អាជ្ញាធរជំរុញប្រជាពលរដ្ឋពិនិត្យឯកសារដីធ្លី មុនទទួលបណ្ណកម្មសិទ្ធិជាផ្លូវការ
សៀមរាប៖នៅស្រុកក្រឡាញ់ ខេត្តសៀមរាប អាជ្ញាធរមូលដ្ឋាន និងមន្ត្រីជំនាញ បានអំពាវនាវដល់ប្រជាពលរដ្ឋ ដែលជាម្ចាស់ ឬកាន់កាប់ក្បាលដីមកពិនិត្យផ្ទៀងផ្ទាត់ឯកសារដីរបស់ខ្លួន ឱ្យបានត្រឹមត្រូវ ដើម្បីទទួលបានបណ្ណកម្មសិទ្ធិសម្គាល់ម្ចាស់អចលនវត្ថុ។
បច្ចុប្បន្ននៅស្រុកក្រឡាញ់ការចុះបញ្ជីដីមានលក្ខណៈជាប្រព័ន្ធបានជំរុញអនុវត្តលើក្បាលដីចំនួន ៥ ៣៤០ ក្នុងភូមិចំនួន ៧ របស់ឃុំស្រណាល រួមមាន ភូមិល្ហុង ភូមិគោកត្រុំ ភូមិរំដេង ភូមិគំរូ ភូមិគោកចាស់ ភូមិផ្លាំង និងភូមិគោកត្នោត។ ការបិទផ្សាយឯកសារវិនិច្ឆ័យត្រូវបានបើកឡើង ចាប់ពីថ្ងៃទី១០ ដល់ថ្ងៃទី២៤ ខែមិថុនា ឆ្នាំ២០២៥ នៅវត្តបូទុម្មរតនញ្ញាណ (វត្តស្រណាល) ក្នុងឃុំស្រណាល ស្រុកក្រឡាញ់ ។
លោក ប៉ាន់ សារេត សមាជិកក្រុមប្រឹក្សាស្រុក បានអំពាវនាវដល់ប្រជាពលរដ្ឋ ម្ចាស់ដី អង្គភាព និងស្ថាប័នពាក់ព័ន្ធទាំងអស់ ចូលរួមពិនិត្យឯកសារទាំងនេះ ដើម្បីធានាបាននូវភាពត្រឹមត្រូវទាំងផ្នែកបច្ចេកទេស និងផ្នែកច្បាប់ មុននឹងចេញបណ្ណកម្មសិទ្ធិ។
លោក ហេង គឹមចុង អភិបាលរងស្រុកក្រឡាញ់ បានបញ្ជាក់ថា ការចុះបញ្ជីដីនេះ គឺមានគោលបំណងផ្តល់អត្តសញ្ញាណច្បាស់លាស់ដល់ម្ចាស់ដី ដើម្បីអាចប្រើប្រាស់ក្នុងការរកប្រាក់ចំណូល ដូចជា ដាក់បញ្ចាំ ឬហ៊ីប៉ូតែក ហើយជាឯកសារសំខាន់ក្នុងការការពារកម្មសិទ្ធិពេលមានជម្លោះ។
ចំណែក លោក ប៊ូ ជុំសម្បត្តិ អនុប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តសៀមរាប បានបញ្ជាក់ថា «ការបិទផ្សាយឯកសារវិនិច្ឆ័យនេះ ជាឱកាសចុងក្រោយសម្រាប់ម្ចាស់ដី ឬអ្នកពាក់ព័ន្ធ ដើម្បីពិនិត្យឈ្មោះ ទំហំ ទ្រព្យសម្បត្តិ និងទីតាំងលើប្លង់។ ប្រសិនបើមានកំហុស អាចដាក់ពាក្យជំទាស់ ឬកែតម្រូវជាប្រព័ន្ធតាមផ្លូវច្បាប់បាន»។
លោកបន្តថា មកដល់ពេលនេះមន្ទីរចេញប័ណ្ណកម្មសិទ្ធិរួចរាល់ចំនួន ៩,៥៥៧ នៅឃុំក្រឡាញ់ និងឃុំកំពង់ថ្កូវ។ បច្ចុប្បន្ន កំពុងដំណើរការប្រមូលទិន្នន័យបន្ថែមនៅឃុំស្រណាល និងឃុំផ្សេងៗទៀត ដើម្បីអភិវឌ្ឍន៍ការចុះបញ្ជីដីជាលក្ខណៈជាតិ៕
ដោយ៖ប៊ុនរដ្ឋា
