ភ្នំពេញ ៖ ជនសង្ស័យ២នាក់ ត្រូវបានកម្លាំងនគរបាលប៉ុស្តិ៍កាកាប១ ខណ្ឌពោធិ៍សែនជ័យ ចាប់ឃាត់ខ្លួន ក្នុងពេលតែមួយ នៅទីតាំងក្នុងភូមិតែមួយ ដោយប្រព្រឹត្តបទល្មើស២ផ្សេងគ្នា ម្នាក់ពាក់ព័ន្ធទៅនឹងអំពើលួច និងម្នាក់ទៀត ពាក់ព័ន្ធទៅនឹងប្រើអំពើហិង្សា វាយឪពុកក្មេកឲ្យរងរបួស ។

ជនសង្ស័យទាំង២នាក់ ត្រូវបានសមត្ថកិច្ចឃាត់ខ្លួនបាន កាលពីវេលាម៉ោង២រសៀល ថ្ងៃទី០៥ ខែកក្កដា ឆ្នាំ២០១៨ ស្ថិតនៅក្នុងភូមិតាងួន១ សង្កាត់កាកាប១ ខណ្ឌពោធិសែនជ័យ ។

តាមនគរបាលបានឲ្យដឹងថា ជនសង្ស័យក្នុងករណីទី១ ក្នុងបទល្មើសលួចទ្រព្យសម្បត្តិ មានឈ្មោះ រឿន ភារៈ ហៅម៉ាប់ ភេទប្រុស អាយុ២៨ឆ្នាំ មុខរបរ មិនពិតប្រាកដ ស្នាក់នៅភូមិដីថ្មី សង្កាត់គោកឃ្លាង ខណ្ឌសែនសុខ ។ ជនសង្ស័យ បានលួចរទេះអេតចាយ មួយគ្រឿង របស់ស្រ្តីឈ្មោះ ហ៊ុន អ៊ាក អាយុ៣៥ឆ្នាំ មុខរបរ ទិញលក់អេតចាយ នៅភូមិតាងួន១ សង្កាត់កាកាប១ មានទីលំនៅភូមិ ដីថ្មី សង្កាត់គោកឃ្លាង ខណ្ឌសែនសុខ កាលពីថ្ងៃទី០៣ ខែកក្កដា ឆ្នាំ២០១៨ ជនសង្ស័យ បានទៅលួចរទេះអេតចាយ ចេញពីកន្លែងទិញលក់អេតចាយ ក្នុងភូមិតាងួន១ សង្កាត់កាកាប១ ខណៈដែលម្ចាស់រវល់តែទៅផ្ទះនៅឯខណ្ឌសែនសុខ តែត្រូវបានអ្នកភូមិ គេស្គាល់មុខសញ្ញា ប្រាប់ភិនភាគ ជនសង្ស័យ លុះមកដល់រសៀលថ្ងៃទី០៥ ខែកក្កដា នេះឃើញជនសង្ស័យ ប្តឹងប៉ូលីសចាប់ខ្លួន ។  ចំណែកករណីទី២  បង្កហិង្សា វាយឪក្មេក ជនសង្ស័យឈ្មោះ ហម រស្មី ភេទប្រុស អាយុ៣៣ឆ្នាំ មុខរបរ បុគ្គលិកក្រុមហ៊ុន មានទីលំនៅក្នុងភូមិតាងួន១ ក្បែរករណីទី១ដែរ ដោយសារកើតមានទំនាស់ក្នុងគ្រួសារ ជនសង្ស័យ ជាកូនប្រសារខាងលើ ហ៊ានដល់ប្រើអំពើរហិង្សា វាយទៅលើឪពុកក្មេក បង្កឲ្យភ្ញាក់ផ្អើល ហើយត្រូវបានក្រុមគ្រួសារ ប្តឹងប៉ូលីសឲ្យជួយអន្តរាគមន៍ ស្របពេលដែលវត្តមានប៉ូលីសកំពុងនៅ ក្បែរនោះស្រាប់ផង ឃាត់ខ្លួនជនសង្ស័យ វាយឪពុកក្មេក នាំទៅប៉ុស្តិ៍ រួមជាមួយជនសង្ស័យលួចរទេះអេតចាយតែម្តង ។

ជនសង្ស័យទាំង២នាក់ ក្នុងបទល្មើស២ផ្សេងគ្នា សមត្ថកិច្ចឃាត់ខ្លួន សាកសួរនិងកសាងសំណុំរឿងបញ្ជូនទៅផ្នែកជំនាញអធិការដ្ឋាន ចាត់ការបន្តតាមនីតិវិធី៕