កម្មវិធីសហគ្រិនមហាវិទ្យាល័យ សាកលវិទ្យាល័យជាតិបាត់ដំបង រដូវកាលទី៣ ត្រូវបានសម្ពោធ
បាត់ដំបង៖សហគ្រិនខ្មែរសហការជាមួយសាកលវិទ្យាល័យជាតិបាត់ដំបងបានរៀបចំសម្ពោធកម្មវិធីសហគ្រិនមហាវិទ្យាល័យ សាកលវិទ្យាល័យជាតិបាត់ដំបងរដូវកាលទី ៣ (NUBB UniPreneur’s Business Model Competition Season ៣)ដោយមានការចូលរួមពីសហគ្រិននិស្សិតប្រមាណ១០០នាក់ និងម្ចាស់អាជីវកម្មចំនួន១០ដែលមកពីក្រុងបាត់ដំបង ។
កម្មវិធីដែលបានប្រារព្ធក្នុងសប្ដាហ៍នេះក៏មានការចូលរួមពីតំណាងសហគ្រិនខ្មែរ លោក ពក បញ្ញាពេជ្រ អ្នកឯកទេសជាន់ខ្ពស់អភិវឌ្ឍសហគ្រិនភាព និងនវានុវត្តន៍ លោក ទេព នាវា សាកលវិទ្យាធិការរងនៃសាកលវិទ្យាល័យជាតិបាត់ដំបង ព្រមទាំងគណៈគ្រប់គ្រង សាស្ត្រាចារ្យ និស្សិត និងភ្ញៀវកិត្តិយសជាច្រើននាក់។
លោក ទេព នាវា សាកលវិទ្យាធិការរង នៃសាកលវិទ្យាល័យជាតិបាត់ដំបងបានបញ្ជាក់ថា កម្មវិធីនេះ គឺជាផ្នែកមួយរបស់កម្មវិធីសហគ្រិនមហាវិទ្យាល័យ(UniPreneur)ដែលបង្កើតឡើងក្នុងគោលបំណងលើកកម្ពស់នវានុវត្តភាព និងសហគ្រិនភាពទៅកាន់និស្សិត ដោយប្រែក្លាយគំនិតច្នៃប្រឌិតរបស់និស្សិតឱ្យក្លាយទៅជាផលិតផល ឬ សេវាកម្ម ដែលអាចដោះស្រាយបញ្ហាប្រឈមប្រចាំថ្ងៃរបស់ប្រជាជន វិស័យសាធារណៈ និង វិស័យឯកជន។ លោកបានបន្ថែមថា ” សាកលវិទ្យាល័យជាតិបាត់ដំបង មិនត្រឹមតែផ្តោតទៅលើការបង្រៀន និងការស្រាវជ្រាវប៉ុណ្ណោះទេ សាកលវិទ្យាល័យ ក៏មានបេសកកម្មតម្រង់ទិសអភិវឌ្ឍន៍ សមត្ថភាពស្រាវជ្រាវ ដោយផ្សារភ្ជាប់ជាមួយឧស្សាហកម្ម ដើម្បីចូលរួមចំណែកក្នុងការអភិវឌ្ឍសេដ្ឋកិច្ចនៅក្នងភូមិភាគពាយ័ព្យនៃប្រទេសកម្ពុជា។
អញ្ជើញចូលរួមក្នុងកម្មវិធីនេះដែរឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកនាយកប្រតិបត្ដិ នៃ សហគ្រិនខ្មែរ បានថ្លែងថា កម្មវិធីថ្ងៃនេះយុវសិស្សមានឱកាស បង្កើតនវានុវត្តន៍ថ្មី ដើម្បីទុកជាទុនសម្រាប់គំនិតច្នៃប្រឌិតថ្ងៃក្រោយ ដែលជាការអភិវឌ្ឍមូលធនមនុស្សស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ។
ថ្លែងបើកសម្ពោធឱ្យដំណើរការកម្មវិធីសហគ្រិនមហាវិទ្យាល័យ សាកលវិទ្យាល័យជាតិបាត់ដំបង រដូវកាលទី៣នេះដែរ ឯកឧត្តម សុខ ឃន សាកលវិទ្យាធិការនៃសាកលវិទ្យាល័យជាតិបាត់ដំបង បានផ្តាំផ្ញើដល់កម្មវិធីទាំងមូលថា ” ដើម្បីអភិវឌ្ឍសហគ្រាសពីធុនតូចទៅជាធុនមធ្យមនិងពីធុនមធ្យមទៅជាធុនធំនិងចុងក្រោយក្លាយជាក្រុមហ៊ុនអន្តរជាតិ…សហគ្រាសត្រូវការធាតុបីសំខាន់គឺ “ហិរញ្ញវត្ថុ បច្ចេកវិទ្យា និងសហគ្រិនភាព។សហគ្រិនមហាវិទ្យាល័យ សាកលវិទ្យាល័យជាតិបាត់ដំបង អាចជួយពង្រឹងនូវសមត្ថភាពសហគ្រិនភាពនិងសមត្ថភាពបច្ចេកវិទ្យាបន្ថែមលើហិរញ្ញវត្ថុ ដើម្បីជួយសម្រេចបេសកកម្មនៃការពង្រីកខ្លួនរបស់សហគ្រាសដើម្បីបង្កើតការងារដែលមានផលិតភាពក្នុងចំនួនច្រើន។
តាមការបញ្ជាក់របស់លោក ទេព នាវា សាកលវិទ្យាធិការរងនៃសាកលវិទ្យាល័យជាតិបាត់ដំបង បានឱ្យដឹងបន្ថែមថាកម្មវិធីប្រកួតប្រជែងគំរូអាជីវកម្មនេះ បាននាំក្រុមនិស្សិតប្រមាណ ២០ក្រុម ឬ១០០នាក់ ដែលមានសមត្ថភាពធ្វើបទបង្ហាញនូវគំនិតធុរកិច្ចថ្មី ដល់ក្រុមគណៈកម្មការ ដែលជាសហគ្រិនមានបទពិសោធន៍ និងជាអ្នកដឹកនាំ ក្នុងវិស័យនវានុវត្តន៍ជាច្រើនរូប។ក្រុមនិស្សិតឆ្នើមដែលជាប់ជ័យលាភី នៅវគ្គពាក់កណ្តាលផ្តាច់ព្រ័ត្រ នឹងមានឱកាសក្លាយជាក្រុមជម្រើសចូលរួមក្នុងកម្មវិធីបណ្តុះគំនិតធុរកិច្ចថ្មីជាមួយក្រុមធំ ដែលមានសាកលវិទ្យល័យ ប្រមាណ៥០មកពីទូទាំងប្រទេសកម្ពុជា ដូចជា កម្មវិធីUnipreneurCamp, UnipreneurSprint។ចំណែកឯក្រុមក្រុមនិស្សិតឆ្នើម ដែលជាប់ជ័យលាភី ក្នុងវគ្គផ្តាច់ព្រ័ត្រនឹងមានឱកាសបន្ត ក្នុងការប្រកួតថ្នាក់ជាតិ (Unipreneur National Challenge )។
លោកបានបន្តថា ព័ត៌មានបន្ថែមពីកម្មវិធីប្រកួតប្រជែងគំរូអាជីវកម្ម របស់ សហគ្រិនមហាវិទ្យាល័យ សាកលវិទ្យា
ល័យជាតិបាត់ដំបងអាចទំនាក់ទំនង លោក ពក បញ្ញាពេជ្រ តាមលេខទូរស័ព្ទ ០៨៩ ៩៥៩ ៨៧១ ឬ បណ្ឌិត ថាច់ ប៊ុនរឿន តាមលេខទូរសព្ទ ០១២ ៥២៦ ២០៣ ដើម្បីទទួលបានព័ត៌មានកាន់តែច្បាស់លម្អិតថែមទៀត៕
អត្ថបទ-រូបភាព÷ អ៊ុក សំអាន ប.ប
