ឯកឧត្តមអភិបាលខេត្តបាត់ដំបង ទទួលជួបពិភាក្សាការងារជាមួយគណៈប្រតិភូស្នងការដ្ឋាននគរបាលខេត្តច័ន្ទបុរី ប្រទេសថៃ
បាត់ដំបង៖ឯកឧត្តម សុខ លូ អភិបាលខេត្តបាត់ដំបងបានដឹកនាំប្រតិភូស្នងការដ្ឋាននគរបាលខេត្តបាត់ដំបងនិងប្រតិភូស្នងការដ្ឋាននគរបាលខេត្តប៉ៃលិន ទទួលការសម្តែងគួរសមនិងពិភាក្សាការងារជាមួយគណៈប្រតិភូស្នងការដ្ឋាននគរបាលខេត្តច័ន្ទបុរី ប្រទេសថៃដឹកនាំដោយឧត្តមសេនីយ៍ត្រី ផាឌុងសាក់ រក្សាសុខ ស្នងការនៃ ស្នងការដ្ឋាននគរបាលខេត្តច័ន្ទបុរី។
ក្នុងជំនួបដែលធ្វើឡើងនាសាលាខេត្តបាត់ដំបងនៅថ្ងៃទី៣០ ខែឧសភា ឆ្នាំ២០២៥ ឯកឧត្តម សុខ លូ បានមានប្រសាសន៍ថា ប្រទេសកម្ពុជា និងថៃជាប្រទេសភូមិផងរបងជិតខាងជាមួយគ្នា ។ជាក់ស្ដែងខេត្តបាត់ដំបងមានព្រំប្រទល់ជាប់ប្រទេសថៃប្រវែងជាង១៤០គីឡូម៉ែត្រ។ ដូចនេះការរក្សាមិត្តភាព ជាបងប្អូនពិតជាមានសារៈសំខាន់ ដើម្បីបង្កលក្ខណៈឱ្យប្រជាពលរដ្ឋនៃប្រទេសទាំងពីរ បានរស់នៅប្រកបដោយសុខសុវត្ថិភាព សប្បាយរីករាយ។
ឯកឧត្តមអភិបាលខេត្តបាត់ដំបង បានបន្ថែមថា ដោយកត់សម្គាល់ពីទំនាក់ទំនងកិច្ចសហប្រតិបត្តិការល្អ រវាងខេត្តបាត់ដំបងនិងខេត្តប៉ៃលិន ជាមួយខេត្តច័ន្ទបុរី គឺមានភាពល្អប្រសើរ។ភាពល្អប្រសើរកើតចេញពីភាគីនៃខេត្តទាំង២មានការជួបជជែកពិភាក្សាគ្នាយ៉ាងល្អ។ការជួបគ្នាកាន់តែច្រើន នឹងធ្វើឱ្យយើងកាន់តែមានភាពស្និទស្នាលកាន់តែខ្លាំង ។
លោកឧត្តមសេនីយ៍ត្រី ផាឌុងសាក់ រក្សាសុខ បានយល់ស្របដូចការលើកឡើងរបស់ឯកឧត្តមអភិបាលខេត្តបាត់ដំបង។លោកឧត្តមសេនីយ៍បានបញ្ជាក់ថា កងកម្លាំងនគរបាល នៃស្នងការដ្ឋាននគរបាលខេត្តច័ន្ទបុរី បានត្រៀមខ្លួនក្នុងការបង្កើនកិច្ចសហប្រតិបត្តិការល្អ ក្នុងកិច្ចការពារសន្តិសុខ សណ្ដាប់ធ្នាប់រវាងខេត្តភូមិផងជិតខាងគ្នានិងប្រជាជនទាំងពីរ និងរីករាយស្វាគមន៍ដើម្បីបម្រើប្រជាពលរដ្ឋខេត្តបាត់ដំបង ដែលទៅកម្សាន្ត ឬទៅពិនិត្យព្យាបាលជំងឺនៅខេត្តច័ន្ទបុរី ប្រកបដោយសុខសុវត្ថិភាព ។
ក្នុងឱកាសនេះដែរ លោកឧត្តមសេនីយ៍ត្រី ផាឌុងសាក់ រក្សាសុខ បានបង្ហាញពីគម្រោងមួយថា ភាគីថៃគ្រោងទទួលបន្ទុកនឹងរៀបចំឱ្យមានវគ្គបណ្ដុះបណ្ដាលមួយ “ស្ដីពីការបង្រ្កាបអំពើឆបោកតាមអនឡាញ” ដោយមានការចូលរួមនិងដើម្បីទទួលបាននូវការចែករំលែកនិងបទពិសោធន៍ពីគ្នាទៅវិញទៅមក រវាងកម្លាំងនគរបាលខេត្តច័ន្ទបុរី និង កម្លាំងនគរបាលរបស់ខេត្តបាត់ដំបង៕
អត្ថបទ-រូបភាព៖ អ៊ុក សំអាន ប.ប
