នៅសល់ក្មេងតែ ៦នាក់ទៀតប៉ុណ្ណោះ ដែលក្រុមជួយសង្គ្រោះ រំពឹងថា នឹងចេញពីក្នុងរូងភ្នំថៃដោយជោគជ័យ ក្នុងពេលដ៏ខ្លី
បាងកក ៖ ក្មេងប្រុស០៦នាក់ក្នុងចំណោម១២នាក់ ដែលជាប់ក្នុងរូងភ្នំលិចទឹក នៅភាគខាងជើងប្រទេសថៃ ជាមួយគ្រូបង្វឹកម្នាក់ អស់រយៈពេលប្រមាណ១៥យប់កន្លងមកនេះ ទីបំផុតត្រូវបានជួយសង្រ្គោះចេញមកខាងក្រៅវិញ ដោយសុវត្ថិភាពជាបណ្តើរៗហើយ។ នេះបើតាមការដកស្រង់ការផ្សាយចេញពីសារព័ត៌មាន The Guardia នៅយប់ថ្ងៃអាទិត្យ ទី០៨ ខែកក្កដា ឆ្នាំ២០១៨។ យោងតាមប្រភពព័ត៌មានដដែល ក្មេងជំទង់ពីរដែលចេញមកដល់ក្រៅមុន ក្នុងចំណោម០៦នាក់ខាងលើ ត្រូវបានបញ្ជូនតាមរថយន្តសង្រ្គោះបន្ទាន់ ទៅកាន់ឧទ្ធម្ភាគចក្រដើម្បីដឹកបន្តទៅកាន់មន្ទីរពេទ្យខេត្តឈៀងរ៉ៃ ចម្ងាយប្រមាណ៨០គីឡូម៉ែត្រពីតំបន់រូងភ្នំថាំលួង។ មកទល់ពេលនេះ ក្មេងប្រុសទាំង០៦នាក់ បានចេញមកដល់ក្រៅរូបភ្នំ តាំងពីប៉ុន្មានម៉ោងមុនម្តងម្នាក់ៗ។
គួរជម្រាបថា នាព្រឹកថ្ងៃអាទិត្យនេះ អាជ្ញាធរបានសម្រេចចាប់ផ្តើមការជួយសង្រ្គោះមនុស្សទាំង១៣នាក់ ដែលបានជាប់ក្នុងរូងភ្នំថាំលួង នៃស្រុកម៉ែសៃ ខេត្តឈៀងរ៉ៃ ភាគខាងជើងប្រទេសថៃ តាំងពីថ្ងៃទី២៣ ខែមិថុនាមក ហើយទើបតែត្រូវបានរកឃើញកាលពីដើមខែកក្កដានេះ ឲ្យចេញមកខាងក្រៅវិញ តាមរយៈការបញ្ជូនក្រុមអ្នកជំនាញមុជទឹក ដើម្បីជួយអមដំណើរពួកគេ។ ពីដំបូងឡើយអាជ្ញាធរថៃ បានរំពឹងថា ទម្រាំតែអ្នកដំបូងគេចេញមកដល់ខាងក្រៅគឺរហូតទាល់តែម៉ោង០៩យប់នេះឯណោះ ប៉ុន្តែក្មេងពីរនាក់ដែលត្រូវបានសង្រ្គោះចេញផុតពីរូងភ្នំដំបូងគេ គឺកាលម៉ោងខ្ទង់៦យប់នេះ ពោលគឺ០៣ម៉ោងមុនការរំពឹងទុក។ ចំណែកក្មេង០៦នាក់ទៀត ព្រមទាំងគ្រូបង្វឹក ត្រូវគេរំពឹងថា នឹងចេញមកដល់ខាងក្រៅនាពេលឆាប់ៗខាងមុខដូចគ្នាដែរ៕