រាជរដ្ឋាភិបាលសម្រេចយកដីបឹងតាមោក ២០ហិកតាធ្វើជាផ្សារចែកចាយបន្លែ និងចំណតរថយន្តក្រុង ចំណែកអភិបាលរាជធានី អះអាងថា ការកាត់ដី«បឹងតាមោក» គឺ ដើម្បីដោះស្រាយបញ្ហាសណ្ដាប់ធ្នាប់ចរាចរណ៍
ភ្នំពេញ៖ រាជរដ្ឋាភិបាលកម្ពុជាបានសម្រេចយកដីបឹងតាមោកស្ថិតក្នុងសង្កាត់ព្រែកព្នៅ ខណ្ឌសែនសុខ ធ្វើជាផ្សារផ្គត់ផ្គង់បន្លែ ផ្លែឈើ និងចំណតរថយន្ត។ ជាពិសេសកន្លែងចែកចាយបន្លែនៅផ្សារដើមគរនឹងរើទៅផ្សារថ្មីនេះ។ ការសម្រេចរបស់រាជរដ្ឋាភិបាលក្នុងការសាងសង់ផ្សារផ្គត់ផ្គង់បន្លែផ្លែឈើ និងធ្វើចំណតរថយន្តនៅលើផ្ទៃដីបឹងតាមោកនេះ ត្រូវបានរាជរដ្ឋាភិបាលសម្រេចតាំងពីអំឡុងខែមិថុនាឆ្នាំ២០១៨មកម្ល៉េះ តែដំណឹងពីការសាងសង់ទើបនឹងបែកធ្លាយនៅពេលថ្មីៗនេះ។ អភិបាលរាជធានីភ្នំពេញ ឯកឧត្តម ឃួង ស្រេង បានឲ្យដឹងថា សាលារាជធានីភ្នំពេញ បានស្នើសុំកាត់ដីទំហំ ២០ហិកតាពីបឹងតាមោក ដែលជាបឹងរក្សាទឹកកខ្វក់ និងរំដោះទឹកពីរាជធានីភ្នំពេញនោះ សម្រាប់សង់ផ្សារ និងចំណតរថយន្ត គឺ ដើម្បីដោះស្រាយបញ្ហាសណ្ដាប់ធ្នាប់ចរាចរណ៍ ខណៈមានប្រជាពលរដ្ឋជាច្រើនកំពុងលក់បន្លែ និង ធ្វើអាជីវកម្មនៅលើផ្លូវនៅផ្សារដើមគរសព្វថ្ងៃនេះមានចំនួនកាន់តែច្រើន។
ទីស្តីការគណៈរដ្ឋមន្ត្រី បានគូសបញ្ជាក់ថា ការសម្រេចបង្កើតផ្សារផ្គត់ផ្គង់បន្លែផ្លែឈើ និងចំណតរថយន្តនៅបឹងតាមោកនេះ ទទួលបានចំណារដ៏ខ្ពង់ខ្ពស់ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាកលាពីថ្ងៃទី០៨ ខែមិថុនា ឆ្នាំ២០១៨។ កាលពីថ្ងៃទី០២ ខែសីហា ឆ្នាំ២០១៨ ទីស្តីការគណៈរដ្ឋមន្ត្រី ក៏បានធ្វើសំណើមួយទៅកាន់ក្រសួងរៀបចំដែនដី នគរូបនីយកម្ម និងសំណង់ ស្នើសុំដីនៅបឹងតាមោកចំនួន ២០ហិកតា ដើម្បីសាងសង់ផ្សារផ្គត់ផ្គង់បន្លែ ផ្លែឈើ និងចំណតរថយន្ត។ ក្នុងលិខិតរបស់ទីស្តីការគណៈរដ្ឋមន្ត្រីផ្ញើជូនក្រសួងដែនដី បានគូសបញ្ជាក់ថា «រាជរដ្ឋាភិបាលបានយល់ព្រមជាគោលការណ៍យកដីចំនួន២០ហិកតា នៅបឹងតាមោក ដើម្បីសាងសង់ជាផ្សារផ្គត់ផ្គង់បន្លែ ផ្លែឈើ និងជាចំណតរថយន្ត និងអនុញ្ញាតរើផ្សារបន្លែពីផ្សារដើមគរ ទៅផ្សារថ្មីនៅបឹងតាមោកវិញ»។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជាបានចេញអនុក្រឹត្យស្ដីពីការកំណត់ផ្ទៃបឹងតាមោកជាសម្បតិ្តរបស់រដ្ឋដែលមានផ្ទៃដីសរុបប្រមាណ ៣២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ។ បឹងធំៗចំនួន ៤ មានបឹងពោងពាយ បឹងកក់ បឹងទំពុន និងបឹងជើងឯក ដែលនៅក្នុងនិងជាយរាជធានីភ្នំពេញ គឺត្រូវបានរដ្ឋាភិបាលវិនិយោគឲ្យក្រុមហ៊ុនធ្វើការអភិវឌ្ឍសម្រាប់ធ្វើជាតំបន់ពាណិជ្ជកម្ម និងទីក្រុងរណបជាដើម៕
