(ព្រះវិហារ): សារធាតុញៀនប្រភេទ(ម៉ាទឹកកក) ចំនួន១០កញ្ចប់តូច និងជនសង្ស័យម្នាក់ ព្រមជាមួយអាវុធកែច្នៃ០៣ដើម ត្រូវបានកម្លាំងជំនាយ កងរាជអាវុធហត្ថ សហការណ៍ជាមួយកម្លាំងកងពលតូចអន្តរាគមន៍លេខ៨ ចុះធ្វេីការឃាត់ខ្លួន និងដកហូត កាលពីវេលាម៉ោង១២.៣០នាទី ថ្ងៃទី០១ ខែកក្កដា ឆ្នាំ២០១៨ នៅចំណុចភូមិអន្លង់វែង ស្ថិតក្នុងឃុំកន្ទួត ស្រុកជាំក្សាន្ត ខេត្តព្រះវិហារ។
លោក អនុសេនីយ៍ឯក ជុន បូរ៉ា មេបញ្ជាការរង ទទួលបន្ទុកការងារព្រហ្មទណ្ឌ ​ដឹកនាំកម្លាំងបង្ក្រាបផ្ទាល់ បានអោយដឹងថា ការឃាត់ខ្លួនជនសង្ស័យ ព្រមជាមួយនិងវត្ថុតាងខាងលើបានជោគជ័យ ដោយ​មានការចង្អុលបង្ហាញ​ពី​ឯកឧត្តម ឧត្តមសេនីយ៍ត្រី កង សៅគុណ មេបញ្ជាកា​រកងរាជ​អាវុធហត្ថ​ខេត្ត​ និងក្រោមការឯកភាព បញ្ជាដោយ​លោកវរៈសេនីយ៍ត្រី ពេជ្រ សុភី មេបញ្ជាកា​រមូលដ្ឋានកងរាជអាវុធហត្ថ​ស្រុកផងដែរ។
លោក អនុសេនីយ៍ឯក ជុន បូរ៉ា បានបន្តអោយដឹងបន្ថែមថា ជនសង្ស័យដែលកម្លាំងឃាត់ខ្លួនមានឈ្មោះ ទន់ ឈាន ភេទប្រុស អាយុ៣៥ឆ្នាំ មុខរបរមិនពិតប្រាកដ  រស់នៅភូមិអន្លង់វែង ឃុំកន្ទួតស្រុកជាំក្សាន្ត  ខេត្តព្រះវិហារ។

និងចាប់យកវត្ថុតាងមួយចំនួនរួមមាន÷ ម្សៅក្រាមពណ៏សថ្លា(ម៉ាទឹកកក) ចំនួន១០កញ្ចប់តូច កាំភ្លើងច្នៃចំនួន០២ ដើម កាំភ្លើងckcកាត់ចំនួន០១ដើម គ្រាប់AK 47ចំនួន៣២គ្រាបសាក់កាដូ ដាក់កាំភ្លើង៊១ ម៉ូតូវេវអ៉ី ពណ៍ខ្មៅលាយខៀវ គ្មានស្លាកលេខចំនួន០១គ្រឿង លុយខ្មែរចំនួន៥ម៉ឺនរៀល និងសម្ភារៈសំរាប់ជក់មួយចំនួន។ លោកថា បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញកងរាជអាវុធហត្ថស្រុកជាំក្សាន្ត កំពុងកសាងសុំណុំរឿង បញ្ជូនទៅកាន់កងរាជអាវុធហត្ថខេត្តព្រះវិហារ ចាត់ការបន្តទៅតាមនិត្តិវិធីច្បាប់៕ សួនលីណា