ក្លិបអ្នកកាសែតកម្ពុជា និងក្រុមប្រឹក្សាជាតិសារព័ត៌មានថៃរួមគ្នាកាត់បន្ថយការ ផ្សព្វផ្សាយព័ត៌មានដែលប៉ះពាល់ដល់ទំនាក់ទំនងប្រទេសទាំងពីរ
ភ្នំពេញ៖ លោក ពុយ គា ប្រធានក្លិបអ្នកកាសែតកម្ពុជា និងលោក ឆាវ៉ារ៉ុង លីមប៉ាតាម៉ា(Chavarong Limpattamapanee )ប្រធានក្រុមប្រឹក្សាជាតិសារព័ត៌មានថៃ បានជួបពិភាក្សាការងារទ្វេភាគីកាលពីរសៀលថ្ងៃទី២២ ខែឧសភា ឆ្នាំ២០២៥ នៅរាជធានីភ្នំពេញ ដើម្បីពង្រឹងកិច្ចសហប្រតិបត្តិការលើវិស័យព័ត៌មានរវាងប្រទេសទាំងពីរ។
ក្នុងជំនួបនោះលោក ពុយ គា និងលោក Chavarong Limpattamapanee ព្រមទាំងសមាជិកប្រតិភូ បានចែករំលែកព័ត៌មានគ្នាទៅវិញទៅមកពីស្ថានភាពនៃវិស័យសារព័ត៌មានក្នុងប្រទេសទាំងពីរ និងបានពិភាក្សារកយន្តការនានា ដែលភាគីទំាងពីរអាចធ្វើបានក្នុងគោលបំណងជួយទប់ស្កាត់ និងកាត់បន្ថយការផ្សព្វផ្សាយព័ត៌មានដែលធ្វើឱ្យប៉ះពាល់ដល់ទំនាក់ទំនងប្រទេសទាំងពីរ។
ភាគីទាំងពីរក៏បានពិភាក្សា និងពិនិត្យលទ្ធភាពក្នុងការរៀបចំសិក្ខាសាលារួមគ្នាដើម្បីពង្រឹងសមត្ថភាពដល់អ្នកសារព័ត៌មាននៃប្រទេសទាំងពីរ ជាពិសេសការចូលរួមប្រយុទ្ធប្រឆាំងព័ត៌មានក្លែងក្លាយ និងការសម្របខ្លួនឱ្យទាន់ការវិវឌ្ឍនៃយុគសម័យឌីជីថល និងបញ្ញាសិប្បនិម្មិត(AI)។
សូមជម្រាបថា ប្រតិភូក្រុមប្រឹក្សាជាតិសារព័ត៌មានថៃបានមកទស្សនកិច្ចការងាររយៈពេល ៤ថ្ងៃ ដែលមានសមាជិកប្រតិភូមកពីតំណាងស្ថាប័នសារព័ត៌មានធំៗរបស់ប្រទេសថៃចំនួន១១ស្ថាប័ន។
ក្នុងដំណើរបំពេញទស្សនកិច្ចការងារនេះ ប្រតិភូក៏នឹងជួបពិភាក្សាការងារជាមួយអង្គភាពអ្នកនាំពាក្យរាជរដ្ឋាភិបាលកម្ពុជា, តំណាងក្រសួងការបរទេសកម្ពុជា និងឯកឧត្តម ខៀវ កាញារីទ្ធ សមាជិករដ្ឋសភា និងជាអតីតរដ្ឋមន្ត្រីក្រសួងព័ត៌មានកម្ពុជា។ ក្រៅពីនេះ ប្រតិភូ ក៏នឹងទៅទស្សនកិច្ចនៅខេត្តកំពត និងខេត្តកែប ជាពិសេសទៅចម្ការម្រេចក្នុងខេត្តកំពត៕
ដោយ៖ម៉ាដេប៉ូ
រូបថត៖ក្លិបអ្នកាសែតកម្ពុជា
