(ទីក្រុងប៉េកាំង)៖ ឯកឧត្តម អុឹង សុខឧត្តម ទីប្រឹក្សាក្រសួងប្រៃសណីយ៍ ​និង​ទូរគមនា​គមន៍ (ក.ប.ទ.) កាលពីថ្ងៃទី៥ ខែមិថុនា ឆ្នាំ២០២៥បានអញ្ជើញចូលរួមជា​វាគ្មិន​កិត្តិយសក្នុងកម្មវិធីសន្និសីទ “2025 Beijing Cybersecurity Conference” ដែលជាកម្មវិធីកម្រិតអន្តរជាតិលើប្រធានបទ បច្ចេកវិទ្យាបញ្ញាសិប្បនិម្មិត និង សន្តិសុខសាយប័រ និងមានការអញ្ជើញចូលរួមពីអ្នកតំណាងប្រទេស អ្នកជំនាញ​សន្តិសុខសាយប័រ និងគ្រឹះស្ថានសិក្សាស្រាវជ្រាវ មកពីបណ្តាប្រទេសនានា​ដែល​ទទួលបន្ទុក ឬកំពុងសិក្សាស្រាវជ្រាវលើកិច្ចការសន្តិសុខសាយប័រ និង​បញ្ញាសិប្ប​និម្មិត ដើម្បីចែករំលែកពីភាពរីកចម្រើន និងផលលំបាកនានានៃការវិវត្តយ៉ាងឆាប់​រហ័សនៃបច្ចេកវិទ្យាឌីជីថលថ្មីៗ។

ក្នុងកម្មវិធីសន្និសីទនេះដែរ ឯកឧត្តម បានធ្វើបទបង្ហាញពាក់ព័ន្ធ​​លើការរៀបចំ​យុទ្ធ​សាស្ត្រ និងការវិវត្តនៃបច្ចេកវិទ្យាបញ្ញាសិប្បនិម្មិត និងសន្តិសុខសាយប័រ​នៃព្រះ​រាជា​ណា​ចក្រកម្ពុជា ដែលក្នុងនោះរួមមាន (១) ដំណើរការនៃការធ្វើបរិវត្តកម្មឌីជីថលនៅ​ប្រទេសកម្ពុជា (២) ការរៀបចំយុទ្ធសាស្រ្តបញ្ញាសិប្បនិម្មិតថ្នាក់ជាតិ (៣) សារៈ​សំ​ខាន់នៃកិច្ចការសន្តិសុខសាយប័រលើការរីកចម្រើននៃបច្ចេកវិទ្យាបញ្ញាសិប្បនិម្មិត និង (៤) សារៈសំខាន់នៃការពង្រឹង និងពង្រីកកិច្ចសហប្រតិបត្តិការទាំងក្នុងប្រទេស ក្នុង​តំបន់ និងសកលលោកទាំងមូល។

ឯកឧត្តម និងសហការី ក៏បានទទួលផ្តល់បទសម្ភាសន៍ជាមួយ សារព័ត៌មាន CRI-China Radio International លើការវិវត្តថ្មីៗលើកិច្ចការសន្តិសុខសាយប័រនៅ​ព្រះរាជណាចក្រកម្ពុជាផងដែរ។ ឆ្លៀតក្នុងឱកាសនេះ តបតាមការបអញ្ជើញរបស់​ក្រុមហ៊ុន QI-ANXIN ដែលជាក្រុមហ៊ុនសន្តិសុខសាយប័រលំដាប់ទី១​នៃសាធា​រណរដ្ឋប្រជាមានិតចិន ឯកឧត្តម និងសហការីបានអញ្ជើញ​ទៅទស្សនៈកិច្ចដោយ​ផ្ទាល់​នៅក្រុមហ៊ុន និងបានពិភាក្សាលើការស្វែងរកកិច្ចសហការលើ​បច្ចេកវិទ្យា​បញ្ញាសិប្បនិម្មិត និងសន្តិសុខសាយប័រ ដែលក្នុងកិច្ចពិភាក្សានោះក៏មានក្រុមហ៊ុន Elinc ដែលជាក្រុមហ៊ុនបច្ចេកវិទ្យាឌីជីថលលំដាប់អន្តរជាតិបានចូលរួមផងដែរ៕

ដោយ ៖ ង៉ាន់ ទិត្យ