​ការស្នាក់​នៅជាដើម។

ឯកឧត្តមក៏បានជូនជាយោបល់ថា ការបើកយុទ្ធនាការធ្វើអត្តសញ្ញាណ​បណ្ណសញ្ជាតិខ្មែរ​ប្រគេនព្រះសង្ឃគួរតែចាប់ផ្តើម​ដំបូងនៅវត្តពោធិ៍វាល ពីព្រោះមានព្រះសង្ឃគង់ច្រើន ហើយក៏មានសាលាពុទ្ធិកវិទ្យាល័យអ៊ឹង ធួងផងដែរ៕
អត្ថបទ-រូបភាព៖ អ៊ុក សំអាន ប.ប