សមាជរដ្ឋសភា និងព្រឹទ្ធសភា ចាប់ផ្ដើមបន្ដពិភាក្សាប្រធានបទ វិស័យកសិកម្ម ខណៈសមាជថ្ងៃដំបូង បានបញ្ចប់នៅយប់រំលងអធ្រាត្រឈានចូលថ្ងៃទី៣ មិថុនា
(ភ្នំពេញ)៖ សមាជរដ្ឋសភា និងព្រឹទ្ធសភា លើកទី១ បានចាប់ផ្ដើមបន្ដទៀតនាម៉ោង ៨ និង ៣០នាទីព្រឹក ថ្ងៃទី៣ ខែមិថុនា ឆ្នាំ២០២៥ ដែលពិភាក្សាប្រធានបទទាក់ទងនឹងវិស័យកសិកម្ម ក្រោមអធិបតិភាពសម្តេចតេជោ ហ៊ុន សែន ប្រធានព្រឹទ្ធសភា ដោយមានការអញ្ជើញចូលរួម ពីសំណាក់សម្តេចមហារដ្ឋ សភាធិការធិបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា សមាជិកសមាជិកាព្រឹទ្ធសភា ៦០អង្គ/រូប និងរដ្ឋសភា ១១៩អង្គ/រូប ចូលរួម ។
គួរជម្រាបថា សមាជដែលចាប់ផ្ដើមកាលពីព្រឹកថ្ងៃទី២ មិថុនា ជាសមាជយូរបំផុត ដែលធ្វើឡើងរហូតដល់រំលងអធ្រាត្រឈានចូលថ្ងៃទី៣មិថុនា ។ ជាលទ្ធផល សមាជ បានពិភាក្សាលើប្រធានបទចំនួន២ គឺ ប្រព័ន្ធគាំពារសង្គម និងសេដ្ឋកិច្ចក្រៅប្រព័ន្ធ ។
សមាជរដ្ឋសភា និងព្រឹទ្ធសភា គឺជាវេទិកាមួយ នៃការជួបជជែកដេញដោលគ្នា ក្នុងន័យកែលំអរវាងព្រឹទ្ធសភា រដ្ឋសភា និងរាជរដ្ឋាភិបាល លើកិច្ចការចាំបាច់ទាំងឡាយរបស់ជាតិ។ ជាពិសេស ជាវេទិកាមួយ ដែលសមាជិកព្រឹទ្ធសភា រដ្ឋសភា បានលើកបញ្ហា និងសំណូមពរទាំងឡាយទៅកាន់នាយករដ្ឋមន្ត្រី និងសមាជិករាជរដ្ឋាភិបាល ។
សម្តេចតេជោ ហ៊ុន សែន បានប្រកាសថា បន្ទាប់ពីបញ្ចប់សមាជ សម្តេច នឹងអញ្ជើញធ្វើសន្និសីទសារព័ត៌មានផងដែរ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
