កំពង់ធំ៖ រដ្ឋបាលខេត្តកំពង់ធំដែលមានមន្ទីរបរិស្ថានជាសេនាធិការបានប្រារព្ធទិវាបរិស្ថានជាតិ និងបរិស្ថានពិភព​លោក៥ មិថុនាក្រោមប្រធានបទ «ប្រយុទ្ធប្រឆាំងការបំពុលដោយសំណល់ប្លាស្ទិក»។ ដោយមានការអញ្ជើញ​ចូលរួមពី​លោក ជា ចាន់ អភិបាលរងខេត្តតំណាងឯកឧត្តម នួន ផារ័ត្ន អភិបាលខេត្តកំពង់ធំ។

កម្មវិធីដែលបានប្រព្រឹត្តទៅកាលពីព្រឹកថ្ងៃទី១២ ខែមិថុនា គឺជាឱកាសដ៏សំខាន់មួយក្នុងការផ្សព្វផ្សាយ និងលើក​ទឹកចិត្តដល់សាធារណជនអំពីសារៈសំខាន់នៃការកាត់បន្ថយសំណល់ប្លាស្ទិក និងការប្រើប្រាស់ជំនួសដោយ​វត្ថុធាតុ​បរិស្ថាន។

ទាក់ទងនឹងវិស័យបរិស្ថាននេះដែរ លោក អោង ប៊ុនធឿន ប្រធានមន្ទីរបរិស្ថានខេត្តកំពង់ធំ បានឱ្យដឹងថា​មន្ទីរបាន​ដាក់ផែនការបណ្តុះកូនឈើចំនួន ១០ម៉ឺនដើមក្នុងមួយឆ្នាំ។ សម្រាប់ឆ្នាំ២០២៥នេះ មន្ទីរបានបណ្តុះចំនួន ១០១​.​០០០ ដើមដែលមានប្រភេទឈើព្រៃ ឈើហូបផ្លែ ឈើលម្អ និងត្នោត។ដោយក្រសួងបរិស្ថានក៏​បានដាក់​ចេញ​យុទ្ធនាការសំខាន់ ៣ ចំនួន ដើម្បីលើកកម្ពស់ការយល់ដឹង និងអនុវត្តក្នុងជីវិតប្រចាំថ្ងៃគឺ «ថ្ងៃនេះ ខ្ញុំមិនប្រើថង់​ប្លាស្ទិកទេ»,«កម្ពុជាស្អាត ខ្មែរធ្វើបាន» និង«ផ្លូវជាតិស្អាត គ្មានសំរាមប្លាស្ទិក»។

ចំណែកលោក ជា ចាន់ អភិបាលរងខេត្តបានគូសរំលេចថា ការចូលរួមរបស់សិស្សានុសិស្ស គ្រួសារ សហគមន៍ និងអាជីវករ គឺជាចំណុចសំខាន់ដើម្បីជំរុញការអនុវត្តវិធានការទាក់ទងនឹងបរិស្ថាន៕

ដោយ៖​ប៊ុន​រដ្ឋា