ភ្នំពេញ៖ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានទទួលជួប​ពិភាក្សាជាមួយ​លោក ថាស៊ីឡូ ព្រីនសឺ (Tassilo Brinzer) ប្រធានថ្មីនៃសភាពាណិជ្ជកម្មអឺរ៉ុបប្រចាំនៅកម្ពុជា ដើម្បីពិភាក្សាការងារ និងពង្រឹកិច្ច​សហប្រតិបត្តិការជាមួយក្រសួងពាណិជ្ជកម្ម កាលពីព្រឹកថ្ងៃទី២២ ខែតុលា ឆ្នាំ២០២០ នេះ នៅទីស្តីការ​ក្រសួង ។

ឯកឧត្តម រដ្ឋមន្ត្រីក្រសួងពាណិជ្ជកម្ម បានបញ្ជាក់ជូននូវកិច្ចសហប្រតិបត្តិការដ៏ល្អរវាងក្រសួងពាណិជ្ជកម្ម និង​សភាពាណិជ្ជកម្មអឺរ៉ុបប្រចាំនៅកម្ពុជាកន្លងមក ក៏ដូចជាធ្វើបច្ចុប្បន្នភាពជូនអំពីការ​អនុម័តច្បាប់ថ្មីៗ ដូចជា ច្បាប់​ស្ដីពី​ពាណិជ្ជកម្ម​តាមប្រព័ន្ធអេឡិចត្រូនិក ច្បាប់ការពារអ្នកប្រើប្រាស់  និងការរៀបចំសេចក្ដីព្រាង​ច្បាប់ប្រកួត​ប្រជែង​ជាដើម។ លើសពីនេះ ឯកឧត្តម រដ្ឋមន្ត្រី ក៏បានបញ្ជាក់​បន្ថែម​ជូនដល់​ប្រតិភូនៃសភាពាណិជ្ជកម្មអឺរ៉ុប អំពីកិច្ចព្រមព្រៀង​ពាណិជ្ជកម្ម​សេរីដែលកម្ពុជាបានបញ្ចប់ជាមួយសាធារណរដ្ឋប្រជាមានិតចិន កិច្ចព្រមព្រៀងពាណិជ្ជកម្មសេរី ដែល​កម្ពុជា​កំពុងចរចាជាមួយសាធារណរដ្ឋកូរ៉េ និងការត្រៀមចរចាជាមួយប្រទេសជាដៃគូសំខាន់ៗដទៃទៀតជាដើម។

 តាមរយៈ​កិច្ចប្រជុំនេះ  ឯកឧត្តម ប៉ាន សូរស័ក្តិ បានលើកទឹកចិត្តឲ្យប្រតិភូនៃសភាពាណិជ្ជកម្មអឺរ៉ុបប្រចាំនៅ​​កម្ពុជា ចូលរួមកម្មវិធី ឬព្រឹត្តិការណ៍ពិព័រណ៍ពាណិជ្ជកម្ម និងជំនួបពាណិជ្ជកម្មជាមួយអ្នកធុរកិច្ចកម្ពុជា  និង​បានស្នើឲ្យកិច្ច​សហប្រតិបត្តិការ​ពីសភាពាណិជ្ជកម្មអឺរ៉ុប ប្រចាំនៅកម្ពុជា ក្នុង​ការចូលរួមរៀបចំវេទិកាធុរៈកិច្ចនានា​នៅក្នុង​កិច្ចប្រជុំ​អាស៊ី-អឺរ៉ុប (ASEM) លើកទី១៣ នៅកម្ពុជា នាពេលខាងមុខផងដែរ។

លោក លោក ថាស៊ីឡូ ព្រីនសឺ (Tassilo Brinzer) ប្រធាននៃសភាពាណិជ្ជកម្មអឺរ៉ុបប្រចាំនៅកម្ពុជា បានវាយតម្លៃខ្ពស់ចំពោះការខិតខំប្រឹងប្រែង និងលទ្ធផលដ៏ល្អដែលកម្ពុជាទទួលបានការអនុម័តច្បាប់ខាងលើនេះ ដែលនឹងក្លាយជាមូលដ្ឋានគ្រឹះ ដើម្បីធានា​ភាព​ជឿជាក់សម្រាប់អ្នកធុរកិច្ច និងវិស័យពាណិជ្ជកម្មនៅកម្ពុជានាពេលអនាគត។ លោកប្រធាន ក៏បានលើក​ឡើងពីគោលការណ៍របស់ក្រុមហ៊ុនអឺរ៉ុប ក្នុងការប្រើប្រាស់ថាមពលកើតឡើងវិញ និងការកាត់បន្ថយ​កម្រិត​ឧស្ម័នកាបូន​ឌីអុកស៊ីតឱ្យមក ០% ក្នុងឆ្នាំ២០៣០ នៅក្នុងខ្សែច្រវាក់ផលិតកម្មរបស់ខ្លួន។

លោក ប្រធាន​ក៏បាន​យល់ព្រម​ក្នុងការជួយរៀបចំវេទិកាធុរៈកិច្ចនៅក្នុង​កិច្ចប្រជុំអាស៊ី-អឺរ៉ុប (ASEM) លើកទី១៣ ដោយទទួល​អញ្ជើញ​វាគ្មិនអន្តរជាតិចូលរួមក្នុងវេទិកានេះ។

ឯកឧត្តមរដ្ឋមន្ត្រី បានឯកភាព និងស្វាគមន៍ចំពោះសំណូមពរ​របស់​លោកប្រធាន និងស្នើឲ្យសភាពាណិជ្ជកម្មអឺរ៉ុបប្រចាំនៅកម្ពុជា បន្តកិច្ចសហប្រតិបត្តិការជាមួយក្រសួងពាណិជ្ជកម្ម ដែលមានលោកជំទាវ តឹករ៉េត កំរង រដ្ឋលេខាធិការ ដើម្បីរៀបចំវេទិកាធុរៈកិច្ចនានានៅក្នុងកិច្ចប្រជុំអាស៊ី-អឺរ៉ុប (ASEM) លើកទី១៣ ផងដែរ៕