ជប៉ុនផ្តល់កម្ចីឲ្យឥណ្ឌូនេស៊ីជិត៥០០លានដុល្លារ ទប់ទល់នឹងកូវីដ១៩
នាយករដ្ឋមន្ត្រីជប៉ុន Yoshihide Suga បាននិយាយកាលពីថ្ងៃអង្គារ៍ ទី២០ តុលា ២០២០ថា ប្រទេសរបស់លោកនឹងផ្តល់កម្ចី៥០ពាន់លានយ៉េន ឬ ៤៧៣លានដុល្លារអាមេរិក ក្នុងអត្រាការប្រាក់ទៀបជូនដល់ប្រទេសឥណ្ឌូនេស៊ី ដើម្បីយកទៅប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩។
ការផ្តល់ជូននេះធ្វើឡើង ស្របពេលដែលលោកប្រធានាធិបតីឥណ្ឌូនេស៊ី Joko Widodo ជួបពិភាក្សាការងារជាមួយលោកនាយករដ្ឋមន្ត្រី Yoshihide Suga ដែលបានបំពេញទស្សនកិច្ចនៅឥណ្ឌូនេស៊ី។
នាយករដ្ឋមន្ត្រីជប៉ុន ទើបឡើងកាន់តំណែង ដែលទើបបញ្ចប់ទស្សនកិច្ចនៅវៀតណាមហើយបន្តទៅឥណ្ឌូនេស៊ីរូបនេះក៏បានឯកភាពជាមួយលោក Joko Widodo លើការចាប់ផ្តើមពិភាក្សាការបន្តជើងហោះហើរធុរកិច្ច រវាងប្រទេសទាំងពីរ និងរៀបចំពិភាក្សាអំពីបញ្ហាសន្តិសុខ រវាងរដ្ឋមន្ត្រីការពារជាតិនិងរដ្ឋមន្ត្រីការបរទេស នាពេលឆាប់ៗខាងមុខនេះផងដែរ។
លោក Yoshihide Suga ដែលផ្តើមធ្វើដំណើរទស្សនកិច្ចផ្លូវការនៅប្រទេសលើកដំបូង បានឡើងកាន់តំណែងជានាយករដ្ឋមន្ត្រីជប៉ុន កាលពីខែមុន ក្រោយពេលអតីតនាយករដ្ឋមន្ត្រី ស៊ីនសូ អាបេ បានលាឈប់ដោយសារតែបញ្ហាសុខភាព៕ ប្រភពពី Channelnewsasia