ព្រះមហាក្សត្រ តែងតាំងឯកឧត្តម ឧត្តមសេនីយ៍ឯក ហ៊ុន ម៉ាណែត ជាអគ្គមេបញ្ជាការរងនៃកងយោធពលខេមរភូមិន្ទ
ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យតែងតាំងឯកឧត្តម ឧត្តមសេនីយ៍ឯក ហ៊ុន ម៉ាណែត ជាអគ្គមេបញ្ជាការរង នៃកងយោធពលខេមរភូមិន្ទបន្ថែមលើមុខងារបច្ចុប្បន្ន។ នេះបើយោងតាមព្រះរាជក្រឹត្យចុះថ្ងៃទី០៦ ខែកក្កដា ឆ្នាំ២០១៨ ដែលធ្លាក់ដល់ដៃអ្នកសារព័ត៌មាននៅថ្ងៃទី១១ ខែកក្កដា ឆ្នាំ២០១៨។
សូមជម្រាបថា ឯកឧត្តម ឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះ និងជាមេបញ្ជាការរងកងទ័ពជើងគោក ត្រូវបានក្រសួងការពារជាតិ កាលពីថ្ងៃទី៣០ ខែមិថុនា ឆ្នាំ២០១៨ ប្រគល់ភារកិច្ចជានាយសេនាធិការចម្រុះស្ដីទី និងជាមេបញ្ជាការកងទ័ពជើងគោកស្តីទី ក្រោយពីនាយឧត្តមសេនីយ៍ គន់ គីម អគ្គមេបញ្ជាការរង និងនាយសេនាធិការចម្រុះ បានឈរឈ្មោះជាបេក្ខជនតំណាងរាស្រ្ដ នៅក្នុងការបោះឆ្នោតជ្រើសតាំងតំណាងរាស្រ្ដ នីតិកាលទី៦។ ដូចគ្នានេះដែរ ការដែលឯកឧត្តម ឧត្តមសេនីយ៍ឯក ហ៊ុន ម៉ាណែត បានឡើងពីមេបញ្ជាការរងកងទ័ពជើងគោក ទៅជាមេបញ្ជាការកងទ័ពជើងគោកស្ដីទី គឺក្រោយពីនាយឧត្តមសេនីយ៍ មាស សុភា អគ្គមេបញ្ជាការរង មេបញ្ជាការកងទ័ពជើងគោក បានឈរឈ្មោះជាបេក្ខជនតំណាងរាស្រ្ដ៕