បាត់ដំបង៖ ឯកឧត្តម សុខ លូ អភិបាលខេត្តបាត់ដំបង និងជា ប្រធានគណៈ​បញ្ជា​ការឯកភាពរដ្ឋបាលខេត្តបានណែនាំ​ដល់គ្រប់មន្ទីរ អង្គភាព និងរដ្ឋបាលក្រុង ស្រុកទាំងអស់ ត្រូវជំរុញការផ្សព្វផ្សាយ និងចូលរួមយុទ្ធនាការ”១ម៉ឺនរៀល ១ម៉ឺននាក់”តាមរយៈការបរិច្ចាគថវិកាតាមរយៈមូលនិធិគន្ធបុប្ផាកម្ពុជា ដើម្បីគាំទ្រ​ដល់មន្ទីរពេទ្យគន្ធបុប្ផាកម្ពុជា។

ឆ្លើយតបនឹងការផ្ដួចផ្ដើមនិងដឹកនាំដោយលោកជំទាវបណ្ឌិត ពេជ ចន្ទមុន្នី ប្រធានកិត្តិយស នៃមូលនិធិគន្ធបុប្ផា​កម្ពុជា បន្តរៀបចំ នូវយុទ្ធនាការ “១ម៉ឺនរៀល ១ម៉ឺននាក់”សម្រាប់ឆ្នាំ២០២៥ក្នុងកិច្ចប្រជុំគណៈបញ្ជាការឯកភាពរដ្ឋបាល ខេត្ត​បាត់ដំបងនាចុងសប្ដាហ៍នេះឯកឧត្តម សុខ លូ អភិបាលខេត្តបាត់ដំបងបាន​ប្រាប់មន្រ្តីចូលរួមក្នុងកិច្ចប្រជុំថា​យុទ្ធនាការ”១​ម៉ឺនរៀល ១ម៉ឺននាក់” មានរយៈ​ពេលពេញមួយខែមិថុនា។ យុទ្ធនាការនេះក្នុងគោលបំណងដើម្បីជំរុញ​ចលនា​កៀរគរ​ថវិកា​សប្បុរសធម៌ ឱ្យកាន់តែផុលផុសនិងសកម្មបន្ថែមទៀតនៅក្នុង​គ្រួសារ​ខ្មែរទាំងមូល។ជាមហាចលនាមនុស្សធម៌របស់ជាតិ និងក្នុងស្មារតី”ខែ្មរជួយខ្មែរ”។ យុទ្ធនាការនេះដើម្បីនាំក្តីសង្ឃឹម និងភាពញញឹម ដល់ទារកនិងកុមារនៅកម្ពុជា។

ក្នុងនាមរដ្ឋបាលខេត្តបាត់ដំបងឯកឧត្តម សុខ លូ បានបញ្ជាក់បន្ថែមថា ការរៀបចំ​យុទ្ធនាការ”១ម៉ឺនរៀល១ម៉ឺននាក់”​​​​ក្នុង​ខែមិថុនាខាងមុខ​ជាការចូលរួមអបអរ​សាទរនៃ “ទិវាកុមារអន្តរជាតិ ១ មិថុនា” ឆាប់ៗខាងមុខងផងដែរ។

បើតាមគេហទំព័រមូលនិធិគន្ធបុប្ផាកម្ពុជា បានរំលេចឱ្យដឹងថា មន្ទីរពេទ្យគន្ធបុប្ផា បានចាប់ផ្តើមដំណើរការឡើងវិញ នៅឆ្នាំ១៩៩២ ក្រោមការគ្រប់គ្រងរបស់​លោក​វេជ្ជបណ្ឌិត បេអាត រិចស្ទ័រ(BEAT Richner)និងក្រោមការដឹកនាំ នៃ ក្រសួងសុខា​ភិបាល​កម្ពុជា។

មន្ទីរពេទ្យគន្ធបុប្ផា បានពង្រីកនិងបន្តអភិវឌ្ឍ និងដើម្បីឆ្លើយតបទៅនឹងតម្រូវ​ការសេវាសុខាភិបាលជាចាំបាច់របស់ទារក និងកុមារនៅកម្ពុជា។បច្ចុប្បន្នមន្ទីរ​ពេទ្យ​គន្ធបុប្ផា មានឧបករណ៍ពិនិត្យនិងវិភាគទំនើបៗដែលអាចធ្វើរោគវនិ
ច្ឆ័យបាន​ច្បាស់លាស់ និងឈានរហូតដល់អាចធ្វើការវះកាត់”បេះដូងចំហរ” ប្រកបដោយប្រសិទ្ធភាពខ្ពស់ ដោយវេជ្ជបណ្ឌិតឯកទេស ជាជនជាតិខ្មែរ។

សូមបញ្ជាក់ថា មន្ទីរពេទ្យគន្ធបុប្ផាត្រូវបានទទួលស្គាល់ជា “មន្ទីរពេទ្យគំរូមួយ” ដែលបានចូលរួមយ៉ាងសកម្មក្នុងការកាត់​បន្ថយអត្រាមរណភាព មាតា កុមារ និងទារក នៅកម្ពុជា។ការពិនិត្យ និង ព្យាបាលកុមារ ប្រកបដោយគុណភាព វិជ្ជាជីវៈ ដោយឥតគិតថ្លៃនិងមិនរើសអើង។ នេះជាគោលការណ៍ដែលបានកំណត់​ដោយលោក វេជ្ជបណ្ឌិត បេអាត រិចស្ទ័រ៕
អត្ថបទ-រូបភាព៖ អ៊ុក សំអាន ប.ប