(ភ្នំពេញ)៖ ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន ក្នុងពិធីអបអរសាទរទិវាបរិស្ថានជាតិនិងបរិស្ថានពិភពលោក ៥ មិថុនា និងមហាសន្និបាតកសិករថ្នាក់ជាតិលើកទី៣ ក្រោមប្រធនាបទ «ឆ្ពោះទៅសិទ្ធិកសិករ គាំពារសង្គម និងសកម្មភាពបរិស្ថាន» នាព្រឹកថ្ងៃទី០៣ ខែមិថុនា ឆ្នាំ២០២៥ នៅរាជបណ្ឌិតសភាកម្ពូជា បានថ្លែងថាសមិទ្ធផលការងារជាច្រើន បានសម្រេចបានក្នុងវិស័យបរិស្ថាន ដោយក្នុងនោះមានការចូលរួមពីក្រសួង-ស្ថាប័ន ដៃគូអភិវឌ្ឍន៍ វិស័យឯកជន អង្គការសង្គមស៊ីវិល ក្នុងការអនុវត្តការឆ្លើយតបនឹងបញ្ហាបរិស្ថាននិងធនធានធម្មជាតិយ៉ាងមានប្រសិទ្ធភាព។

ឯកឧត្តមអនុរដ្ឋលេខាធិការ បានបន្ថែមថា រាជរដ្ឋាភិបាលកម្ពុជា បានប្តេជ្ញាយ៉ាងមោះមុតក្នុងការដឹកនាំប្រទេស ឆ្ពោះទៅរកអនាគត ដែលមានភាពស្អាត បៃតង និងការអភិវឌ្ឍប្រកបដោយចីរភាព។ យុទ្ធសាស្ត្រចក្រាក្នុងវិស័យបរិស្ថានឆ្នាំ២០២៣-២០២៨ ដែលផ្តោតលើសសរស្តម្ភទាំងបី សំដៅលើកកម្ពស់កិត្យានុភាពរបស់ប្រទេសកម្ពុជា តាមរយៈការតម្រង់ទិស និងការជំរុញការអនុវត្តសកម្មភាពនានា ដើម្បីធ្វើឱ្យកម្ពុជាមានភាពស្អាតជាងមុន បៃតងជាងមុន និងចូលរួមសម្រេចគោលដៅ ដែលជាសេចក្តីប្រាថ្នា ដូចមានចែងក្នុងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា គឺការប្រែក្លាយកម្ពុជា ទៅជាប្រទេសអព្យាក្រឹតកាបូននៅឆ្នាំ២០៥០។

ឯកឧត្តមអនុរដ្ឋលេខាធិកា បានបង្ហាញថា កម្ពុជាបានទទួលស្គាល់ថា ការប្រែប្រួលអាកាសធាតុ បណ្តាលឱ្យមានផលប៉ះពាល់មកលើសុខភាពរបស់មនុស្សជាតិ រួមមានកំណើនសីតុណ្ហភាព រលកកម្តៅ ធ្វើឱ្យប៉ះពាល់ និងកាត់បន្ថយផលិតភាព ក្នុងវិស័យកសិកម្ម ជលផល និងព្រៃឈើ និងផលិតភាពការងារ នៅគ្រប់វិស័យ ការខូចខាតផ្លូវថ្នល់ ការផ្គត់ផ្គង់ទឹក និងហេដ្ឋារចនាសម្ព័ន្ធផ្សេងៗទៀត។ ប៉ុន្តែកម្ពុជាតែងផ្តល់ការគាំទ្រយ៉ាងខ្លាំង ចំពោះសកម្មភាពពហុភាគី លើការដោះស្រាយការប្រែប្រួលអាកាសធាតុ និងបានបង្ហាញការប្តេជ្ញាចិត្តក្នុងការចូលរួមយ៉ាងសកម្មក្នុងកិច្ចខិតខំប្រឹងប្រែងរបស់សហគមន៍អន្តរជាតិ ដើម្បីដោះស្រាយបញ្ហាប្រឈមជាសាកល ដែលទាក់ទងនឹងការប្រែប្រួលអាកាសធាតុ។

ឯកឧត្តម ខ្វៃ អាទិត្យា បានលើកឡើងថា ក្រសួងបរិស្ថាន គ្រោងនឹងប្រារព្វទិវាបរិស្ថានជាតិ និងបរិស្ថានពិភពលោក ក្រោមប្រធានបទ “ប្រយុទ្ធប្រឆាំងការបំពុលដោយប្លាស្ទិក” ដែលប្រធានបទនេះ ត្រូវបានជ្រើសរើសឡើង ស្របតាមបរិបទសកល និងស្ថានភាពជាក់ស្តែងនៅក្នុងប្រទេសកម្ពុជា ដែលកំពុងប្រឈមនឹងបញ្ហាការកើនឡើង នៃសំណល់ប្លាស្ទិក ដែលក្លាយជាបញ្ហាដ៏ធ្ងន់ធ្ងរ ដោយសារតែការកើនឡើងនៃការប្រើប្រាស់ផលិតផលប្លាស្ទិកក្នុងជីវភាពរស់នៅប្រចាំថ្ងៃ។

ការបំពុលដោយប្លាស្ទិកមិនត្រឹមតែប៉ះពាល់ដល់សោភ័ណភាពទីក្រុង និងជនបទប៉ុណ្ណោះទេ តែថែមទាំងបង្កផលប៉ះពាល់យ៉ាងធ្ងន់ធ្ងរដល់បរិស្ថាន ប្រព័ន្ធអេកូឡូស៊ី សុខភាពសាធារណៈ និងសេដ្ឋកិច្ចជាតិផងដែរ។ ការរៀបចំទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៥ ក្រោមប្រធានបទនេះ គឺជាការឆ្លើយតបទៅនឹងបញ្ហាប្រឈមខាងលើ និងជាការអំពាវនាវឱ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ ដើម្បីរួមគ្នាដោះស្រាយបញ្ហាសំណល់ ប្លាស្ទិក និងឆ្ពោះទៅរកការកាត់បន្ថយការបំពុល ដោយប្លាស្ទិកឱ្យបានជាអតិបរមា។

ការរៀបចំប្រារព្ធ “ទិវាបរិស្ថានជាតិ និងបរិស្ថានពិភពលោក ” ៥ មិថុនា ឆ្នាំ២០២៥ ក្រោមប្រធានបទ “ប្រយុទ្ធប្រឆាំងការ បំពុលដោយប្លាស្ទិក” នេះឡើង ក្រោមព្រះរាជាធិបតីភាពដ៏ខ្ពង់ខ្ពស់បំផុត របស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងវត្តមានដ៏វិសេស របស់សម្តេចប្រធានស្ថាប័នកំពូលៗ នៃព្រះរាជាណាចក្រកម្ពុជា ព្រមទាំងសម្តេច ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូត លោក លោកស្រី ភ្ញៀវកិត្តិយសជាតិ អន្តរជាតិទាំងអស់ សិស្ស និស្សិត កងកម្លាំងប្រដាប់អាវុធ និងប្រជាពលរដ្ឋ នៅពហុកីឡដ្ឋានមរតកតេជោ ក្នុងខណ្ឌជ្រោយចង្វារ រាជធានីភ្នំពេញ នាថ្ងៃទី៥ មិថុនា និងព្រមគ្នាជាមួយខេត្តនានាថែមទៀត៕

ដោយ ៖ ម៉ាដេប៉ូ