អង្គសមាជរដ្ឋសភា និងព្រឹទ្ធសភា ប្រជុំចប់ថ្ងៃទី១ នៅម៉ោង ១២យប់ដោយអនុម័តគាំទ្រលើសេចក្តីសម្រេចចំនួនពីរ
(ភ្នំពេញ)៖ នៅវេលាម៉ោង ១២ និង ២០នាទីយប់ ឆ្លងចូលថ្ងៃទី៣ ខែមិថុនា ឆ្នាំ២០២៥ អង្គសមាជ រដ្ឋសភា និងព្រឹទ្ធសភា បានបញ្ចប់កិច្ចពិភាក្សានៅថ្ងៃដំបូង ដោយអនុម័តគាំទ្រលើសេចក្តីសម្រេចចំនួនពីរ ខណៈសមាជនេះ បានចាប់ផ្ដើមប្រជុំតាំងពីម៉ោង ៨ព្រឹកថ្ងៃទី២ ខែមិថុនា ។
សមាជព្រឹទ្ធសភា និងរដ្ឋសភា នាល្ងាចថ្ងៃទី០២ ខែមិថុនា ឆ្នាំ២០២៥ បានអនុម័តគាំទ្រទាំងស្រុង លើសេចក្តីសម្រេចស្តីពីប្រព័ន្ធគាំពារសង្គម របស់រាជរដ្ឋាភិបាល ក្រោមសំឡេង ១៨១លើ១៨១សំឡេង ។
ជាមួយនេះ សមាជព្រឹទ្ធសភា និងរដ្ឋសភា នៅយប់រំលងអធ្រាត្រចូលថ្ងៃទី០៣ ខែមិថុនា ឆ្នាំ២០២៥ បានអនុម័តគាំទ្រទាំងស្រុងលើសេចក្តីសម្រេចស្តីពី សេដ្ឋកិច្ចក្រៅប្រព័ន្ធ របស់រាជរដ្ឋាភិបាល ក្រោមសំឡេង ១៧៨ លើ១៧៨ សំឡេង ។
តាមគម្រោងនៅម៉ោង ៨ព្រឹកថ្ងៃទី៣ មិថុនា អង្គសមាជរដ្ឋសភា និងព្រឹទ្ធសភា នឹងបន្តប្រជុំពិនិត្យលើវិស័យកសិកម្ម ដែលជាប្រធានបទចុងក្រោយនៃសមាជលើកដំបូងនេះ ។ បន្ទាប់ពីបញ្ចប់សមាជ សម្តេចតេជោ ហ៊ុន សែន នឹងអញ្ជើញធ្វើសន្និសីទសារព័ត៌មានផងដែរ ។
មានប្រសាសន៍លេងសើចបន្លំមែនផងនោះ សម្តេចតេជោ បានគូសបញ្ជាក់ថា ការប្រើពេលវេលាច្រើនម៉ោងក្នុងសមាជនេះ ក៏ជាការសាកល្បងកម្លាំងរបស់ថ្នាក់ដឹកនាំ សមាជិក សមាជិកាព្រឹទ្ធសភា រដ្ឋសភា និងរាជរដ្ឋាភិបាល ផងដែរ ។
សមាជរដ្ឋសភា និងព្រឹទ្ធសភា គឺជាវេទិកាមួយដ៏ល្អ ព្រោះជាការជួបជជែកដេញដោលគ្នាក្នុងន័យកែលំអរវាងព្រឹទ្ធសភា រដ្ឋសភា និងរាជរដ្ឋាភិបាល លើកិច្ចការចាំបាច់ទាំងឡាយរបស់ជាតិ។ ជាពិសេសជាវេទិកាមួយ ដែលសមាជិកព្រឹទ្ធសភា រដ្ឋសភា បានលើកបញ្ហា និងសំណូមពរ ទាំងឡាយទៅកាន់នាយករដ្ឋមន្ត្រី និងសមាជិករាជរដ្ឋាភិបាល ។
សមាជនៃរដ្ឋសភា និងព្រឹទ្ធសភាលើកដំបូង បានប្រព្រឹត្តទៅចាប់តាំងពីម៉ោង៨ព្រឹក ធ្វើឡើងក្រោមអធិបតិភាព សម្តេចតេជោ ហ៊ុន សែន ប្រធានព្រឹទ្ធសភា ដោយមានការអញ្ជើញចូលរួមពីសំណាក់ សម្តេច មហារដ្ឋ សភាធិការធិបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា សមាជិករដ្ឋសភា ព្រឹទ្ធសភា សមាជិកគណៈរដ្ឋមន្ត្រី និងសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
